Tlaišego, tsogo le lerato la Bakriste – letšatši la 13
Tsogo e dira gore o be le khutšo
(Di)temana ya Bibele
Pesalome 131
William Nicol o anega kanegelo e botse ye e latelago go tšwa go setšo sa sehlopha sa badumedi sa Bajuda.
Isaac, Mojuda wa modiidi, o be a dula mokutwaneng o monnyane kgole le toropo. Bošegong bjo bongwe, o lorile a tšea leeto le le telele go ya toropong, moo a hweditšego mokutla wa gauta ka tlase ga leporogo kgorong e kgolo ya toropo. O hlokomologile toro, eupša bošego bjo bongwe le bjo bongwe a lora ka yona. Isaac e be e le modiidi kudu moo e lego gore o be a ka se lahlegelwe ke selo. Morago ga go sepela matšatši a mantši, o fihlile, go hwetša fela gore kgoro ya toropo le leporogo di be di letilwe kudu. Ge moetapele wa baleti a bona gore o nyaka go tsena ka fase ga leporogo, a goeletša, “Mokgalabje, o dira eng mo?” Ka boikokobetšo, a mmotša ka toro ya gagwe. Moetapele wa baleti a mo sega gomme a bolela a hlabošitše lentšu, “Setlatla tena, na re tla ba bomang ge re ka thoma go kgola ditoro tša gago? Bošego bja go feta ke lorile ke eya ntlong ya Mojuda wa mokgalabje. Kgole le fa. Ka morago ga sebešo, go be go na le letlotlo. Seo ke bošilo! Nka se ye go le tsoma!” Le semeetseng, Isaac a retologa gomme a itlhaganela go ya gae. Ge a fihla gae, a lebelela ka morago ga sebešo gomme a hwetša letlotlo.
Tsogo ya Jesu e hlaloša gore ga re a swanela go lebelela kgole go feta Modimo gore re be boemong bjo bo kgotsofatšago bja moya. Ga re a swanela go fetša bophelo bja rena re tsoma; re ka phela ka khutšo le kgotsofalo letšatši le letšatši. Jesu o beile letlotlo le bohlokwa kudu la bophelo dipelong tša rena. Re swanetše go le tsoma fao e se mafelong a mangwe.
Se ke se Dafida a bolelago ka sona go Pesalome 131. O re o nyaka go ba le Modimo, go etša lesea le le tshwešitšwego letswele difarong tša mmalo! O ka ba o bone seo goba o itemogetše sona – ga go na selo se se nago le khutšo le kgotsofalo bjalo ka tlhagišo ya sefahlego sa lesea matsogong a mmalo. Ge le le matsogong a mmalo, le na le khutšo! Motho yo a le kukilego o na le dilo ka moka tše a di nyakago bophelong. Fao, le ikwa le bolokegile ka gobane le a tseba gore le a hlokomelwa. Ge o phela bogoneng bja Modimo, o tla ikwela khutšo e swango.
