Moya wo Mokgethwa – Letšatši la 16

Temana ya lehono e tšwa thwii go kgwekgwe ya bophelo bja Bokriste. Go tlo kgahliša go tseba gore batho ba bantši ba ka tswalanywa le yona semeetseng le gore ke ba ba kae bao ba naganago gore se se kwagala se sa tlwaelega.

Go boima go nagana ka moya o phelago mmeleng wo o hwilego! Ka letsogong le lengwe go kwagala gabotse go amogela gore ge e ba re Bakriste, re laolwa ke Moya wa Kriste wo o phelago ka gare go rena, eupša ka go le lengwe, re tseba boemo bjo gantši bo sa kgotsofatšego bja maphelo a rena, gomme re ka ikwa o ka re re phela go boemo bjo bo sa fetogego bja dithulano magareng ga tlhago ya sebe le Moya wo Mokgethwa.

Re a tseba gore Jesu o boditše barutiwa ba Gagwe go Lukase 9:23 gore, “Ge motho a nyaka go ba molatedi wa ka, a ikone, a ikemišetše go tlo tlaišwa bjalo ka nna, mme a ntatele”, eupša ga re tsebe ka dinako ka moka ka fao seo se diregago ka gona. Gabotse re swanetše go tlogela go ineela le go thibela diphošo tše di tlago gabonolo go motho wa rena wa tlhago, mmele. Re swanetše go lahla dilo tše di lego kgahlanong le bogona bja Moya wo Mokgethwa ka go rena. Go Baefeso 5:1, o ba kgothaletša go ba “baekiši ba Modimo”, Paulose o ba nea lenaneo la dilo tše re swanetšego go di efoga: bofebe, go se hlweke, megabaru, dihlabišadihlong, le dipolelo tša bošilo (Baefeso 5:3-4). Se ga se phele se le bonolo, ka ge dilo tše dingwe di thomile gannyane, gomme bjale ke mekgwa. Lega go le bjalo, re swanetše go iphetleka, ka thušo ya Moya, le go lekola ka fao re kago e fediša. Go ka ba boima, a re tieng maatla ka gobane “Tšohle ke di kgona ka maatla ao Kriste a mphago ona” (Bafilipi 4:13) gomme go fihlelela se go tla tliša lethabo le le mpsha le tokologo.

Go tloga ka nako ye re tshephago Modimo ka phološo le go itemogela mohlolo wa Moya wa Gagwe wo o phelago ka go rena, re kgona go hwa go rena le go itemogela thušo ya Gagwe dikarolong ka moka tša maphelo a rena. Moya wa Gagwe o tla re thuša go kwešiša Bibele le go diragatša melao ya Gagwe; ka thapelo le go rarolleng mathata re tla lemoga thušo ya Gagwe; re tla thoma go lemoga lentšu la Gagwe le go matlafatšwa go mo hlankela le go dira thato ya Gagwe; re tlo utolla dineo tše di tlago re thuša go aga ba bangwe le go tšweletša ka Kerekeng, bjalo ka ge Paulose a hlaloša go Baefeso: “… a direla gore badumedi ba itokišetše modiro wo ba swanetšego go o direla Modimo, e lego go aga mmele wa Kriste, gore bohle re be re tle re be ba tee tumelong le tsebong ya rena ya go tseba Morwa wa Modimo, re be ba ba budulego go tša tumelo bjalo ka Kriste” (Baefeso 4:12-13).

Ge re bea dipelo tša rena go lateleng Jesu Kriste gomme re na le Moya wo o phelago ka gare ga rena, re tla fenya.