Moya wo Mokgethwa – Letšatši la 1

Ke na le lethabo la go ngwala ka Moya wo Mokgethwa nakong ya Pentekoste, ge Kereke e keteka tšhollelo ya Moya wo Mokgethwa go badumedi ba pele, le tswalo ya Kereke. Seo e bile tiragalo e makatšago! Morago ga ge Jesu a rotogetše legodimong gomma baapostola le basadi ba le lefelong le tee, Moya wo Mokgethwa wa theogela go bona, bjalo ka ge Jesu a tshephešitše: “Le se ke la tloga Jerusalema, le letele se Tate a le holofeditšego sona … Lena le tla maatlafatšwa ge Moya wo Mokgethwa o theogela go lena, la ba dihlatse tša ka Jerusalema le nageng yohle ya Judea le ya Samaria, le go fihla magomong a lefase” (Ditiro 1:4,8).

Na re swanetše go makala gore Moya wo Mokgethwa o bonagetše bjalo ka “maleme a dikgabo tša mollo” le go ba kgontšha go bolela ka maleme a batho bao be bego ba le fao go tšwa dinageng tša go fapanafapana? Ba be ba tla ba hlatsetša bjang? Bao ba bego ba theeleditše ba ile ba makala kudu ge yo mongwe le yo mongwe wa bona a ekwa barutiwa bao ba bego ba fetošitšwe ka sebete ba tsebagatša ditumišo tša Modimo le go rera taba ye botse ya Jesu ka maleme a bona. Mang le mang yo a lekilego go ithuta leleme le šele o be a tla tseba gore se ga se tiragalo ya letšatši le letšatši. Moya wo Mokgethwa o tšwela pele go matlafatša Kereke, gomme Pentakoste e sa ketekwa ka lethabo lehono.

Go nyaka ga rena Modimo, ka boemo bja rena bja go fokola bja batho, re hloka go tseba Moya wo Mokgethwa ka noši le go ba le tswalano gape re hloka go itemogela maatla a Gagwe maphelong a rena, gore, bjalo ka baapostola, re ka fetošwa gomme re be le sebete le go obamela Kriste. Ga go re thuše go ba le tsebo ya go phela ga Gagwe, goba go hlompha maatla a Gagwe maphelong a batho ba re ba tsebago, goba gaešita le go rata go tseba gore ka Mang ge e le gabotse; re hloka go itemogela Yena dinakong ka moka tša bophelo, ka gobane ke Yena yo a fetošago maphelo a rena go tloga go a tlhago go ba a maatla a phagametšego tlhago.

Barutiwa ba ka ba ba sa fihla kgole ka boemo bja bona bja tlhago, le ge ba be ba itemogetše Jesu ka noši, eupša ka maatla a Moya wo Mokgethwa go be go se na selo se se bego se tla ba thibela: e se bofokodi bja bona, goba baetapele ba bona ba sedumedi, goba babuši ba dipolitiki – ge e le gabotse le ge e be e le letšhogo la lehu. Ge Stefane, moapostola, a kgatlwa ka maswika ka morago ga ditatofatšo tša maaka tša thogako, Ditiro 6:11-15 e re: “Bohle ba ba bego ba le moo Kgorongkgolo ba rile ba sa mo tomoletše mahlo bjalo ba bona sefahlego sa gagwe se swana le sa morongwa.” Ka kgonthe Moya wo Mokgethwa ke maatla a Modimo a fetošago batho ba Gagwe, Kereke ya Gagwe le lefase.

Gomme ka go realo, Kereke a belegwe maatleng a Gagwe.