Tema ya mehlare ka Bibeleng – Letšatši la 3

Moalmone ke mohlare wa marega wa matlakala a makukuno a matelele. Kua Israele mahlogedi a wona a be a tšwile ka mo go feletšego mafelelong a Pherekgong goba mathomong a Hlakola; a tsebatša seruthwane.

Taba ya boprista bja Israele e be e baka dingangišano tše ntši magareng ga Baisraele – Korage le balatedi ba gagwe ba be ba sa hlomphe boetapele bja Moshe goba go lemoga boprista bja Arone. Selo se šoro se be se hloka go dirwa go fediša go ngongorega ga Baisraele. Go Numeri 17, Morena o boditše Moshe go tšea mapara go tšwa go kgoro ye nngwe le ye nngwe ya tše 12 tša Israele, a ngwale leina go lepara le lengwe le le lengwe, a bee mapara ao felo mo gokgethwa, gomme o a tlogela fao bošego ka moka. Mesong, ke fela lepara la Arone la moalmone la kgoro ya Lefi leo e bilego lekala le le phelago le hlogile, le na le dialmone. Go be go se na pelaelo gore Arone e be e le monna wa maleba go mošomo.

Se sengwe le se sengwe mohlolong wo se ka godimo ga maatla a tlhago. Go bona seripa sa kota seo se ripilwego kgale go tšwa thitong ya sona ntle le lekwati goba monola, se tswaleletšwe lefelong le le omilego bošego bjo tee, se phela, ga go a tlogela kgonono dikgopolong tša Baisraele gore Modimo o tsene ditaba gare.

Ka dinako tše dingwe re ka ikwela bjalo ka le tee la mapara ao – a omile ntle le bophelo. Ga go boima go Morena wa rena go ka dira gore lepara la rena le khukhuše, le hloge le go tšweletša ka bošego bjo tee, ge rena re ikemišeditše go hlankela! Potšišo ke gore: re ikemišeditše?