Tema ya mehlare ka Bibeleng – Letšatši la 15

Go o o lebelela, mohlare wa borokhu wa Gileade ga se mohlare wa go kgahliša kudu. Ke mohlare o monnyane, wa matlakala a mannyane le matšoba a mannyane wo o bego o bjalwa Thabeng ya Geliade. Eupša ka selemo, mohlare borokhu wa Gileade o be o ntšha borokhu bjo bjalo ka jusi bja monkgo o monate. Go tšwa go jusi ye, makhura a ntšhwa a a nago le maatla a go fodiša ao a bego a tsebja lefaseng ka bophara. Tshepetšo ya go ntšha makhura e be e le sephiri se segolo gomme makhura a be a išwa mabenkeleng ka tlase ga tšhireletšo e maatla. Ge baepi ba marope ba epa Gileade, ba hweditše tora moo makhura a bego e hlotlwa gona. Tora e be e matlafaditšwe kudu moo e lego gore moepa marope yo a bego a laola go epa a bolela gore, “Lefelo le le agilwe bjalo ka  Fort Knox.” Makhura a be a le bohlokwa kudu gomme ka dinako tše dingwe a šomišwa bjalo ka potoro. Dikoloyana tše di bego di nameditše Josefa go mo iša bokgobeng kua Egepeta di be di rwele marokhu (Genese 37:25).

Borokhu bjo bjo bobotse bja tlhago ke seswantšho se sebotse sa Jesu — borokhu bja Gileade, mofodiši yo mogolo, sehlare sa sebe le lebolela la Sathane la lehu.

Ge Jesu a hlokafala, Sathane a dumela gore o fentše, eupša ge e le gabotse, o lomile fela serethe sa Morwa wa Modimo (1 Bakorinte 15:54-57). Modimo a tsoša Jesu bahung ka maatla a magolo (Baroma 1:4). Ka go fenya lebolela la lehu, Jesu e bile sehlare goba borokhu bjo bo fodišago meoya ya rena ye e babjago ka lebaka la sebe le go re šireletša. Ke mohlare wa bophelo o matlakala a wona e lego a “go fodiša lefase” (Kutollo 22:2).