Re bolokegile go Jesu Kriste – Letšatši la 17

Ka Krisemose, ka matšatši a matswalo le ka meletlo ya go ikgetha, re ipshina ka go nea le go amogela dimpho. Ke tsela ya rena ya go bontšha lerato le tebogo go ba bangwe. Le ge go le bjalo, mopesalome o na le bothata. Morago ga go ngwala ditšhegofatšo tše ntši tše a di amogetšego go tšwa go Morena, o botšiša potšišo, “Ke tla mo leboga ka eng Morena ka lebaka la tšohle tše botse tše a ntiretšego tšona?”

Ke potšišo e botse. Ke e re swanetšego go ipotšiša yona. Ke eng se re ka lebogago Morena ka sona ka lebaka la ditšhegofatšo ka moka tše a re diretšego tšona? Ge re ka nagwala lenaneo la ditšhegofatšo tše re di amogetšego, lenaneo la yo mongwe le yo mongwe wa rena le ka se swane. Gobane Morena ke Mophološi wa motho o swaragana le yo mongwe le yo mongwe wa rena ka noši.

Tše dingwe tša ditšhegofatšo, bjalo ka Tate wa magodimong yo a nago le mogau, wa go loka le kwelobohloko, le go theeletša dithapelo tša rena, Mophološi yo a gafilego bophelo bja gagwe ka lebaka la rena, Moya wo Mokgethwa wo o re maatlafatšago le go re hlohleletša, di tla ba mananeong a rena.

Mananeo a rena a tla thoma go fapana ge re e tla go maemo a rena. Le ge go le bjalo, mafelelong, ka moka re tla be re ipotšiša potšišo e tee, “Morena ke tla mo leboga bjang ka lebaka la tšohle tše a ntiretšego tšona?”

Re ka nea Modimo lerato le le feletšego: “O rate Morena Modimo wa gago ka pelo ya gago ka moka, le ka moya wa gago ka moka, le ka tlhaologanyo ya gago ka moka.” Mateu 22:37

Re ka mmontšha lerato la nnete, ka go obamela: “Ge le nthata, le tla phetha melao ya ka.” Johanese 14:15

Re ka bontšha lerato la rena ka tumelo ya rena le go mo tshepha ka mo go feletšego: “Gape ge motho a se na tumelo a ka se kgahle Modimo, gobane yo a tlago go Modimo o swanetše go ba le tumelo ya go re Modimo o gona, le go re o putsa ba ba mo nyakago.” Baheberu 11:6

Mohlomongwe, mpho e kaonekaone ye re ka neago Modimo ke go phela maphelo a bjalo gore letšatši le lengwe o tla re amogela ka mantšu, “O dirile gabotse, mohlanka yo a lokilego yo a botegago! O ile wa hlokomela tše dinnyane ka potego. Tsena ka gae o tle o ipshine le nna.”