Thapelo – Letšatši la 5

Se e swanetše go ba e le thapelo ya go se tlwaelege ye e sa lego ya rapelwa, e se gore e be e le thapelo ya mohlala, eupša ka gobane e rapetšwe go tšwa bodibeng bja lewatle ka gare ga mpa ya hlapi ye kgolo. Seo se swana le go rapela o le ka gare ga kelelatšhila ya go nkga ya leswiswi le lesoleso ye e se nago tsela ya go phonyokga!

Ka moka re a tseba gore Jona e be e se mohlala wo mobotse wa moprofeta. Ge e le gabotse, ga se gantši ke ekwa thero ye botse ka Jona. Ga go yo a ka phegang gore Jona o be a na le manganga, a sa kwe le go swaya ba bangwe diphošo. Lega go le bjalo thapelo ya Jona go kgaolo ya 2 ke thapelo ya mohlala ye re ka e ekišago. Ke ka lebaka la eng? Ka lebaka la poledišano ya gagwe ya nnete le Modimo.

Sa pele, Jona o hlaloša botebo bja manyami a gagwe. O hlaloša letšhogo la go nwelela, le le khupeditšwego ke maphoto le leswiswi. A ikwa a lahlilwe ke Modimo (temana ya 4). Gape a ipolela gore o ipakatše mathata a gagwe ka noši (temana ya 8). Ekaba ponagatšo ya mohuta woo pele ga Modimo ga se kgato ya pele ya phološo?

Jona gape a tlatša thapelo ya gagwe ka Lengwalo le lekgethwa. A kgetha dikafoko go tšwa go dipesalome tša go fapanafapana tše 14 le mantšu a baprofeta ba bangwe (o be mogongwe a be a leka go lokiša dilo le Modimo!). Go ikgopotša ga gagwe ditemana tšeo go mo gopoditše gore Modimo o na le kgaugelo. Modimo o bile le tokelo ya go lahla moprofeta wa gagwe yo a fapogilego tseleng, “lega go le bjalo” Jona a re: “A nke ke buše ke iše mahlo kua Ntlongkgethwa yago” – lefelo la poelano le tebalelo (temana ya 4). Jona yo mogolo o be a sa tsebe gore o tlo phela goba go hwa, eupša mantšu a gagwe a bontšha boitshepo bjo Modimo a mo filego.

Gantši re ikhwetša ka gare ga lefelo la leswiswi re sa bona tsela ya go tšwa. Yeo ke nako ya gore re ikgopotše gore Modimo o a botega le go ba le nnete gomme o a re bona go sa šetšwe mo re ka bago re nyaka go ikuta gona.