Thapelo – Letšatši la 15

Re phela lefaseng la “go ipušeletša”. Re bona se thelebišeneng, re se bona go sediko sa dikgaruru ditšhabeng tša gaborena, magaeng a rena le ditswalanong tša rena le ba bangwe. Ge re kgopela Modimo gore a re lebalele ka ge re lebaletše ba bangwe, re ra go reng? Ekaba re re Modimo o swanetše go re lebalela dibe tša rena ka gore re lebalela dibe tše di dirilwego go rena ke batho ba bangwe?

Go direga eng ge re palela ke go lebalela motho yo mongwe? Ekaba seo se ra gore Modimo a ka se re lebalele? Se go bonala eke ke sona se kgopelo ye Thapelong ya Morena e se bolelago gomme mo e ka bago go gatelela ntlha, Jesu o bolela ka go lebanya ka morago ga go ruta barutiwa ba gagwe Thapelo ye: “Ge le lebalela ba bangwe diphošo tše ba le šitelago ka tšona, Tatagolena wa legodimong le yena o tla le lebalela tša lena. Eupša ge le sa lebalele ba bangwe diphošo tša bona, gona le Tatagolena a ka se le lebalele tša lena” (Mateu 6:14-15).

Ge Jesu a be a ruta Thapelo ye, o bone gabotse gore bao ba sa ithutego go lesa bohloko bja bona le lehloyo ba tla jewa ke tšona. Ga go direge go fihlela re lesa lehloyo le tumo ya go itefeletša mo re ka bulegelago go kgwatho ya tebalelo le phodišo ya Modimo.