Thapelo – Letšatši la 10

Ke kae legodimong? Gantši re nagana ka legodimo go ba “kua godimo” go gongwe mola ka boikwelo bja tlhago re šupa lefaufau. Lega go le bjalo, ge re re “Tatewešo wa magodimong” ga re rake Modimo go dikhutlo tša ka ntle tša lefase; re lemoga bogona bja gagwe, go dula ga gagwe magareng ga rena le lefaseng la rena, maphelong a rena, maratong a rena le dipelong tša rena.

Jesu gantši o bolela ka mmušo wa Modimo wo o lego magareng ga rena gomme o se kgole lefelong la boikgopolelo. Legodimong ke moo Modimo a lego gona. Moo lerato la gagwe le khutšo di nago le tutuetšo e kgolo. Moo go nago le lerato le toko go na le senei se sennyane sa legodimo. Moo go nago le toko, botho le lerato re ka bona legodimo le go kgoma lefelo la bodulo la Modimo.

Lega go le bjalo, se ga se re gore Modimo o hwetšwa fela ka gare ga lethabo le tlhalalo – ka mehla o mošomong le gaešita dinakong tša rena tše thata, a thekga le go hlabolla, a nea bophelo le khutšo. Bjalo ka ge Mokgethwa Paulose a bolela: “Gobane ke tseba ntle le pelaelo gore ga go se se kago re aroganya le Modimo yo a re ratago: ga se lehu goba bophelo, ga se barongwa goba magoši a semoya goba balaodi ba semoya, goba dilo tša gonabjale goba tša ka moso, ga se sa kua godimo sebakabakeng, goba sa kua fase bodulabahu – gare ga tšohle tše di hlodilwego ga go se se kago re aroganya le Modimo yo a re ratago ka Kriste Jesu, Morena wa rena” (Baroma 8:38-39).