Modimo wa lerato, kholofelo, kgaugelo le khutšo – Letšatši la 17

Eupša morongwa yoo a re go bona: “Le se ke la tšhoga! Ke tlile go le botša taba ye botse ye e tlago thabiša setšhaba ka moka kudu. Lehono kua motseng wa Dafida le tswaletšwe Mophološi yo e lego Kriste Morena.” Lukase 2:10-11

Mo gohle mekerong ya ditaba, re a gopotšwa gore nako e a fela ya gore re yo reka dilo tša Krisemose. Dipontšho mafestereng a mabenkele ka moka di leka go ba kaone le go kgahliša kudu go feta lebenkele la kgauswi ka phadišano ya go tanya šedi ya rena. Ka gare ga dipukutšatši tša rena ke mananeo a matelele a dilo tše re di hlokago pele matšatši a go ikhutša a Krisemose a fihla.

Rena, bjalo ka Bakriste re itokišetša Advente. Advente e tšwa go lentšu la Selatine adventus, le le hlalošago kopano goba go fihla gomme ke go re matswalo a Jesu Kriste. Morero wa dibeke tše nne tša Advente le diSontaga tše nne pele ga Krisemose, ke go lokišetša menagano ya rena le dipelo go keteka matswalo a Kriste. Tokišetšo ye e na le kgatelelo ye e fapanego kudu go e na le ye e begago ke mekero ya ditaba le mafelo a mabenkele ka nako ya setu le go nagana; nako ya go beakanya dikgopolo tša rena mabapi le tlhalošo ya go tla ga Mesia; nako ya go kopanela le badumedi ba bangwe go kgotsa ka bokgole bja lerato la Kriste.

A re lekeng, ka gare ga tlhakatlhakano ye, go beela thoko nako ya go iketla le go lokiša dipelo tša rena re di lokišetša Krisemose. Go sego bjalo, go tla no ba bjalo ka mengwaga ye mengwe – leemaema le legolo go fihlela re dula fase go khutša, re lapile, dijong tša Krisemose. A re direng nako ya lapa ka magaeng a rena, nako ya go iketla le go naganišiša, nako ya tsepelelo e mpsha le poledišano e kwagalago. Nako moo kgatelelo e lego go sehlabelo sa Kriste sa lerato le nako moo re tsepelelago go bontšha ba bangwe mohuta wo wa lerato.