Modimo wa lerato, kholofelo, kgaugelo le khutšo – Letšatši la 15

“Ke nna modiša wa go loka. Gomme modiša wa go loka o ikgafela go hwela dinku tša gagwe. Mothwalwa yena, yo e sego modiša ebile e se mong wa dinku, o re go bona phiri e etla a tlogele dinku, a tšhabe, gomme phiri e di sware e di phatlalatše. Mothwalwa o a tšhaba ka gobane e le mothwalwa, a se na taba le dinku.” Johanese 10:11-13

Gaešita le ka go Testamente ye Tala, seswantšho sa modiša le dinku tša gagwe se tšwelela gantši. Mohlomongwe ka gobane ke selo se se bego se tlwaelegile go batho ba nako yeo, ba be ba kwešiša seswantšho se gabotse. Jesaya o tiišetša tlhokomelo ya Morena go batho ba gagwe ka go ba botša gore, “O tla fudiša mohlape wa gagwe boka modiša; o tla kgoboketša dikwanyana, a di kuka, a di gokarela, a eta bommagotšona pele a iketlile.” (Jesaya 40:11)

Thesaurase e nea mahlološetšagotee a latelago go mantšu a tlhokomelo le go hlokomela: go hlokomela, thlokomelo, go diša, go abela, go šireletša, go setša le go leta. Re hlokomelwa ke Modimo; o a re šetša, o netefatša gore ga re mo lahlegele gomme o šikara boikarabelo go rena.

Ye ke kgopolo e botse, ya gore motho yo mongwe o ikemišeditše go šikara boikarabelo go nna! Mehleng ye, moo re gapeletšega go laola dilo le go dira ka go ikema, ge e le gabotse go na le motho yo a ikemišeditšego go šikara boikarabelo go nna. Kgopolo ye e ntira gore ke ikwe o ka re nka hemela godimo gomme ka ineela.

Go Pesalome ye e tsebjago kudu go Dipesalome, Mopesalome o ngwetše gore: “Morena ke modiši wa ka; O nkhutšiša mafulong a matala” (Pesalome 23:1-2). Pesalome ye e hlaloša gabotse gore modiši yo ga a hlokomele fela mohlape wa gagwe, eupša o re nea tše ntši le go re šireletša.

Gomme, Kriste o feleletša seswantšho se ka go Testamente ye Mpsha ge a tiišetša barutiwa ba gagwe gore ke modiši wa go loka le gore o a ba tseba … go feta le ka godimo ga se, gore o tla gafa bophelo bja gagwe ka lebaka la dinku tša gagwe!

Seo ke se Modiši wa go Loka a re diretšego sona!