Modimo wa lerato, kholofelo, kgaugelo le khutšo – Letšatši la 12

Jesu a re: “Ke nna senkgwa seo sa go fa motho bophelo bjo bo sa felego. Yo a tlago go nna a ka se tsoge a swerwe ke tlala; yo a dumelago go nna a ka se tsoge a nyorilwe.” Johanese 6:35

Bjale ka ge Modimo a itsebišitše go rena ka maina a gagwe a fapafapanego ka Bibeleng, ka gona Jesu o šomišitše diswantšho tša letšatši le letšatši le dilo tše batho ba bego ba di tseba nakong ya bodiredi bja gagwe lefaseng. O itsebišitše le yo a lego yena go bona ka methofatšo ye bonolo gore ba kgone go kwešiša.

Mo, Kriste, o šomiša dinyakwa tša rena tša nama, tlala le lenyora. O ipapetša le senkgwa sa bophelo le mothopo wo go wona go tšwago meetse.

Go ya pele mo go kgaolo ye re bala gore, “Borakgolokhukhu ba lena ba be ba eja manna kua lešokeng, le ge go le bjalo ba ile ba hwa. Senkgwa se se theogilego legodimong gore ge motho a se ja a se sa hwa sese: Ke nna sona senkgwa seo sa go phediša, se se theogilego legodimong. Ge motho a eja senkgwa se o tla phela go ya go ile. Senkgwa se ke tlago mo fa sona ke nama ya ka ye ke e fago batho ba lefase, gore ba phelele sa ruri.” (Johanese 6:49-51)

Ye ke taletšo ye e bulegilego go bohle bao ba swerego ke tlala le ba nyorilwego. “Mang le mang yo a nwago meetse a o nyorwa gape, fela yo a nwago meetse a nna ke mo fago ona a ka se tsoge a nyorilwe gape. Meetse a ke tlago mo fa ona e tla ba mothopo mo go yena wa go seloga meetse a go mo fa bophelo bjo bo sa felego.” (Johanese 4:13-14)

E re netefaletša kgotsofalo ya bophelo ka moka. Gomme gopola gore, tabeng ye, bophelo ke bjo bo sa felego!

Ka morago, nakong ya Selalelo sa pele, Jesu o šomišitše senkgwa bjalo ka seka se se bonwago, segopotšo sa gore re na le bophelo bjo bo sa felego!