Modimo bjalo ka mothopo wa kholofelo – Letšatši la 8

Puku ya Sofonia e na le dikgaolo tše tharo fela. Tabataba e bohlokwa ke Letšatši la Kahlolo ge mollo wa kgalefo ya Modimo o tla tšhuma tlholo ye e dirago dibe (Sofonia 1:1-2; 3:8).

Sofonia o ahlola go hloka toka ga Israele le go se botege ga sedumedi. O ngwala dibe tše nne: go khunamela medingwana (1:4-5), go kgelogela le go se dumele go Modimo (1:6), go latela ditlwaedi di šele (1:8) ditiro tše di sa lokago tša boganka le bomenemene (1:9).

Sofonia ga a kwanantšhe ka go lemoša gore ka Letšatši la Kahlolo bao ba se sa dumelago gore Modimo o bohlokwa lefaseng la bona, gammogo le ditšhaba di šele tšeo di gomaretšego ditumelo tša bona, ba tla fedišwa.

O ba lemoša gore e tla ba letšatši la poifo, masetlapelo a lefase mo lefase ka moka le tlago tšhungwa (1:18).

Gomme Sofonia o nea pakane ya kholofelo: “Nyakišišang thato ya Morena, lena baikokobetši bohle ba mo nageng ba le phethago ditaelo tša gagwe. Dirang tše di lokilego gomme le ikokobetše pele ga Morena. Mohlomongwe le ka phephišwa kotlo ka letšatši la kgalefo ya gagwe” (2:3).

O bitša batho ba gagwe go nyaka mogau wa Modimo ka go ba le kopano ya go itima dijo le go fetoga go bontšha boikokobetšo, potego le go tshepha Morena. Ba gana kgopelo ya Sofonia (3:2).

Letšatši la Kahlolo le ka se thibelwe goba go tšhabelwa.

Mantšu a Morena wa rena Jesu Kriste ke a mabotse le go netefaletša bohle bao ba mo latelago: “Ruri, ruri, ke le botša gore yo a theeletšago tše ke di bolelago mme a dumela go yo a nthomilego, o šetše a na le bophelo bjo bo sa felego. A ka se tšwewe, ka gore o šetše a tlogetše tsela ya go ya lehung, o swere ya go ya bophelong bjo bo sa felego. Ruri, ruri, ke le botša gore nako e etla, ebile nka re e tlile, ya gore bahu ba kwe lentšu la Morwa wa Modimo, gomme ba ba le theeletšago ba tla phela. Bjalo ka ge Tate a na le maatla a go phediša, ka wona mokgwa wo mobjalo o file le Morwagwe ona maatla a go phediša. O mo file le a go ahlola, ka ge e le yena Morwamotho” (Johanese 5:24-27).

Re hlankela Mophološi yo mmotse, pakane ya rena e e phadimago ya kholofelo.