Mo tumiše – Letšatši la 15

Go bonolo go sola ge o sa dire selo ka bowena. Re itemogela seo lefapheng le lengwe le le lengwe: dikeletšo tše di goeletšwago go tšwa mo go dulago babogedi, ditsebi tše di dutšego dipankeng ka kerekeng, ditsholo ka fao dilo di kago dirwa bokaone ka gona, bjalobjalo.

Paulose o itemogetše karabelo e bjalo go tšwa go kereke ya Korinte. Baruti ba baswa ba go ba le “dikutollo tše diswa” ka kerekeng, gape le se se bitšwago “phatša nameng”, di tlišitše dipelaelo ka kerekeng mabapi le kgonthe ya pitšo ya Paulose bjalo ka moapostola. Dipotšišo tša bona ge e le gabotse di hlatseditše gore Kriste ka nnete o be a bolela ka Paulose (2 Bakorinte 13:3).

Karabo ya Paulose go bona ke e kwagalago kudu: Bophelo bja gagwe ga bo a ithekga go bofokodi bja gagwe goba maatla a gagwe. Lega go le bjalo, ka tumelo go Kriste le bokgoni bja gagwe, selo se makatšago se a direga – ka gobane maatla a Modimo a tiile kudu go bao ba fokolago (2 Bakorinte 12:9). Paulose o phela, o rata gape o hlankela ka tswalano ya gagwe le Kriste ka gare go yena. O rata Bakorinte, gomme o rapela Modimo gore ba se dire se sempe, eupša ba dire se se lokilego (2 Bakorinte 13:9).

Go Paulose, ga se ka pono ya Bakorinte ka yena, eupša ka boitshwaro bja bona – mohuta wa boitshwaro bjo bo swanetšego batho ba ba hlatsetšago tumelo ya bona go Jesu Kriste. Potšišo pelong ya gagwe ke ge e ba Bakorinte ba phela tswalanong ya kgonthe le Kriste. Ke ka lebaka le a kgopelago: “Itekoleng, le itebeledišiše, le bone ge eba le phela ka tumelo ya lena. Na ga le tsebe gore Kriste o phela ka dipelong tša lena? Ge eba ga le tsebe gona le paletšwe” (2 Bakorinte 13:5).

Bjalo ka badumedi re na le go kopana le batho ba ba botšišago kgonthe ya tumelo ya rena, ba tliša dipelaelo ka pitšo ya rena go Kriste, goba ka mabarebare a maaka ba senya botumo bja rena. Dinakong tše bjalo re ikwa re se na maatla, re fokola gomme re hlaselega gabonolo, gomme re sa tsebe gore re ka emeletšana bjang le mabarebare ao. Ke ka nako ye Kriste ka gare ga rena ka maatla a re matlafatša, eupša re swanetše re eme re tie tumelong ya rena gape re tsebe go re re eme kae le Kriste.

Kgafetšakgafetša re swanetše go hlahloba maemo a tumelo ya rena le go araba dipotšišo ka botshephegi. Ekaba re phela bophelo bjo bo theilwego go tumelo ya rena? Na re dumela go kholofetšo ya Morena wa rena Jesu Kriste ya gore yena le Tate ba phela ka gare go rena? Ekaba re phela ka temogo ye e golago ya bogona bja Kriste le maatla maphelong a rena, gomme re a nyora ka mehla morago ga fao? “Ee” ya go ba le kgonono goba ya go se dumele ka pelo ka moka e swanetše go tliša boikgafo bja go lokiša maemo a tumelo ya rena.