Mathomo a maswa – Letšatši la 17

Go tloga bjaneng, Robert o be a kgona kudu kgwele ya maoto. Ka gona, e be e se semaka ge a be a kgethwa go ba karolo ya sehlopha sa kgwele ya maoto sa maemo a godimo morago ga go phetha dithuto tša marematlou. Le ge bophelo bja gagwe bo be bo bonala eke bo phethagetše, ka ge kgafetšakgafetša a tšea diswantšho le go saenela bathekgi diothokrafo, tumo ya gagwe e kgolo e be e le go kwa tatagwe a re o a mo rata le go mo amogela.

Tatago Robert e be e le setagwa gomme temalelo ya gagwe e bile sebaki sa tswalano ye e robegilego magareng ga bona. A duma gore tatagwe a ka, bjalo ka botate ba dibapadi tše dingwe, tla dipapading tša gagwe tša kgwele ya maoto gomme a be fao, go mo hlohleletša le go mo thekga, eupša seo sa se direge.

Morago ga mošomo wa gagwe wa go ba sebapadi sa kgwele ya maoto, Robert o bile le pitšo ya go ba moruti wa nako ka moka. A ya sekolong sa boruti, a phetha dithuto tša gagwe gomme le mosadi wa gagwe yo mobotse, ba thoma kereke ye e atlegilego. Le ge go le bjalo, tatagwe o be a se gona bophelong bja gagwe.

Morago ga go amogela ditaba tša gore tatagwe o hlasetše ke pelo, Robert a kitimela bookelong. Ge a tsena ka phapošing ya tšhoganetšo, tatagwe ka nnete o be a fokola gape a hlakahlakane. Go se nene, o be a nagana gore Robert ke ngaka. Ka seatla se se fokolago, a kgwatha letsogo la Robert gomme a bolela le yena a sebaseba. “Ngaka, naa ke go boditše ka morwa wa ka, Robert? Ke itatswa ka yena. O be a se fela sebapadi se bohlale, eupša ga bjale ke moruti wa kereke e kgolo. Ngaka, ke duma eke o ka kopana le morwa wa ka. Ke na le nnete ya gore o tla mo rata kudu.”

Lekga la pele mengwageng ye 35, Robert o kwele mantšu ao a bego a hlologela go ka a kwa. Ke fela morago, fao a hweditšego gore tatagwe o bile gona papading ye nngwe le ye nngwe ye a e bapetšego, eupša ka lebaka la botumo bja gagwe bja go ba setagwa le go se nyake go tlontlolla Robert, o be a ema kgojana.

Ke neng la bofelo moo o boditšego batho ba o ba ratago gore o a ba rata le go ba thabela? Le ge batswadi ba gago ba ka ba ba go nyamišitše ka go se go botše gore ba a go rata le go go thabela, Tatago wa Magodimong a ka se dire seo! Theeletša mantšu go 1 Johanese 4:7: “Barategi, a re rataneng, gobane lerato le tšwa go Modimo. Yo a nago le lerato ke ngwana wa Modimo gomme o tseba Modimo.”

Se lete mengwaga ye 35 pele o botša bao o ba ratago gore o a ba rata. Dira seo lehono. Selemo e tla be e le ngwagola! Modimo a go šegofatše.