Khomotšo go tšwa Lentšung – Letšatši 4

₁Nna Morena ke a mo rata, gobane ge ke mo llela o a nkwa.

₂Ke tla no dula ke mo rapela ge ke sa phela,

ka gobane o ntlhwaela tsebe.

₃Ke be ke rarilwe ke ditlemo tša lehu,

ke dikaneditšwe ke poifo ya bodulabahu,

ke tlaletšwe ke bile ke gakanegile.

₄Ke mo ke lletšego Morena ka re:

“Ke a go rapela, Morena, ntlhakodiše!”

₅Morena ke Mogaugedi ebile ke Moloki,

Modimo wa rena ke wa lešoko.

₆Morena o babalela ba ba sa kgonego go ithuša;

nna o mphološitše ke šetše ke itlhobogile.

₁Modimo wa ka, Modimo wa ka,

o ntlogeletšeng?

Ke golola ke nyaka thušo,

eupša o no fela o le kgole le nna.

₂Mosegare ke hlwa ke go llela,

Modimo wa ka,

eupša ga o nkarabe;

le bošego ke lala ke go llela,

eupša khomotšo ga ke e hwetše,

₃etšwe o dutše sa borena o le Mokgethwa,

moo go kwalago direto tša Israele.

₂₄Ga a lahle motlaišegi,

ga a mo hlokomologe ditlaišegong tša gagwe.

Ga a mo furalele, fela ge a mo llela o a mo thuša.”

₂₅Phuthegong ka moka ke tla go tumiša ka lebaka la tše o di dirilego;

ke tla go direla dihlabelo tše ke go tshephišitšego tšona mahlong a ba ba go khunamelago.

₁₃₇Wena o lokile, Morena,

le dikahlolo tša gago ke tšona.

₁₃₈Ditaelo tša gago di lokile,

di tshephagala e le ruri.

₁₃₉Ke a selekega

ka ge manaba a ka a hlokomologa tše o di boletšego.

₁₄₀O tshephagala ruri go se o nkholofeditšego sona,

gomme nna, mohlanka wa gago,

ke a se rata.

₁₄₁Nna ga ke selo, ke a nyatšega,

fela ditaelo tša gago ga ke di hlokomologe.

₁₄₂Toka ya gago ke ya go ya go ile,

le melao ya gago ke ya therešo.

₁₄₃Ke wetšwe ke tlalelo le kgakanego,

fela ke thabišwa ke melao ya gago.

₁₄₄Taelo tša gago di loketše sa ruri;

nkgontšhe go di kwešiša,

gomme ke tla phela.

₅Mo lebeleleng mme le tla ela difahlego,

la se lewe ke dihlong.

₆Nna ke mohlaki yo ke bego ke bitša Morena, mme a nkwa,

a ntlhakodiša ditlaišegong tša ka tšohle.

₇Bao ba obamelago Morena ba hlapetšwa ke morongwa wa gagwe gabotse,

mme o ba phološa kotsing.

₁₆Retologela go nna o nkgaugele,

gobane nna ke mmotlana ebile ke a hlaka.

₁₇Ntamolele ditlalelong tša ka,

o nntšhe mathateng.

₁₈Šetša mohlako le ditlaišego tša ka,

mme o ntebalele dibe tša ka ka moka.

₁₉Bona boati bja manaba a ka;

ba ntlhoile o šoro.

₂₀Ntšhireletše o mphološe;

o se ntese ke segwa ke batho,

gobane ke tšhabela go wena.

₂₁Anke go hloka bosodi ga ka le go loka ga ka go ntote,

gobane ke botile wena.

₂₂Hle, Modimo,

phološa setšhaba sa Israele ditlalelong tšohle tša sona!

₇Ntshekegele tsebe, Morena,

ge ke go llela,

nkgaugele o nkarabe!

₈Ke gopola taelo ya gago ye e rego:

“Tlaang le nkhunamele.”

Ka gona ke tletše go go khunamela,

wena Morena.

₉O se ke wa nkhutela, hle!

O se ke wa nthaka o nkgalefetše,

nna, mohlanka wa gago.

O hlwa o nthuša;

hle, se ntlogele, se ntahle,

wena Modimo, Mophološi wa ka!

₁₀Le ge tate le mme ba ka ntahla,

Morena yena o tla mpabalela.

₁₁Nthute ditsela tša gago, Morena,

mme o ntlhahle tseleng ya polokego,

gore manaba a ka a se atlege.

₁₂Hle, se nkgafele thatong ya manaba a ka,

gobane dihlatse tšeo tša maaka di nkemetše ka maoto,

di ntsošetša mpherefere.

₁₃Ge nkabe ke se ka dumela gore ke tla bona botho bja Morena

mo bophelong bjo nkabe ke hwile.

₁₄Bota Morena! O se ke wa tlalelwa!

Ee, bota Morena.

₁₀Mahloko a mphokoleditše bophelo,

mefegelo e nthipetše mengwaga.

Ke fokodišitšwe ke mohlako,

le marapo a ka a a opa.

₁₁Manaba a ka ka moka a a nnyatša,

gagolo ba e lego baagišani ba ka;

ba ba ntsebago ba a mpoifa;

ge ba mpona mekgotheng,

ba a ntšhaba.

₁₂Bohle ba itebadišitše nna mo nkego ke hwile;

ke bjalo ka selotsoko se se lahlilwego.

₁₃Ke kwa sehebehebe sa ba bantši ba ba ntikaneditšego mme se a ntšhoša.

Ba ntogela maano,

ba lakana go mpolaya.

₁₄Fela nna ke botile wena, Morena,

ke re: “O Modimo wa ka.”

₁Ntlhakodiše, hle, Modimo,

gobane meetse a mpoa ka megolo.

₂Ke sobelela tebetebeng ya leraga,

gomme ke hloka mo ke gatago gona.

Ke ka gare ga bodiba,

gomme ke gogotšwe ke mafula.

₃Ke lapišitšwe ke go lla,

le lentšu le hwile;

mahlo a ka a fifaditšwe ke go letela wena,

Modimo wa ka.

₁₄O ntlhakodiše,

ke se nanganele lerageng,

o ntamolele go ba ba ntlhoilego,

o ntlhakodiše madibeng a meetse.

₁₅A ke se gogolwe ke mafula;

ke se kwametšwe ke bodulabahu;

ke se ye molete mohlaelathupa.

₁₆Morena, ka ge o nthata ratirati,

o nkarabe;

o ntebelele ka lešoko la gago le legolo.

₁₇Se iphihlele nna,

mohlanka wa gago,

gobane ke mo tlalelong;

o se diege go nkaraba.

₁₈Mpatamele, o mphološe,

o ntlhakodiše manabeng a ka.

₂₉Ge e le nna,

ke a tlaišega, ke bohlokong;

nke o mphološe mme o ntšhireletše, Modimo.

₃₀Ke tla tumiša Modimo ka kopelo;

ke tla mo reta ka go mo leboga.

₃₁Seo ke se se tlago mo kgahla go feta go mo neela sehlabelo sa poo,

powana ya dinaka le ngatha tša mapharo.

₃₂Baikokobetši ge ba di bona ba tla thaba;

lena ba go khunamela Modimo,

tiang maatla.

₃₃Morena o theeletša bahloki,

le batho ba gagwe ba ba lego kgolegong ga a ba nyatše.

₃₄A legodimo le lefase di mo tumiše,

le mawatle le diphedi tšohle tše di lego ka go ona,

₃₅gobane Modimo o tla hlakodiša Sione,

a tsošološa metse ya Juda.

Setšhaba sa gagwe se tla dula gona sa ithopela naga.

₃₆Ditlogolo tša bahlanka ba gagwe di tla e abelwa ya ba lefa la bona;

ba ba mo ratago ba tla dula go yona.