Khomotšo go tšwa Lentšung – Letšatši 31

₁Ke tšhabela go wena, Morena,

ke se tsoge ke hlabilwe ke dihlong.

₂Ntlhakodiše mme o ntote ka maatla a gago a go phološa!

Ntlhwaele tsebe o mphološe!

₃Eba mošireletši wa ka yo ke tšhabelago go yena ka mehla.

O ikemišeditše go mphološa,

gobane o mošireletši wa ka le sebo sa ka.

₁Morena, o ntekotše mme o a ntseba.

₂O tseba tšohle tše ke di dirago;

o tseba tša pelo ya ka o le kgole.

₃O laola mesepelo ya ka le marobalo a ka;

ditsela tša ka o di tseba gabotse.

₄Le pele ga ge ke ahlama, Morena,

o tseba ka botlalo se ke tlago se bolela.

₅O ntikaneditše ka gohle;

o mpontšha gore ke nna wa gago.

₅Mola ke le tlalelong ke ile ka rapela Morena,

gomme a nkwa, a ntlhatlola.

₆Ka ge Morena a na le nna ga ke boife;

motho wa nama yena a ka ntirang?

₇Morena o na le nna gore a nthuše;

ka gona ke tla bogela manaba a ka a fentšwe.

₈Go kaone go khuta ka Morena,

go na le go ikanya motho wa nama.

₉Go kaone go khuta ka Morena,

go na le go ikanya babuši.

₁Ntšhokele, hle, Modimo, ntšhokele,

gobane ke tšhabela go wena.

Ke tla khuta ka fase ga diphego tša gago go fihlela ge kotsi e fetile.

₂Ke bitša Modimo, Ragodimodimo,

Modimo yo a mphethelago tšohle.

₃O nthuša a le legodimong,

a mphološa;

a goboša ba ba ntlhomarago. Sela

Modimo o nthuša ka leratorato la gagwe le potego ya gagwe.

₇Ke itiišitše pelo, Modimo,

ke itiišitše pelo.

Ke tla opela ke go tumiša.

₁Modimo ke setšhabelo sa rena le maatla a rena;

ke komana madulaabapile mabakeng a mathata.

₂Ka gona,

le ge lefase le ka šikinyega,

le dithaba tša kgeregela ka garegare ga lewatle;

₃le ge mawatle a ka rora a galefile,

le dithaba tša thothomedišwa ke kgalefo yeo, re ka se tšhoge. Sela

₁₀O re: “Lesang go lwa,

mme le tsebe gore ke nna Modimo.

Ke nna Kokamaditšhaba,

ke nna Kokamalefase.”

₁₁Morena Ramaatlaohle o na le rena;

Modimo wa Jakobo ke setšhabelo sa rena!

₁Morena, nna ga ke ikgantšhe,

goba ka hlaetša ba bangwe mahlo.

Ga ke ipofe ka dilo tše di mphetago,

goba tša go nkgakgamatša.

₂Nka upša ka thekga ditho ke ikhomoletše,

ka fola maswafo go etša lesea le le tshwešitšwego letswele difarong tša mmalo.

₃Baisraele, botang Morena,

go tloga bjale le go ya go ile.

₁Go lehlogonolo ba ba phelago ba se na bosodi,

ba ba phelago ka melao ya Morena.

₂Go lehlogonolo ba ba phethago ditaelo tša gagwe,

ba ba mo hlomphago ka pelo tša bona ka moka,

₃ba ebilego ba sa dire tše mpe,

ba tšeago ka tsela ya Morena.

₄Morena, o re file ditaelo tša gago,

gore re botegele go di phetha.

₅Nke nka phetha ditaelo tša gago ke sa tekateke.

₆Ge melao yohle ya gago nka e ela hloko,

gona nka se lewe ke dihlong.

₇Ke tla go tumiša ka pelo ye e hlwekilego

ke ntše ke ithuta go phetha ditaelo tša gago tše di lokilego.

₈Ke tla phetha ditaelo tša gago;

o se tsoge o ntahlile!

₉Mofsa a ka phela bjang bophelo bjo bo hlwekilego?

A ka bo phela ka go phetha taelo tša gago.

₁₀Nna ke leka go go direla ka pelo ya ka yohle;

o se ntese ke phamoga melaong ya gago.

₁₁Dikholofetšo tša gago ke di lotile ka pelong,

gore ke se go fošetše.

₁₂A go tumišwe wena, Morena;

nthute ditaelo tša gago.

₁₃Ditaelo tše o re filego tšona ke a di touta.

₁₄Ke kgahlwa ke go phela ka ditaelo tša gago,

go etša ge ke kgahlwa ke lehumo le legolo.

₁₅Ke tla akanya ka ditaelo tša gago;

ka ela ditsela tša gago hloko.

₁₆Ke thakgalela ditaelo tša gago,

nka se lebale se o se boletšego.

₁₇O ntire ka botho, nna, mohlanka wa gago,

ke mo ke tlago phela ke phetha tše o di boletšego.

₁₈Mpudulle, ke bone dimaka tše di lego melaong ya gago.

₁₉Le ge ke le mofeti mo lefaseng,

o se mphihlele melao ya gago.

₂₀Ka mehla ke fišegela go tseba tše o re laelago tšona.

₂₁Baikgogomoši o a ba sola,

bona bomorogakwa,

e lego ba ba phamogago melaong ya gago.

₂₂Ntloše kgobogo le nyatšego,

gobane ditaelo tša gago ke a di phetha.

₂₃Le ge babuši ba ka kopana ba ntakana,

nna, mohlanka wa gago,

ke tla dula ke akanya ditaelo tša gago.

₂₄Ke kgahlwa ke ditaelo tša gago;

ke tšona baeletši ba ka.

₂₅Ke rapaletše fase leroleng;

ntsoše go ya ka mo o nkholofeditšego.

₂₆Ke go boditše tša bophelo bja ka, wa nkwa;

bjale ge, nthute ditaelo tša gago.

₂₇Nthuše go kwešiša ditaelo tša gago,

gore ke nagane ka dimakatšo tša gago.

₂₈Ke lala ke welawetšwa ke manyami;

mmaatlafatše ka mo o nkholofeditšego.

₂₉O mphephiše go dira tša boradia;

hle, o nthuše go phetha melao ya gago.

₃₀Ke ikgethetše go phela ke go botegela;

ke phela go ya ka melao ya gago.

₃₁Ke kgomaretše ditaelo tša gago, Morena,

a ke se lewe ke dihlong.

₃₂Ke tla phetha melao ya gago ka mafolofolo,

gobane o nkgontšha go phela ke sa ipelaele.

₃₃Morena, nthute go phetha taelo tša gago,

ke mo ke tlago phela ka tšona go fihlela mafelelong.

₃₄Ntlhalošetše melao ya gago,

gomme ke tla e phetha ka pelo ya ka yohle.

₃₅Nkgontšhe go phela ka melao ya gago,

gobane ke sona se se nkgahlago.

₃₆Ntire gore ke dume go phetha ditaelo tša gago go na le gore ke nyake lehumo.

₃₇Mphephiše go šetša tše di se nago mohola;

o nthatiše go phela go ya ka thato ya gago.

₃₈O phethe se o nkholofeditšego sona,

nna, mohlanka wa gago,

sona se o se holofetšago ba ba go boifago.

₃₉O mphephiše dikwero tše ke di tšhabago.

Ditaelo tša gago di lokile.

₄₀Bona ka mo ke hlologetšego ditaelo tša gago;

anke o ntsošološe ka go loka ga gago.

₄₁Ntemoše lerato la gago, kilaphetogo,

o mphološe ka mo o nkholofeditšego.

₄₂Ke mo ke tlago kgona go fetola ba ba nkgowelago,

ka gobane ke ikantše tše o nkholofeditšego tšona.

₄₃O nkgontšhe go bolela therešo ka mehla,

ka gobane ke holofetše ditaelo tša gago.

₄₄Ka mehla ke tla phetha melao ya gago;

ke tla e phetha go ya go ile.

₄₅Ke tla phela ka bolokologi bjo bo feletšego,

ka gobane ke rata go phetha taelo tša gago.

₄₆Ditaelo tša gago ke tla di begela magoši,

gomme nka se lewe ke dihlong.

₄₇Melao ya gago ke ipshina ka yona,

ka gobane ke a e rata.

₄₈Ke hlompha melao ya gago,

yona ke e ratago;

le ditaelo tša gago ke nagana ka tšona.

₄₉O se lebale se o nkholofeditšego sona,

nna, mohlanka wa gago;

ke sona se se mphilego lehutšo.

₅₀Ge ke le tlalelong, se se nkhomotšago ke gore se o nkholofeditšego sona se a mphediša.

₅₁Baikgogomoši ba nkwera ba sa fetše,

fela nna ga ke aroge melaong ya gago.

₅₂Ge ke gopola ditaelo tša gago tša kgale, Morena,

ke beega pelo.

₅₃Bakgopo ge ba furalela melao ya gago,

ba nkgalefiša e le ruri.

₅₄Mola ke sa le mofaladi ke be ke hlama dikopelo ka ditaelo tša gago.

₅₅Bošego ke lala ke go nagana, Morena,

melao ya gago ke tla e phetha.

₅₆Go nna go phetha taelo tša gago ke bjona bophelo.

₅₇Morena, nna ke re sa ka ke go phetha tše o re laetšego tšona.

₅₈Ke go kgopela ka pelo ya ka yohle

ke re nkgaugele, bjalo ka ge o nkholofeditše.

₅₉Ke ile ka lekola mesepelo ya ka,

mme ka boela ditaelong tša gago.

₆₀Ke itlhaganela ke sa diege go phetha melao ya gago.

₆₁Le ge nka tanywa ke difu tša bakgopo,

melao ya gago yona nka se e lebale.

₆₂Ke tsoga le mašegogare,

gore ke go tumiše ka lebaka la ditaelo tša gago tša go loka.

₆₃Nna ke gwerana le bohle ba ba go boifago,

ba ba phethago taelo tša gago.

₆₄Morena, lefase le tletše leratorato la gago;

nke o nthute ditaelo tša gago.

₆₅O ntirile ka botho, Morena,

nna, mohlanka wa gago,

go ya ka mo o nkholofeditšego ka gona.

₆₆Nke o nthute gore ke be le temogo le tsebo,

gobane ke tshephile melao ya gago.

₆₇Mola o sešo wa nkotla ke be ke fela ke etšwa tseleng;

fela bjale ke šetša kholofetšo ya gago.

₆₈Wena o yo botho,

mme o modirakabotho;

nke o nthute ditaelo tša gago.

₆₉Baikgogomoši ba mphara ka maaka,

etšwe ke phetha taelo tša gago ka pelo yohle.

₇₀Bona ba retetše dipelo,

nnaena ke kgahlwa ke melao ya gago.

₇₁Go otlwa ga ka go nkhotše,

ka ge go nthutile ditaelo tša gago.

₇₂Melao ye o e beilego e bohlokwa go feta gauta le silibera ye ntšintši.

₇₃O ntlhodile,

o mpopile ka tša gago diatla;

mphe tlhaologanyo,

gore ke ithute melao ya gago.

₇₄Ba ba go boifago ba tla thabela go mpona,

ka gobane ke ikanya se se boletšwego ke wena.

₇₅Morena, ke a tseba gore ditaelo tša gago di lokile,

le gore le ge o nkotla o a botega.

₇₆Nkhomotše ka leratorato la gago,

go ya ka mo o nkholofeditšego ka gona,

nna, mohlanka wa gago.

₇₇Ntšhokele, gomme ke tla phela,

gobane ke kgahlwa ke melao ya gago.

₇₈Baipoti a ba segišwe batho ka ge ba mphara ka maaka;

nnaena ke tla nagana ka melao ya gago.

₇₉Ba ba go boifago a ba tle go nna,

ke ra ba ba tsebago ditaelo tša gago.

₈₀A ke phethe ditaelo tša gago ka botlalo,

ke mo nka se lewego ke dihlong.

₈₁Ke hlologetše kudu gore o mphološe;

ke holofetše se o se boletšego.

₈₂Mahlo a ka a lapišitšwe ke go hlwa ke lebeletše

gore o tla tla o mphološa, ke re:

“Etse o tla tla o nkhomotša neng?”

₈₃Le ge ke etša lekuka ka moraleng,

ditaelo tša gago tšona ga ke di lebale.

₈₄Ke go letele go fihlela neng,

nna, mohlanka wa gago?

Ba go ntlhomara o tla ba otla neng?

₈₅Baipoti ba go hlokomologa melao ya gago ba nkepetše melete.

₈₆Melao ya gago yohle e a tshephega.

Nthuše, gobane batho ba ntlhomere.

₈₇Ba nyakile go mpheleletša mo lefaseng,

fela ga se ka furalela melao ya gago.

₈₈Ka leratorato la gago o ntsošološe,

gore ke phethe tše o ntaetšego tšona.

₈₉Tše o di boletšego, Morena,

ke tša go ya go ile,

di tieletše kua legodimong.

₉₀O botega go tloga molokong wo mongwe go ya go wo mongwe.

Lefase le beilwe ke wena madulong, la tielela.

₉₁Dilo tšohle di dutše ka go tielela le lehono,

ka ge di laetšwe ke wena,

gobane tšohle di a go hlankela.

₉₂Ge nkabe ke be ke sa kgahlwe ke melao ya gago,

nkabe ke ile ka hwela mohlakong wa ka.

₉₃Ditaelo tša gago nka se di lebale,

gobane ke tšona tše o ntsošološago ka tšona.

₉₄Nna ke wa gago – ntlhakodiše,

gobane ke lekile go phetha taelo tša gago.

₉₅Bakgopo ba a ntalela gore ba mpolaye,

eupša nna ke tla fela ke šeditše taelo tša gago.

₉₆Ke lemogile gore phethego yohle e na le mafelelo,

kganthe melao ya gago yona ga e na mafelelo.

₉₇Melao ya gago ga se ge ke e rata!

Ke hlwela go e akanya letšatši lohle.

₉₈Melao ya gago e a ntlhalefiša ka phala manaba,

ka gobane e dula e le mo go nna.

₉₉Nna ke phala barutiši ba ka ka moka ka temogo,

ka ge ke akanya taelo tša gago.

₁₀₀Ke kwešiša go phala batšofadi,

gobane ke phetha taelo tša gago.

₁₀₁Ke ila tšohle tše mpe,

gobane ke rata go phetha tše o di boletšego.

₁₀₂Taelo tša gago ga ke di hlokomologe,

gobane ke di rutilwe ke wena ka sebele.

₁₀₃Dikholofetšo tša gago ga se ka bose;

di phala le todi ya dinose.

₁₀₄Nna temogo ke e hwetša taelong tša gago;

ka gona ke hloile boradia bjohle.

₁₀₅Lentšu la gago ke lebone la go ntlhahla,

ke seetša tseleng ya ka.

₁₀₆Ke ikanne, gomme nka se hlaname,

ka re ke tla phetha taelo tša gago,

ke tše di lokilego.

₁₀₇Ke tlaišegile e le ruri, Morena;

ntsošološe go ya ka mo o nkholofeditšego.

₁₀₈Morena,

amogela thapelo ya ka ya go go tumiša,

gomme o nthute ditaelo tša gago.

₁₀₉Ke dula ke ikemišeditše go ba kotsing ya lehu,

fela melao ya gago yona ga ke e lebale.

₁₁₀Bakgopo ba ntheile ka sefu,

fela ga ke aroge ditaelong tša gago.

₁₁₁Ditaelo tša gago ke leruo la ka la go ya go ile;

ke tšona di nthabišago.

₁₁₂Ke ikgafetše go phetha ditaelo tša gago;

ke tla phela ka tšona go fihlela mafelelong.

₁₁₃Ke hloile bommapelopedi,

eupša melao ya gago yona ke a e rata.

₁₁₄Wena o bokhuto bja ka le boširelo;

ke holofetše se o se boletšego.

₁₁₅Ntlogeleng, badiratšempe tenang,

gore ke phethe melao ya Modimo wa ka.

₁₁₆Nthuše ka mo o nkholofeditšego ka gona,

gomme ke tla phela.

Ka ge ke botile wena, o se ntshwabiše.

₁₁₇Nthekge, ke mo ke tlago phologa,

ka dula ke ela taelo tša gago hloko.

₁₁₈Bohle ba ba phamogago taelong tša gago o a ba lahla,

gobane mahlajana a bona ke lefeela.

₁₁₉Bakgopo bohle ba lefase go wena ke maphoko;

ka gona nna ke rata taelo tša gago.

₁₂₀Ke thothomedišwa ke go go boifa,

le dikahlolo tša gago ke a di tšhaba.

₁₂₁Ke dirile tše di lebanego le tše di lokilego;

o se nkgafele diatleng tša bankgateledi.

₁₂₂Nkholofetše gore tšohle di tla ntokela,

nna, mohlanka wa gago;

o se lese baikgogomoši ba nkgatelela.

₁₂₃Mahlo a ka a lapišitšwe ke go hlwa ke lebeletše gore o tla tla o mphološa,

bjalo ka ge o nkholofeditše,

gobane o a tshephagala.

₁₂₄Ntshware go ya ka lerato la gago,

kilaphetogo,

mme o nthute ditaelo tša gago.

₁₂₅Ke nna mohlanka wa gago;

ntemoše gore ke hlaologanye ditaelo tša gago.

₁₂₆Morena, ke nako ya gore o otle ba ba tshelago melao ya gago.

₁₂₇Ditaelo tša gago ke di rata go phala gauta,

go phala gauta ye e sego ya tswakwa.

₁₂₈Ke ka lebaka leo ke bonago taelo tšohle tša gago di lokile go felelela;

ke hloile ditsela tšohle tša boradia.

₁₂₉Taelo tša gago di a makatša,

ke ka lebaka leo ke di phethago.

₁₃₀Kutollo ya tše o di boletšego e a sedimoša;

ba go hlalefetšega gabonolo e a ba hlalefiša.

₁₃₁Ke fišegela ditaelo tša gago,

ke di hlologela kudu.

₁₃₂Retologela go nna o nkgaugele,

go etša ge o gaugela ba ba go ratago.

₁₃₃Ntlhahle bophelong bjalo ka ge o nkholofeditše;

o se ntlogele ke bušwa ke bobe.

₁₃₄Ntamolele go ba ba ntlhakišago,

gore ke tle ke phethe taelo tša gago.

₁₃₅Nke o nkedišetše sefahlego sa gago,

nna, mohlanka wa gago,

mme o nthute ditaelo tša gago.

₁₃₆Ke ediša meokgo boka dinoka,

ka ge batho ba sa phethe melao ya gago.

₁₃₇Wena o lokile, Morena,

le dikahlolo tša gago ke tšona.

₁₃₈Ditaelo tša gago di lokile,

di tshephagala e le ruri.

₁₃₉Ke a selekega

ka ge manaba a ka a hlokomologa tše o di boletšego.

₁₄₀O tshephagala ruri go se o nkholofeditšego sona,

gomme nna, mohlanka wa gago,

ke a se rata.

₁₄₁Nna ga ke selo, ke a nyatšega,

fela ditaelo tša gago ga ke di hlokomologe.

₁₄₂Toka ya gago ke ya go ya go ile,

le melao ya gago ke ya therešo.

₁₄₃Ke wetšwe ke tlalelo le kgakanego,

fela ke thabišwa ke melao ya gago.

₁₄₄Taelo tša gago di loketše sa ruri;

nkgontšhe go di kwešiša,

gomme ke tla phela.

₁₄₅Ke go rapela ka pelo ka moka;

nkwe, hle, mme ke tla phetha taelo tša gago.

₁₄₆Ke a go rapela, ntlhakodiše,

ke tle ke phethe taelo tša gago.

₁₄₇Ke go llela e sa le ka mahube;

ke botile se o nkholofeditšego sona.

₁₄₈Ke lala ke hlobaela bošego ka moka,

ke akanya ka se o nkholofeditšego sona.

₁₄₉Morena, nke o ntheeletše ka leratorato la gago;

o ntsošološe ka ditaelo tša gago.

₁₅₀Bantlhomari ba mpatamela ka bomenetša;

ke bona ba ba lego kgole le melao ya gago.

₁₅₁Fela wena, Morena, o kgauswi,

le melao yohle ya gago ke ya nnete.

₁₅₂Ke kgale ke tsebile ka taelo tša gago gore o di beile gore e be tša go ya go ile.

₁₅₃Hle, mpone ge ke tlaišega mme o ntlhatlole,

gobane melao ya gago ga ke e hlaetše mahlo.

₁₅₄Mpolelele molatong wa ka mme o ntlhakodiše,

o ntsošološe go ya ka mo o nkholofeditšego.

₁₅₅Bakgopo bona ga o ba hlakodiše mathateng,

gobane ga ba phethe taelo tša gago.

₁₅₆Lešoko la gago ke le legolo, Morena,

o ntsošološe ka ditaelo tša gago.

₁₅₇Le ge ke atetšwe ke bantlhomari le manaba,

ga ke aroge ditaelong tša gago.

₁₅₈Bahlokatumelo ge ke ba bona ba a ntšhišimiša,

gobane ga ba phethe ditaelo tša gago.

₁₅₉Morena, bona ka mo ke ratago taelo tša gago;

o ntsošološe ka leratorato la gago.

₁₆₀Therešo ke moko wa tšohle tše o di boletšego,

le ditaelo tšohle tša gago di lokile ebile ke tša go ya go ile.

₁₆₁Le ge babuši ba ntlhomara ntle le lebaka,

ke gakgamatšwa ke tše o di boletšego.

₁₆₂Ke thabela kholofetšo ya gago go etša yo a thabelago dithebola tše dintši.

₁₆₃Ke hloile maaka ebile a a ntšhišimiša,

kganthe melao ya gago yona ke a e rata.

₁₆₄Ke go tumiša gašupa ka letšatši,

ke go tumišetša ditaelo tša gago tše di lokilego.

₁₆₅Boiketlo bja nnete ke bja ba ba ratago melao ya gago,

gomme bona ga ba na sa go ba thetša.

₁₆₆Morena,

nna ke letetše go phološwa ke wena,

gomme melao ya gago ke a e phetha.

₁₆₇Ke phetha ditaelo tša gago,

gomme ke di rata e le ruri.

₁₆₈Ke lotola ditaelo le melao ya gago,

gobane mesepelo yohle ya ka o a e tseba.

₁₆₉Morena, sello sa ka a se go fihlele,

o nthuše go kwešiša go ya ka mo o nkholofeditšego.

₁₇₀Anke o kwe thapelo ya ka,

o mphološe ka mo o ntshephišitšego.

₁₇₁Molomong wa ka go tla tšwa tumišo,

gobane o nthuta taelo tša gago.

₁₇₂Ke tla opela mabapi le kholofetšo ya gago,

gobane melao yohle ya gago e lokile.

₁₇₃O dule o ikemišeditše go nthuša,

gobane ke ikgethetše taelo tša gago.

₁₇₄Ke hlologetše go phološwa ke wena, Morena,

melao ya gago ke sona se se nthabišago.

₁₇₅A ke phele gore ke go tumiše, gomme ditaelo tša gago di nthuše.

₁₇₆Ke hlahlatha boka nku ye e timetšego;

etla o nnyake, nna, mohlanka wa gago,

gobane melao ya gago ga ke e hlokomologe.

₁Ge Baisraele ba tloga Egepeta,

ge ditlogolo tša Jakobo di tloga morafeng wola wa go bolela leleme le šele,

₂Juda e ile ya ba tšhaba se sekgethwa sa Modimo,

Israele ya ba mmušo wa gagwe.

₃Lewatle le rile go di bona la tšhaba,

Jordane ya katakata ka sa morago.

₄Dithaba tša tsheletshela boka dikgapa,

meboto ya kganakgana boka dikwanyana.

₅Wena lewatle, o tšhabelang?

Wena Jordane, o reng o katakata?

₆Lena dithaba,

le reng le tsheletshela boka dikgapa?

Lena meboto,

ke eng le kganakgana boka dikwanyana?

₇Wena lefase,

thothomela ge go etla Mong wa gago,

ee, ge go etla Modimo wa Jakobo,

₈yena a fetolago leswika mogobe wa meetse,

legakabje a le fetola sediba.

₁Ke tla tumiša Morena ka mehla;

nka se ke ka kgaotša go mo reta.

₂Ke tla mo tumiša;

baikokobetši ba tla di kwa mme ba thaba.

₃A re reteng Morena re le mmogo,

re mo tumišeng re le gotee!

₄Ke kgopetše Morena thušo,

mme a nkaraba;

o ntlhakodišitše mo go tše ke bego ke di boifa.

₅Mo lebeleleng mme le tla ela difahlego,

la se lewe ke dihlong.

₆Nna ke mohlaki yo ke bego ke bitša Morena, mme a nkwa,

a ntlhakodiša ditlaišegong tša ka tšohle.

₇Bao ba obamelago Morena ba hlapetšwa ke morongwa wa gagwe gabotse,

mme o ba phološa kotsing.

₈Lebeledišišang le itemogele gore Morena ke yo botho bjang.

Go lehlogonolo motho yo a tšhabelago go yena.

₉Boifang Morena,

lena bakgethwa ba gagwe,

gobane ba ba mmoifago ga ba hloke selo.

₁₀Le ditawana di fela di hloka dijo di bolawa ke tlala,

eupša bao ba kgopelago Morena

ga go se sebotse se ba se hlokago.

₁₁Tlaang le ntheeletše, lena banabešo,

ke le rute go boifa Morena.

₁₂Na le rata go ipshina ka bophelo?

Le nyaka go phela galelele ka lethabo?

₁₃Gona le itlhokomele gore le se bolele tše mpe,

le gore le se radie batho.

₁₄Le tlogele tše mpe le dire tše dibotse;

le katanele khutšo mme le e phegelele.

₁₅Morena o bea baloki leihlo,

le dillo tša bona o di hlwaela tsebe.

₁₆Badiratšekgopo bona o a ba lwantšha,

gore lefaseng ba se sa gopolwa.

₁₇Baloki ba llela Morena gore a ba thuše,

mme o a ba kwa.

O ba ntšha ditlaišegong tša bona ka moka.

₁₈Morena o kgauswi le bao ba nolegilego moko;

o phološa bao ba feletšwego ke tshepo.

₁₉Moloki o atelwa ke madimabe,

eupša Morena o mo ntšha go ona ka moka;

₂₀Morena o mo šireletša mmele wohle;

ga go lerapo la gagwe le le robegago.

₂₁Bakgopo ba bolawa ke bobe bja bona;

bahloyabaloki ba tla otlelwa molato wa bona.

₂₂Morena o tla phološa bahlankedi ba gagwe,

mme bohle ba ba humelago ka yena ba ka se otlelwe melato ya bona.