Khomotšo go tšwa Lentšung – Letšatši 12

₅Magodimo a reta mehlolo ya gago, Morena,

le potego ya gago sebokeng sa barongwa.

₆Kgane ke mang kua magodimong yo a kago bapetšwa le Morena?

Ke mang gare ga dihlolwa tšeo tša legodimo yo a swanago le Morena,

₇Modimo, Mmoifegi gare ga barongwa,

senatla, Motšhabegi gare ga bohle ba ba mo potapotilego?

₈Morena, Modimo Ramaatlaohle,

ke mang mokawena?

O Ramaatla, Morena,

mme potego ya gago ke yona kobo ya gago.

₉O buša lewatle le le gaketšego;

o homotša maphoto a a fadilego.

₁Morena, Mong wa rena,

leina la gago ke le legolo bjang lefaseng lohle!

Tše o di hlomilego legodimong di taga bjang!

₂Bana le masea ba reta maatla a gago, ba hlokiša balwantšhi ba gago melomo,

manaba a gago le baitefeletši.

₃Ge ke lebelela leratadima,

mošomo wa diatla tša gago,

ngwedi le dinaledi tše o di beilego madulong,

₄ke re motho ke eng ge o bile o mo gopola,

motho wa lešidi ge o mmabalela?

₁Magodimo a anega letago la Modimo;

leratadima le kwalakwatša mediro ya atla tša gagwe.

₂Letšatši le e anegela la go le latela,

le bošego bo e begela bjo bongwe.

₃Ga go kwale polelo goba mantšu,

le wona modumo ga o gona;

₄eupša molaetša wa magodimo o ya lefaseng lohle,

le mantšu a ona a fihla magomong a lefase.

Letšatši lona Modimo o le agetše ngwako leratadimeng,

₅le tšwa bjalo ka monyadi a tsatsanka

a etšwa ntlong;

le etša sekitimi se phalela lebelo.

₆Le hlaba ka thoko ye nngwe ya legodimo,

la kgokologela ka go ye nngwe.

Ga go se se ka utamelago phišo ya lona.

₁Morena ke yo mogolo,

a a retwe gagolo motseng wa Modimo wa rena.

Thaba ya gagwe ye kgethwa

₁₀Setumo sa gago se aparetše lefase lohle,

mme o retwa gohle lefaseng.

O buša ka toka.

₁₁Batho ba Sione ba thabile;

metse ya Juda le yona e gobela dikahlolo tša gago.