Kholofelo e mpsha (Karolo ya 2) – Letšatši la 19

Babadi ba bantši ba nkgopetše go ngwala se sengwe mabapi le go kwa entšu la Modimo. Mo ke dikgato tše nne go tšwa go Habakuku 2:1-3:

Habakuku 2:1-3: Ke tla namela sethalana sa ka, ka ema godimo ga tora ya tlhapetšo, ka letela go kwa se Morena a tlago mpotša sona, le phetolo ya gagwe mabapi le sello sa ka. Morena a mphetola a re: “Ditaba tše ke go utollelago tšona o di tloke matlapaneng, gore di balege gabonolo. O di tloke ka gobane nako ya tšona ya gore di phethagale e sa tla. Fela nako yeo e tla tla ka pela, le tše ke go utollelago tšona di tla phethagala. Le ge di ka tšea nako, o di letele; go phethagala gona di tla phethagala go se go ye kae.”

KGATO YA 1: HWETŠA LEFELO LE LE HOMOTŠEGO GO FETŠA NAKO LE MODIMO

• Habakuku 2:1: Ke tla namela sethalana sa ka, ka ema godimo ga tora ya tlhapetšo.

Le ge Modimo a le gohle le gore re ka bolela le yena nako efe le ge e le efe ya letšatši, ka dinako tše dingwe go bohlokwa go ya lefelong le le homotšego, go tsepelela go yena le go kwa go tšwa go yena. “Lefelo le le homotšego” la Habakuku e be e le tora ya tlhapetšo ya motse. La gago e ka ba phapoši ya gago, ofisi goba gaešita le phaka setšhabeng sa geno. “Lefelong la rena le le homotšego”, re tsepelela go Modimo le go letela ka pelo ye e letetšego go kwa go tšwa go yena.

KGATO YA 2: BULEGELA GO LENTšU LA MOYA WO MOKGETHWA

• Habakuku 2:1: … ka letela go kwa se Morena a tlago mpotša sona, le phetolo ya gagwe mabapi le sello sa ka.

Modimo o bolela le rena letšatši le letšatši, eupša rena, ka dinako tše dingwe, re palela ke go mo kwa ka gobane re letetše lentšu le le kwagalago. Le ge Modimo a ka bolela ka lentšu le le kwagalago, gantši o bolela le rena ka Moya wa gagwe wo Mokgethwa ka sebopego sa dikgopolo tša go itlela fela, dipono, maikutlo, lentšu la gagwe goba dikgahlego dipelong tša rena. Go fa mohlala, o otlela koloi ya gago, o nagana ka motho yo a itšego gomme o itemogela tutuetšo ya go mo rapelela; goba o na le bothata mošomong, o rapela ka bjona gomme gateetee, o tseba se o swanetšego go se dira. Naa kgopolo yeo e tšwa kae? Ke Moya wo Mokgethwa o go hlahla. Ge o le lefelong la gago le le homotšego, bulegela go hwetša molaetša go tšwa go Modimo.

KGATO YA 3: TSEPELELA GO MODIMO

• Habakuku 2:1: … ka letela go kwa se Morena a tlago mpotša sona …

Re letela bjang Modimo? Ge Modimo a bolela le rena ka Moya wa gagwe wo Mokgethwa, le semeetseng re ka laletša Moya wo Mokgethwa go bolela le rena. Thoma go leboga Modimo ka yo a lego yena le yo a lego yena go wena. Leboga Jesu ka se a go diretšego sona sefapanong. Kgopolo ye nngwe gape e botse ke go naganišiša ka dikholofetšo go tšwa ka Bibeleng. Di re gopotša ka bogolo bja Modimo le bokgoni bja gagwe go ka re thuša.
Gape o ka ahlaahla ditlhohlo tše itšego le Modimo le go mo kgopela tlhahlo e itšego. Ge e le gabotse, o šetše a na le dikarabo go mathata a o se bego wa lebeletšana le wona.

KGATO YA 4: NGWALA POLEDIŠANO YA GAGO

• Habakuku 2:2-3: Ditaba tše ke go utollelago tšona o di tloke matlapaneng, gore di balege gabonolo. O di tloke ka gobane nako ya tšona ya gore di phethagale e sa tla. Fela nako yeo e tla tla ka pela, le tše ke go utollelago tšona di tla phethagala. Le ge di ka tšea nako, o di letele; go phethagala gona di tla phethagala go se go ye kae.

Modimo O laetše Habakuku go ngwala fase ditaelo tša gagwe matlapeng. Gape o ba lemošitše go letela katlego ya bona ba sa fele pelo. Ge Moya wo Mokgethwa a bolela le rena letšatši le letšatši, re swanetše go ngwala phetolo ka gare ga tšenale. E tla re gopotša ka dikholofetšo tša Modimo le go re thuša gore re se lahlegelwe ke kholofelo ge dilo di tšea nako go phethagala maphelong a rena.

O ka tseba bjang gore ke Modimo a bolelago le wena? Molaetša wa Modimo ka mehla o sepedišana le lentšu la gagwe le semelo sa gagwe. Ka gona, ge e ba o a belaela, boela morago lentšung gomme o leke molaetša.
O hloka bohlale lehono? Hwetša lefelo le le homotšego moo o tla kopanago le Modimo, bula pelo ya gago, tsepelela go yena le go ngwala fase se a go botšago sona. Se e ka ba kgato ya pele ya bohlagahlaga le yena! Modimo a go šegofatše.