Kgonthišetšo e šegofaditšwego – Letšatši la 12
Ngwathaganya senkgwa sa bophelo
(Di)temana ya Bibele
1 BAKORINTE 2
Rena ga se ra fiwa moya wa go buša batho ba lefase; re filwe Moya wa go tšwa go Modimo gore re tle re tsebe tše re di filwego ke Modimo ka kgaugelo ya gagwe. … Yo a sa laolwego ke Moya wa Modimo ga a amogele tša Moya. Go yena ke bošilo, gomme ga a kgone go di kwešiša, ka gobane di lebelelwa fela ka leihlo la Moya. 1 Bakorinte 2:12,14
Sefela, “Ngwathaganya senkgwa sa bophelo”, se tšwa go mokgatlo wa Chautauqua mafelelong a bo-1800 kua Amerika. Chautauqua e thomile bjalo ka lenaneo la tlhahlo la barutiši ba sekolo sa Sontaga, eupša ka pela la katologa go ba mohuta wa yunibesithi ya selemo moo batho ba bego ba kopana ka tlase ga ditente tše kgolo go theeletša dithuto le go thabišwa. Mary Lathbury e be e se moreti yo a bego a ipshina ka go etela Chautauqua nakong ya selemo. O kgopetšwe go ngwala sefela, ka gona o tšere Bibele ya gagwe go ka hwetša tlhohleletšo. Moo, o badile kanegelo ya Jesu a fepa batho ba 5 000 le ka fao Jesu a iponagaditšego bjalo ka senkgwa se se neago bophelo bjo bo sa felego.
“Ngwathaganya senkgwa sa bophelo” e sa le sefela sa selalelo; go tšwa go hlogo go bonolo go bona. Le ge go le bjalo, gape ke karolo ya mmino wo o thekgago dithuto tša Bibele. Lebelela temana ya boraro:
Romela Moya wa Gago, bjale go nna,
Gore A kgwathe mahlo a ka, le go dira gore ke bone,
Ntaetše nnete ye e utilwego ka gare ga Lentšu la Gago,
Gomme go puku ye e utolotšwego ke bona Morena.
Boela morago gomme o bale gape temana ya lehono go tšwa go Bakorinte. Sefela se ke thapelo ye botse ya go kgopela Moya wo Mokgethwa go phadimiša menagano ya rena ge re bala le go ithuta Mangwalo a Makgethwa.
E sa le wa leka go botša mogwera wa gago yo e sego Mokriste temana ya Lentšu gomme wa hwetša gore ga a e kwišiše? Mohlomongwe o ka gopola o bala Bibele pele o e ba Mokriste gomme o e hwetša e se na mohola le go gakantšha.
Gomme, wa ba Mokriste, wa amogela Moya gomme puku ya thoma go phela. Dilo tše o bego o sa di kwešiše wa di kwešiša gomme wa hwetša o kgahlwa ke tšona. Mesong ye, anke sefela se sa kgalekgale e be segopotšo gore ka mehla o kgopele Moya wo Mokgethwa go utolla nnete ya Modimo go wena ge o bala lentšu la gagwe.
