Ke tla – Letšatši la 21

Ke rata go ruma ka tatelano ya ditiragalo tše tše kopana tša bopaki go tšwa go babadi, tše di bontšhago bokgauswi bja Modimo dinakong tše boima.

Mmadi wa 1, Anna: “Monna wa ka o hweditšwe a na le kankere mengwaga ye meraro ya go feta. Dikgwedi tše pedi tša go feta, o hlophegile kudu gomme ra kgopela Modimo makga a mantši go mo tšea a mo iše gae mola e be e le thato ya Gagwe ka bophelo bja monna wa ka. Mafelelong, monna wa ka o hlokafetše ka di-13 Hlakola. Sa go makatša ke gore barwedi ba rena ba babedi (o tee go tšwa Gauteng gomme yo mongwe go tšwa Amerika) ba be ba na le nna ka nako yeo ke be ke se noši. Re ile ra phetha dilo ka moka pele morwedi wa ka a boela Amerika. Thekete e be e rekilwe dikgwedi e sa le pele. Modimo o a botega gomme nako ya Gagwe e phethagetše. Ke a mo tumiša.”

Mmadi wa 2, Koos: “Go kgwebo ya go rekiša dithoto, go nyakega tšhelete. Ya rena tšhelete ke nakwana e fedile bjale. Le bjale Modimo o sa re abela. Ge khamera ya ka ya kgale e robega, ke hweditše gore sellathekeng sa ka se tšea diswantšho tše kaone go feta ka fao khamera e bego e dira. Ge segodišamodumo sa sellathekeng sa ka se be se sa šome gabotse gomme ka lefela tšhelete e ntši gore se lokišwe, ke lemogile gore ga ke hloke sellathekeng sa go tura. Ge programa ya go thibela birase khomputareng ya ka e felela ka nako, go bile le tšhelete ye e lekanego go patelela ya ngwaga gape. Ge thušo ya tša kalafo e felela ke nako gomme re se sa kgona go lefela kalafo ya mosadi wa ka ya R2 000 ka kgwedi ya bolwetši bja gagwe bjo sa alafegego, re beetše ka thoko boikgogomošo bja rena gomme ra hwetša kliniki ya go makatša ya mmušo yeo e mo fago kalafo mahala. Gomme re ka hlaloša dilo tše ntši, re hlatsela ka ditšhegofatšo tše re tšwelago pele go di amogela go tšwa letsogong la Modimo. Ke Moabedi wa rena gomme re a Mo leboga ka ge a re kgontšha. Modimo a go šegofatše.”

Habakuku o rapetše go Habakuku 3:17-19: “Le ge mego e ka se khukhuše, le merara ya se enywe, le ge puno ya mehlware e ka pala, le mašemo a se be le dijo, le ge mašaka a ka felelwa ke dihuswane, le meraka ya dikgomo ya se be le selo, nna ke tla no thaba ka thakgala, gobane Morena Modimo ke Mophološi wa ka. Morena, Mong wa bohle, o mpha maatla. O ntshepetša gabotse bophelong, ka swana le kgama dithabeng, a ba a ntshepediša ke bolokegile le mebotong.” Go phetolelo ye nngwe ya Bibele re bala mantšu a Habakuku bjalo ka: “Tumelo ya ka go Modimo ga e laole ke ge e ba dilo di sepela gabotse goba aowa.”

A re tšweleng pele go nyaka sefahlego sa Modimo – dinakong tše botse le tše mpe (2 Dikronika 16:9). Ke na le nnete ya gore legodimo le a ema ge Modimo a lebelela fase a bona yo mongwe wa rena, ka gare ga bohloko, komelelo, manyami, tobo goba boemo bjo hlohlago, a ema le, ka difahlego tša rena di lebeletše legodimong (ka dinako tše dingwe ka maatla a rena a mafelelo) go tumiša Modimo bjalo ka sešupo sa gore re a mo tshepha go re fa katlego. Gomme, ka go bona dipelo tša rena, O a tseba, gore le ge A ka se ke a refa katlego, re tla Mo tumiša ka gobane re A mo rata. Modimo a go šegofatše.