Ke tla – Letšatši la 2

Go be go fiša. Go fiša kudukudu. Bahlankedi bao ba bego ba swanetše go lahlela Shadraka le Meshaka le Abednego ka moubelong wo o laumago mollo ba ile ba hlokafala ka lebaka la phišo. Lega go le bjalo, bagwera ba bararo ba ile ba gana go khunamela seswantšhobopša kua Babilonia.

Estere a tšea kgato ya go yo bona kgoši – ntle le taletšo. O tsebile gore ge kgoši e ka se mo šupe ka molamo wa gagwe wa bogoši go thabela bogona bja gagwe, o tla hlokafala.

Gomme Dafida, ka maswika a mahlano ka morabeng wa gagwe le seragamabje, a ya go senatla Goliate wa dimetara tše tharo ka botelele, a tseba gore a ka fenya goba go lahlegelwa ke ntwa.

Ditiro tše tharo tša tumelo le kholofelo go Modimo, tšeo di se nago kgonthišetšo goba bohlatse bjo kago bonwa bja gore ba tla phela. Theeletša mantšu a tumelo a Shadraka le Meshaka le Abednego go Daniele 3:17-18 ge Kgoši Nebukadnesare a tšhošetša go ba lahlela ka moubelong wo o laumago mollo: “Ge Modimo yo re mo hlankelago a kgona go re hlakodiša moubelong wa mollo wo o laumago le diatleng tša gago, kgoši, gona yena o tla re hlakodiša. Fela le ge a ka se re hlakodiše, wena kgoši, tseba gore modimo wa gago wona re ka se o direle, le seswantšhobopša sa gauta se o se hlomilego re ka se se khunamele.” Go Estere 4:16 Estere o boditše Mordekai go kgopela batho ba Israele go rapela le go itima dijo le yena pele a ya go yo bona kgoši. Theeletša ka fao a rumago poledišano ya bona: “Ka morago ga moo ke tla ya go kgoši, le ge molao o gana. Ge eba ka go dira bjalo ke tla hwa, gona ke tla no hwa.” Gomme go 1 Samuele 17:45-46 Dafida o re go Goliate: “O tla go nna ka tšhoša le lerumo le letsolo, eupša nna ke tla go wena ka leina la Morena Ramaatlaohle, Modimo wa Baisraele, yo o mo nyaditšego. Lehono le Morena o tla go gafela diatleng tša ka; ke tla go fenya mme ka go ripa hlogo.”

Ekaba ga bjale o itemogela boemo moo le wena o hlokago go tšea kgato ya tumelo ntle le go tseba ditlamorago – mohlomongwe lefelong la gago la mošomo, ditswalanong, ditšheleteng goba sepheto mabapi le bokamoso bja gago? Theeletša mantšu go Baheberu 11:1: “Tumelo ke bonnete bja tše re holofelago gore di tla hlaga, ke go kgolwa tše re sa di bonego.”

Ka gobane Shadraka le Meshaka le Abednego ba tsepeleditše mahlo a bona go Modimo, A ba phološa moubelong wo o laumago mollo meriri ya bona e sa tlaboga dihlogong tša bona (se sa dira gore Kgoši Nebukadnesare a dumele go Modimo). Modimo o kgontšhitše Estere go phuphuthela kgoši gore Bajuda ba se bolawe (setšhaba se Jesu a belegetšwego go sona morago). Gomme Modimo a thuša Dafida go fenya Goliate wa senatla.

Modimo a ka dira ka mo go swango go rena. A re gopoleng gore tumelo ya rena e bontšhwa ke ka fao re dirago ka gona ge go sena bohlatse bjo kago bonwa goba kgonthišetšo ya gore katlego ya rena e tseleng. Modimo a go šegofatše.