Ke tla – Letšatši la 11

Letšatši le lengwe ke bone seswantšho sa monamedi wa maphoto yo a bego a le tee ka meetseng kgauswi le Strandfontein ka ntle ga Cape Town. O be a sa bone dihlapi tše kgolo tša dišaka tšeo di bego di rutha go mo dikologa. Motšeadiswantšho o anegile ka fao a akaletšego godimo ga monamedi wa maphotho ka helikoptara ya gagwe metsotso e mehlano gomme a bona dišaka tše tharo tšeo di bego di le bokgole bja dimetara tše 100 le monamedi wa maphoto. Lega go le bjalo, monamedi wa maphoto o be a sa di bone – le e tee ye e fitilego ka tlase ga papetla ya gagwe.

Lehodu lona le tlela go utswa le go bolaya le go lobiša (Johanese 10:10). O lebelela ditsela tša go re kweša bohloko le go šomiša “dišaka” ka sebopego sa ditlhohlo lefelong la mošomo, matšhošetši a pankoroto, lesebo go senya semelo, thulanano le yo o mo ratago, go goketšana le motho ka ntle ga lenyalo la gago goba le gaešita le bano ba gago ba sotlwa sekolong. “Dišaka” tše di tla tlatša ka go se ikwe gabotse, pelaelo le gaešita letšhogo.

Lega go le bjalo, selo se tee se re swanetšego go se gopola ke gore Modimo, bjalo ka motšeadiswantšho ka gare ga helikoptara, o na le mmono fapanego. O bona “šaka” ye nngwe le ye nngwe – le tšeo rena re sa di bonego. Go Pesalome 33:13-14 re bala gore: “Morena o lebelela a le legodimong, mme o bona batho bohle. O lebelela badudi bohle ba lefase a dutše setulong sa gagwe sa bogoši.”

Modimo ga a bone fela dišaka, eupša O kgona go re šireletša go tšona. Go Jesaya 41:10 re bala gore: “Le se ke la boifa – ke na le lena! Le se ke la lealea – ke nna Modimo wa lena! Ke a le tiiša, ke a le thuša, ke a le šireletša, ke le hlakodiša ka maatla a ka.” Go Pesalome 23:4 re bala gore: “Le ge nka sepela molapong wo o šiišago, nka se boife selo …” Gomme go Pesalome 121 go ngwetše gore: “Ke lelalela kua dithabeng; ke botile go thušwa ke mang? Ke botile go thušwa ke Morena, Mohlodi wa legodimo le lefase. A ka se go lese o kgopša; Mošireletši wa gago ga a potume. Ee, Mošireletši wa Israele ga a potume, le gona ga a robale. Morena ke Mošireletši wa gago; o šika le wena go go leta. Letšatši le ka se go dire selo mosegare, le ge e le wona ngwedi bošego. Morena o tla go šireletša kotsing tšohle, o tla šireletša bowena bja gago ka moka. O tla go šireletša mayong le maboong a gago, gonabjale le go ya go ile.”

A re tseneng ka gare ga beke ye re tseba gore Modimo o gona gohle gape ke Mošireletši wa rena. O bea hoko ya tšhipi go re dikologa, gomme ge re ikwa o ka re re godimo ga papetla ya go namela maphoto, ka meetseng le dišaka tše di re batamelago. A re lebogeng Yena ka tšhireletšo yeo. Modimo a go šegofatše.