Bible Society of South Africa
Dithulaganyo tša go bala
Ke monna
Ke monna – Letšatši 8

Ke monna – Letšatši 8

KA DINAKO TŠE DINGWE O A TLAIŠEGA

O lemoga gore se sengwe le se sengwe bophelong bja gagwe ga se no phela se sepela ka thelelo. O kwa bohloko ge dilo tša go se kgahliše di mo diragalela, ka dinako tše dingwe e le ka lebaka la dikgetho tša gagwe. Efela go na le mabaka a mangwe ao a mo kwešago bohloko ao a senago taolo go wona. Ka dinako tše dingwe o palelwa ke go itokolla go mabaka ao a fetilego, efela ka dinako tše dingwe o kgona go bolela le Modimo ka ga ditlaišego tša gagwe le go itebanya le bohloko. Gomme o lemoga gore godimo ga tšohle tšeo di kilego tša direga pele, a ka thoma ka bofsa.

Gomme o humana: Ke monna!

(Di)temana ya Bibele

JOBO 1

Bana ba Jobo ba a bolawa, gomme lehumo la gagwe le a senywa

13Ya re ka tšatši le lengwe ge bana ba Jobo ba le monyanyeng ka lapeng la mogolwabona, 14gwa tla motseta go Jobo, a re: “Re be re lema ka dipholo gomme dipokolo tšona di fula kgauswi. 15Gateetee ke ge Basheba ba re wela godimo gomme ba di thopa tšohle. Ba bolaya bahlanka ba gago ka moka ka ditšhoša. Ke nna fela ke tšhabilego gore ke tle ke go tsebiše.”

16Ya re a sa bolela, gwa fihla yo mongwe, a re: “Legadima le rathile dihuswane la di bolaya gotee le badiša. Ke nna fela ke tšhabilego gore ke tle ke go tsebiše.”

17Ya re a sa bolela, gwa tla yo mongwe, a re: “Makoko a mararo a Bakaldea a re hlasetše, a thopa dikamela, a bolaya le bahlanka ba gago bohle ka ditšhoša. Ke nna fela ke tšhabilego gore ke tle ke go tsebiše.”

18Ya re a sa bolela, yo mongwe a fihla, a re: “Bana ba gago ba be ba le monyanyeng ga morwago yo mogolo 19ge go etla ledimo la go tšwa lešokeng. La šikinya ntlo yohle, gomme ya ba wela godimo, ya ba bolaya ka moka. Ke nna fela ke tšhabilego gore ke tle ke go tsebiše.”

20Ke moka Jobo a emelela, a gagola diaparo tša gagwe a nyamile. A ipoola hlogo, a itahlela fase ka sefahlego, a rapela 21a re: “Ke tlile lefaseng ke le fela, gomme ke tla tloga lefaseng ke le fela. Morena o be a file, mme bjale o tšere. A a retwe!”

22Le ge Jobo a hlagetšwe ke dilo tšeo ka moka, ga se a ka a dira sebe ka go sola Modimo.

JOBO 1:13-22NSO00Bula go Mmadi wa Bibele

2 DIKGOŠI 20

Bolwetši bja Kgoši Hiskia le go fola ga gagwe

1Mehleng yeo Kgoši Hiskia a swarwa ke bolwetši gomme a nyako hwa. Moprofeta Jesaya, morwa wa Amotse, a ya go yena a re: “Morena o re: ‘Beakanya tša lapa la gago, ka gobane o ka se fole; o tla hwa.’ ”

2 DIKGOŠI 20:1NSO00Bula go Mmadi wa Bibele

2 DIKGOŠI 20

2Hiskia a phekgoga a lebelela lebotong gomme a rapela a re: 3“Hle, Morena, gopola gore ke go hlanketše ka potego le botshephegi, le gore ka mehla ke dirile tše o bego o nyaka ke di dira.” Gomme a thoma go lla gabohloko.

2 DIKGOŠI 20:2-3NSO00Bula go Mmadi wa Bibele

GENESE 26

Basadi ba šele ba Esau

34Ge Esau a na le mengwaga ye masome a mane, o ile a nyala basetsana ba babedi ba Bahete, Judite, morwedi wa Beeri, le Basemate, morwedi wa Elone. 35Bona ba ile ba galakišetša Isaka le Rebeka bophelo.

GENESE 26:34-35NSO00Bula go Mmadi wa Bibele

EKSODOSE 2

13Ge a eya gape ka letšatši le le latelago, a makala a hwetša banna ba babedi ba Baheberu ba elwa. A re go yoo a nago le phošo: “A o itielang Moheberu wa geno?”

14Mme yoo a mo fetola a re: “Ke mang a go beilego mmuši le moahlodi wa rena? A o ikemišeditše go mpolaya bjalo ka ge o bolaile Moegepeta?” Ke moo Moshe a tšhogilego mme a kgotsa a re: “Kganthe taba yela e a tsebja!”

15-16Ya re ge kgoši a ekwa taba ye, a nyaka gore Moshe a bolawe, eupša Moshe a tšhaba a yo dula nageng ya Midiane.

Moprista wa Midiane o be a na le barwedi ba ba šupago. Ka letšatši le lengwe ge Moshe a dutše sedibeng, barwedi ba moprista ba tla fao go gelela meetse le go tlatša magopo gore ba noše dihuswane tša tatagobona.

EKSODOSE 2:13-16NSO00Bula go Mmadi wa Bibele

2 BAKORINTE 12

7Fela gore ke tle ke se ikgogomoše ka tše di makatšago kudu tše ke ilego ka di utollelwa, ke ile ka kgontlhetšwa phatša nameng, phatša ye e bego e itirile moromiwa wa Sathane wa go ntlaiša gore ke fele ke ikokobetša. 8Ka rapela Morena gararo ke mo kgopela gore a ntlhomole phatša yeo. 9Yena a mphetola ka go re: “Kgaugelo ya ka e go lekane, gobane maatla a ka a tiile kudu mo go ba ba fokolago.” Ka gona ke kgahlwa kudu ke go itheta ka mafokodi a ka, gore maatla a Kriste a tle a dule mo go nna. 10Ke ka lebaka leo ke kgotsofatšwago ke go rwala mafokodi le mahlapa le mathata le dihlomaro le ditlaišego ka lebaka la Kriste. Gobane ge ke fokola ke mo ke nago le maatla.

2 BAKORINTE 12:7-10NSO00Bula go Mmadi wa Bibele

Pesalome 22

Sello sa molahlegi le phološo ya gagwe

Go tsebišwa moopediši gore e opelwe ka moopelo wa kopelo “Kgama ya Mahube”. Ke pesalome ya Dafida.

1Modimo wa ka, Modimo wa ka,

o ntlogeletšeng?

Ke golola ke nyaka thušo,

eupša o no fela o le kgole le nna.

2Mosegare ke hlwa ke go llela,

Modimo wa ka,

eupša ga o nkarabe;

le bošego ke lala ke go llela,

eupša khomotšo ga ke e hwetše,

3etšwe o dutše sa borena o le Mokgethwa,

moo go kwalago direto tša Israele.

Pesalome 22:1-3NSO00Bula go Mmadi wa Bibele

Pesalome 22

11Hle, se nkatologe,

ditlaišego di kgauswi!

Ga go yo a ka nthušago.

12Manaba a mantši a ntikaneditše bjalo ka dipoo,

a ntikologile boka dipoo tše šiišago tša Bashane.

13A nkahlamela bjalo ka tau ye e gabutlago e rora.

14Ke bjalo ka meetse a a tšhologilego;

marapo a ka ka moka a a kgwelekgwehla;

pelo ya ka e tologa bjalo ka moti.

15Magalagapa a ka a gagaletše boka lekopelo,

leleme le kgomaretše mehlagare.

O nthapaladitše gore ke hwele thogorogong.

Pesalome 22:11-15NSO00Bula go Mmadi wa Bibele

Pesalome 121

Morena ke Mošireletši wa rena

Ke sefela sa ge go iwa Tempeleng Jerusalema go rapela.

1Ke lelalela kua dithabeng;

ke botile go thušwa ke mang?

2Ke botile go thušwa ke Morena,

Mohlodi wa legodimo le lefase.

3A ka se go lese o kgopša;

Mošireletši wa gago ga a potume.

4Ee, Mošireletši wa Israele ga a potume,

le gona ga a robale.

5Morena ke Mošireletši wa gago;

o šika le wena go go leta.

6Letšatši le ka se go dire selo mosegare,

le ge e le wona ngwedi bošego.

7Morena o tla go šireletša kotsing tšohle,

o tla šireletša bowena bja gago ka moka.

8O tla go šireletša mayong le maboong a gago,

gonabjale le go ya go ile.

Pesalome 121:1-8NSO00Bula go Mmadi wa Bibele

DITIRO 26

Paulose o anega tša tshokologo ya gagwe

12“Ke sona se ke bego ke se etše Damaskose ke filwe ke baprista ba bagolo maatla le ditaelo. 13Ya re ge ke le tseleng mosegare wo mogolo, mong wa ka, ka bona seetša se se tagago go feta letšatši se etšwa legodimong sa re gadimela ka mathoko ohle, nna le banna ba ba bego ba sepela le nna. 14Ka moka ra wela fase, gomme nna ka kwa lentšu le mpotšiša ka Seheberu le re: ‘Saulo, Saulo! O ntlhomaretšeng? Gape go nkgwabela ga gago ke go ikgobatša.’ 15Nna ka botšiša ka re: ‘Ke wena mang, Morena?’ Gomme Morena a mphetola a re: ‘Ke nna Jesu yo o mo hlomerego. 16Fela emelela. Ke itšweleditše mo go wena gore ke go bee mohlanka wa ka le hlatse ya ditaba tša ka tše o di bonego le ya tše ke sa tlilogo go bontšha tšona. 17Ke tla go hlakodiša go setšhaba sa geno le go baditšhaba ba ke go romago go bona. 18O swanetše go ba foufolla, gore ba tšwe leswiswing ba ye seetšeng, ba tšwe maatleng a Sathane ba ye go Modimo, gore ka go dumela go nna ba swarelwe dibe tša bona, gomme ba fiwe bohwa bja ba ba kgethilwego ke Modimo.’ ”

Paulose o anega tša modiro wa gagwe

19“Ka gona, Kgoši Agripa, nna ga se ka nyatša pono ya se ke se bonego se etšwa legodimong.

DITIRO 26:12-19NSO00Bula go Mmadi wa Bibele

GENESE 39

19Mong wa Josefa a befelwa kudu 20gomme a laela gore Josefa a swarwe, a tsenywe ka kgolegong yeo bagolegwa ba kgoši ba bego ba tswaleletšwe ka go yona, gomme a dula fao. 21Fela Modimo a ba le Josefa mme a mo šegofatša gore rakgolego a mo thabele. 22A bea Josefa mohlokomedi wa bagolegwa ka moka, le wa tšohle tše di dirwago ka kgolegong. 23Rakgolego a se hlwe a tlemegile go hlokomela selo se se bego se le diatleng tša Josefa, ka gobane Morena o be a na le yena, gomme a atla se sengwe le se sengwe se a se dirago.

GENESE 39:19-23NSO00Bula go Mmadi wa Bibele

GENESE 45

3Josefa a re go bomorwarragwe: “Ke nna Josefa. A tate o sa phela?” Fela bomorwarragwe ba be ba mmoifa moo e lego gore ba ile ba se ke ba mo fetola. 4Ke moo Josefa a itšego go bona: “Hle, batamelang.” Ba batamela, gomme a re: “Ke nna ngwanabolena, Josefa, yola le mo rekišitšego Egepeta. 5Bjale le se ke la tshwenyega goba la itshola ka ge le nthekišitše fa. Gabotsebotse ke Modimo yo a nthometšego mo pele ga ge le etla, gore ke tle ke phološe malapa a lena. 6Wo e sa le fela ngwaga wa bobedi wa tlala nageng; go tla ba le mengwaga ye mehlano gape yeo ka yona go ka se kego gwa lengwa goba gwa bunwa. 7Modimo o nthometše mo pele ga ge le etla gore a tle a phološe ba bantši ba lena, gore le se ke la hwa la felela mo lefaseng. 8Ga se lena le nthometšego mo, ke Modimo. O ntirile mohlankedi yo mogologolo wa kgoši. Ke okametše lapa la gagwe lohle; ke nna mmuši wa Egepeta ka moka.

GENESE 45:3-8NSO00Bula go Mmadi wa Bibele

DITIRO 16

22Batho ba motse le bona ba ba tsogela maatla.

Mantona a laela gore ba kgeilelwe diaparo, ba be ba bethwe ka thupa. 23Ba re go ba betha gasehlogo ba ba lahlela kgolegong, gomme ba laela rakgolego gore a ba diše gabotse. 24Yena o rile go laiwa bjalo, a ba lahlela ka phapošing ya ka garegare, a ba pataganya maoto ka dikota.

25E rile mo gare ga bošego Paulose le Silase ba rapela ba opelela Modimo difela, gomme bagolegwa ba bangwe ba be ba theeleditše.

DITIRO 16:22-25NSO00Bula go Mmadi wa Bibele

  • Le ge a direla Modimo, dilo tša go se kgahliše di no fela di mo diragalela ka dinako tše dingwe
  • O tlaišwa ke bolwetši bja go se alafege
  • O tlaišega ka lebaka la dikgetho tša ngwana wa gagwe tše sa lokago
  • Tšeo a di dirilego nakong ya go feta di a mo tshwenya
  • Go na le mafokodi bophelong bja gagwe
  • Ka dinako tše dingwe o kwa bodutu ebile a le bokoa
  • Efela o a lemoga gore Modimo o tla mo thuša gape
  • O a tseba gore a ka thoma ka bofsa godimo ga tšohle tšeo di kilego tša mo diragalela
  • O a tseba gore Modimo o na le yena ka mehla le ge a tlaišega
  • Le ge a tlaišega o a tseba gore Modimo o na le maikemišetšo a magolo ka bophelo bja gagwe
  • O roriša Modimo le ge a tlaišega

Bible Society of South Africav.4.26.9
RE HWETŠE GO