Ke mang Monna yo? – letšatši la 11

Mohlolo wa meetse ao a fetošitšwego beine e be e le seka. Modimo o šomiša seo go re laetša gore se sengwe. Jesu o lemogile gabotse gore go bile le go se thabe monyanayeng wa lenyalo ka ge beine e be e fedile. Bothata bjo bjo bonnyane bo laetša bothata bjo bogolo. Gomme mpho ya Jesu ya go fetoša meetse go ba beine, e šišinya mpho e kgolo kudu.Seka se se re dumelela go bona gore Jesu o tlile go phethagatša dinyakwa tša rena tše kgolo. Ka tsela ye e swanago ge monyanya wa lenyalo o sa thabiše ka ntle le beine, bophelo ntle le Modimo ke boikaketši gomme ga bo na lethabo la kgonthe.

Mo, mathomong a boruti bja Jesu lefaseng, o hlalošitše gabotse: ke tlile go dira selo se sebotse ka maphelo a lena. Le ka se kgone go dira ka bolena, eupša ke nyaka go le fa sona. Go a makatša gore Jesu, go dilo ka moka, o šomišitše meetse a go hlwekiša go dira beine. Bajuda ba be ba na le melao ya go fapanafapana. Ge o be o obamela melao yeo, Modimo o be a ba amogela, ba nagana bjalo. Dinkgo tša meetse a go hlwekiša e be e le sešupo sa maiteko a manyami a batho go ka dira se sengwe ka maphelo a bona. Jesu ke yena fela yo a ka go hlwekišago le go go dira gore o amogelege go Modimo. Ga go na pakete ya go ka ikaonafatša. Ga re na tumelo ya go ka dira ka bowena.

Ntle le beine, ga go na monyanya. Ntle le Jesu, bophelo e ka se be monyanya. Go keteka ntle le Modimo ke selo seo se ka se naganišišwego.

Mathomo a mabotse – nagana se ge o dira nako ya go nagana ka Jesu. Bophelo ntle le Kriste bo bjalo ka monyanya wa lenyalo ntle le beine. Jesu o hlalošitše gabotse, mathomong, go re O tlile go tliša tše ntši, lethabo le le ntši le nyakalalo.