Bible Society of South Africa
Dithulaganyo tša go bala
Jesu ka go Testamente ye Tala
Jesu ka go Testamente ye Tala - Letšatši la 7
Gerhard Lindeque

Jesu ka go Testamente ye Tala - Letšatši la 7

Lerato la Modimo

(Di)temana ya Bibele

JOSHUA 6

22Ke moo Joshua a boditšego banna bale ba babedi ba e bego e le dihlodi a re: “Yaang ngwakong wa segwebakathobalo sela, mme le mo ntšheng gotee le ba ba nago le yena, bjalo ka ge le enne.” 23Ka gona ba ya ba ntšha Rahaba gotee le tatagwe le mmagwe le dikgaetšedi le bohle ba ba nago le yena. Ba tšea lapa leo labo ka moka ba le iša mo go bolokegilego kgauswi le mešaša ya Israele. 24Ka morago ba tšhuma motse thokgethokge gotee le se sengwe le se sengwe go wona, ntle le dilo tše di dirilwego ka gauta, goba silibera, goba mphiri, goba tshipi. Dilo tše ba ile ba di bea polokelong ya Morena. 25Ge e le Rahaba, segwebakathobalo sela, le meloko yabo ka moka, Joshua o ile a ba phološa, ka gobane Rahaba o be a ile a uta dihlodi tšela tše pedi tše Joshua a bego a kile a di roma Jeriko. Ditlogolo tša Rahaba di dutše gare ga Baisraele go fihlela le lehono.

JOSHUA 6:22-25NSO00Bula go Mmadi wa Bibele

JOSHUA 9

21Ba leseng ba phele, fela ba tla swanelwa ke go re rwalelela dikgong le go re gela meetse.” Gwa ba ka mo baetapele ba boletšego ka gona.

22Joshua a laela gore batho ba Gibeone ba tlišwe go yena, gomme a ba botšiša a re: “Ke ka lebaka lang le re radiile la re botša gore le tšwa kgole kudu, mola e le gore le dula gona mo? 23Ka gobane le dirile taba yeo, le rogakilwe! Ka mehla le tla ba makgoba a go rwalela dikgong le a go ga meetse a sekgethwa sa Modimo wa ka.”

24Ba mo fetola ba re: “Re dirile taba ye, morena, ka gobane re ile ra kwa gore ka nnete Morena Modimo wa lena o ile a laela mohlanka wa gagwe, Moshe, gore a le fe naga ye ka moka, le go bolaya batho ba ba dulago go yona ge le goroga. Re dirile taba yeo ka gobane re be re tšhogile kudu – re boifa gore re tlile go bolawa. 25Bjale re diatleng tša gago; dira ka rena ka moo o bonago go swanetše.” 26Ka gona Joshua a ba šireletša, gomme Baisraele ba se ke ba ba bolaya. 27Eupša ka lona letšatši leo a ba dira barwaledi ba dikgong le bagi ba meetse a setšhaba sa Israele le a aletare ya Morena. Le lehono ba sa dira mošomo woo felong fao Morena a kgethago gore a khunamelwe gona.

JOSHUA 9:21-27NSO00Bula go Mmadi wa Bibele

Go ngwadilwe dipulpiting tše ntši ka dikerekeng: Lerato la Modimo. Na lerato le lebega bjang? Jesu Kriste o le bontšhitše ka mediro. Ga a ahlole mosadi yo a sa hlwekago ge a mo kgwatha. O batametša bana kgauswi le go fodiša batho gore ba kgone go kgatha tema tirelong ya tempeleng gape. Jesu o bontšhitše gore lerato la Modimo le kgontšha batho, bao ba bego ba sa akaretšwe ke melao ye mengwe, go itemogela kwelobohloko ya Modimo le batho gape.

Go na le selo sa go swana sa go kgahliša ka ditiro tša Jesu le Joshua ka go Testamente ye Tala. Le ge taelo e be e le go fediša motse le tšohle ka gare go wona, Joshua ga a bolaya segwebakathobalo, Rahaba, le batho ka moka bao ba bego ba le ka ntlong. Se swanago gape se a direga ka ba Gibeone. Le ge ba be ba sa bolele nnete, Joshua ga se a ba bolaya fela, eupša gape o ba neile monyetla wa go hlankela ka tempeleng. Mabakeng a a mabedi, ditiro tša Joshua di latelwa ke diphenyo tše kgolo. Se se fetiša ka mo go kwagalago molaetša wa wa gore tšhegofatšo ya Modimo ga se ya fela bao ba latelago melao. Lerato la Modimo le dira sebaka sa mafokodi a rena le diphošo.

Dipoelo ke gore molao o bohlokwa wa lerato gape o tlo laola ditiro tša rena go batho ba bangwe. Se se hlaloša gore re tla ba le kwelobohloko go dinyakwa tša batho. Lerato ke go dira se sengwe. Ke go nea batho dijo, diaparo le dintlo, gomme o dire nako go batho ba ba babjago, ba ba robegilego le bao ba lewago ke boduto. Go hlankela Modimo ga go mabapi fela le go latela lenaneo la ditaelo. Re hlankela Modimo ka go hlokomela batho ba bangwe. Re bontšha lerato la Modimo ka go ba le botho le kgotlelelo.

Jesu o tlile go re ruta go lebelela batho ka mo go fapanego le maemo a bona. Re ka se ye go batho ka tsela e šoro, ka gobane Modimo ga a bjalo. Re swanetše go lemoga gore batho ba bangwe ba bona le go itemogela Modimo go rena. Seswantšho sa batho ba bangwe sa Modimo se bopša ke seswantšho sa Modimo seo nna le wena re se bontšhago.

Bible Society of South Africav.4.26.9
RE HWETŠE GO