Jesu ka go Testamente ye Tala - Letšatši la 5
Modimo wa legodimo le lefase
(Di)temana ya Bibele
GENESE 28
Toro ya Jakobo Bethele
Jesu Kriste o tlile go re ruta go nagana ka Modimo bjalo ka Tatewešo wa magodimong. Modimo o a re hlokomela bjalo ka tate ge a hlokomela bana ba gagwe. Ga re a swanela go boifa Modimo. Re ka bolela ka go lebanya go Modimo ka thapelo. Jesu Kriste ke tsela e nnoši ya go fihlilela Modimo Tate.
Jesu gape o re netefaletša gore maatla ka moka legodimong le lefaseng ka ya gagwe. O re holofetša gore ka mehla o na le rena, go fihla mafelelong a lefase. Ke khomotšo e kgolo kudu go tseba gore Modimo ka mehla o bogoneng bja rena, go sa šetšwe nako le lefelo. Ka dinako tše dingwe, se e ka ba kgopolo ye e boifišago. A re lebeleleng Jakobo.
Jakobo o be a boifa Modimo ka gobane e le sehwirihwiri. O lekile go utamela Modimo le go ikutamela. Le ge go le bjalo, o bile le letswalo la molato. Torong ya gagwe, o hwetša kutollo ya go makatša ya gore Modimo o be a na le yena ka mehla – go sa šetšwe bohwirihwiri bja gagwe. Modimo o dira dikholofetšo tše mmalwa go Jakobo! Ge Jakobo a itemogela kgaugelo ye e ka se hlalošwego le khomotšo, go bile o ka re o tlile gae ntlong ya Modimo. Torong ya gagwe, o bone manamelelo a go tloga lefaseng go ya legodimong; e be e le kgokagano magareng ga legodimo le lefase. Legodimo le bulegile; Modimo ga a legodimong fela, eupša gape o na le rena lefaseng.
Na tše ga se ditaba tše botse go rena? Bogona bja Modimo ga se selo se re swanetšego go se boifa. Ga go selo se se ka re aroganyago le lerato la Modimo.
Pesalome 139:7-10 e e bea ka tsela ye: “Na nka go tšhabela kae? Ke kae mo nka go khutelago gona? Ge nka rotogela legodimong, ke yo hwetša o le gona … Ge nka fofela kua bohlabatšatši, goba ka yo dula ka mafelelong a bodikelatšatši, le gona moo o tla ntlhahla ka seatla sa gago, o tla ntshwara ka seatla sa la go ja.”
