Go Thoma ka Leswa – Letšatši la 9

A re re o rata diperekisi eupša mmele wa gago o ganana le matšhidi. Lethabong la gago la ntlo ya gago e mpsha, o ema bomidišetšong go reka mohlare wa diperekisi go yo o gaša ka mafuri a šarata ya gago. O tla tseba bjang ka nnete gore o reka mohlare wa diperekisi, ge dihlare ka moka ka bomidišetšong di se na dikenywa? O tla swanela ke go leta go fihla ge mohlare o khukhuša o tšweletša dikenywa.

O tla ikarabela bjang ge o ka hwetša, morago ga dikgwedi tša go hlokomela mohlare ka manyora le meetse, gore mohlare o tšweleditše ditšhidi e se diperekisi?

Rena badumedi re ka bapetšwa le dihlare bomidišetšong. Go lefase, ka moka re a swana. Ke fela ge re thoma go tšweletša dikenywa mo re tlago tsebja ka nnete ge eba re bana ba Modimo. Teko ya nnete go tseba ge eba re tšweletša dikenywa tša Moya wo Mokgethwa ke go lebelela boikarabelo bja rena dinakong tše boima.

Naa o laola pefelo ya gago dinakong tša kgateletšego? Ke eng boikarabelo bja gago go maemo ao o ka se a laolego lefelong la gago la mošomo? Ke eng boikarabelo bja gago ge o le boemong bjo o nago le mabaka a go lefeletša bobe ka bobe? Naa o kgetha lerato, lethabo, khutšo, bopelotelele, botho, go loka, potego, boleta le boitshwaro? Goba, o kgetha go tšweletša dikenywa tša go tsoša mpherefere, pefelo le go duma?

Go Bagalata 5:19-23, re bala ka mehuta e fapanego ya dikenywa:

MOHUTA WA 1: DIKENYWA TŠA NAMA
Bagalata 5:19-21: “Tše di dirwago ka go hlohleletšwa ke nama di pepeneneng: ke bogwebakathobalano, le bootswa, le bofebe, le go khunamela medingwana, le boloi, le lehloyo, le phapano, le tseba, le kgalefo, le bojato, le tshele, le dihlophana, le mona, le botagwa, le bohlola, le tše di swanago le tšeo. Ke a le botša, bjalo ka ge ke ile ka le botša pele, ke re ba ba dirago tše dibjalo ba ka se be le bophelo bjo bo sa felego.”

MOHUTA WA 2: DIKENYWA TŠA MOYA WO MOKGETHWA
Bagalata 5:22-23: “Dikenywa tša Moya tšona ke lerato, le lethabo, le khutšo, le bopelotelele, le botho, le go loka, le potego, le boleta, le boitshwaro. Tša mohuta woo ga go molao wo o di ganago.”

Naa o tšweletša diperekisi goba ditšhidi dikaleng tša gago? Ke nyaka go le hlohleletša gore ditiro tša lena di bontšhe bogona bja Moya wo Mokgethwa bophelong bja gago. Modimo a go šegofatše.