Go Thoma ka Leswa – Letšatši la 11

[Bokamorago: Hlakola ke kgwedi ya lerato. Letšatši la 14 la Hlakola le tletše ka dineo, ka nageng ka moka, bjalo ka tšhupetšo ya lerato. Le ge go le bjalo, re lebala tšhupetšo e kgolo ya lerato, dinakong ka moka, ge Modimo a rometše Morwa wa gagwe.]

“Mayday, mayday…” Yeo e be e le pitšo ya kgateletšego ya mofofane wa Engelane nakong ya Ntwa II ya Lefase. Yena le sehlopha sa gagwe ba be ba le lesolong la go lahlela dipomo go Toitši. Madira kua fase a bethile sefofane gomme se be se lahlegelwa ke bophagamo ka pela. Mofofane a ba tlalelong e kgolo kudu.

Ka gare ga sefofane, madira a be a golola ka go kwa bohloko. Kapelane wa madira a difofane, yo a utamilego ka gare ga mmele wa sefofane, e be e le yena fela yo a bego a sa gobatšwa nakong ya tlhaselo. Mofofane o šomišitše maatla a gagwe ka moka go leka go fofiša sefofane ka godimo ga thaba ya kgauswi. Legetleng la gagwe, a goeletša kapelane gore a lahlele fase merwalo e mentši ka mo a ka kgonago, ka maiteko a tlalelo a gore sefofane se be bofefo. Kapelane a obamela taelo, eupša sefofane se be se sa le boima gomme thaba e be e le kgauswi kudu. Ba be ba tla hwa?

Mofofane a tswalela mahlo a gagwe gomme, a le gare a goeletša, a goga ka maatla dinaka tša sefofane. Pele sefofane se ka thula thaba, ka pejana sa rotoga gomme sa nyaka go thula mehlare le ntlhora ya thaba. Ge a bona Mokero wa Engelane, mofofane a goeletša a imologile, “Kapelane, re phologile!” Go bile le setu ka sefofaneng. Morago ga metsotso e mmalwa, mofofane a lebelela legetleng la gagwe go hwetša kapelane. O ile a tšhoga ge a lemoga gore kapelane ga e gona ka sefofaneng. Ge a lemoga gore sefofane se be se imela go ka fofa ka godimo ga thaba, kapelane o tabogile a tšwa ka sefofaneng go phološa maphelo a bafofane.

Naa o a lemoga gore Jesu, sefapanong Khalbari, o dirile ka mo go swanago go rena mengwaga ye 2000 ya go feta? O lemogile gore re ka se tsoge re eme ntle le sebe pele ga Modimo. Ka go ithaopa a gafa bophelo bja gagwe go phološa rena go go sa felego ka ntle le Modimo.

Bala mantšu go Johanese 3:16: “Gobane Modimo o ratile lefase kudu mo a ilego a ba a le fa Morwa wa gagwe a le noši, gore mang le mang yo a dumelago go yena a se lahlege, eupša a be le bophelo bjo bo sa felego.” Le lehono, Jesu o dutše kgauswi le Modimo, o re rapelela legatong la rena: “Bjale ke mang yo a ka ba bonago molato? Gape Kriste Jesu o hwile a ba a tsošwa, a yo dula madulong a bogoši kgauswi le Modimo, gomme o re rapelela go yena” (Baroma 8:34).

Ke neng la mafelelo mo o lebogilego Modimo ka boithaopo bja gagwe bja go re fa Morwa wa gagwe? Ke neng la mafelelo mo o phetšego bophelo bjo bo šupetšago lerato la gago go Tatago? Modimo a go šegofatše.