Segwera – Letšatši la 7

Naa o gopola kanegelo ya dihlodi tše 12 tšeo di filego pego ya Naga ye e Holofeditšwego go batho ba Israele? Ka moka ba dumelelane ka dinnete tša pego; ka nnete e be e le naga ya mokhora le monono. Le ge go le bjalo, go bile le go se kwane ka tlhathollo le seo e swanetšego e be karabo ya Israele.

Banna ba lesome ba file pego e swanago. Ba rile go ka se kgonege – lenaba le be le atile kudu. Banna ba babedi ba go botega ba sebete ba boletše ka mo go fapanego. Kalebe a bolela a re, “A re napeng re ye re thope naga ya bona, ka gobane e ka se re palele” (Numeri 13:30). Go ile gwa nyakega gore banna ba ba be le sebete go bolela le go dira se ba se dirilego. Ka lebaka leo, banna ba ba babedi ba tlemagantšwe ke segwera se se theilwego go kgodišego.

Ge wena le yo mongwe e le lena fela khamphaning ya lena bao le dirago se se nepagetšego, e le lena fela sekolong sa lena bao le emelago Jesu Kriste, e le lena fela lapeng la lena goba setšhabeng bao le nago le tumelo, seo se ka le tlamaganya bjalo ka Kalebe le Joshua.

Joshua le Kalebe e be e le bagwera ka nnete le bagwera ka ditiro. E bile segwera seo se lekilwego ke nako le diteko, segwera se se bontšhitšwego ka boitlamo le ditiro. Mohlomongwe, o šegofetše go ba le mogwera bjalo ka Kalebe. Ge e ba go bjalo, hwetša tsela lehono e se fela go bolela ka fao o thabelago mogwera yo, eupša gape le go bontšha ka ditiro.