Segwera – Letšatši la 1

Ke nyaka bagwera bophelong bja ka. Ga ke re fela bagwera bao ke tlago bogela rakpi le bona goba go yo reka dieta, eupša bagwera bao ba nthatago kudu go abelana ka se Modimo a se dirago maphelong a bona. Ke nyaka bagwera bao ba ntlhohleletšago gape bao ba ikemišeditšego go mphošolla. Ke nyaka bagwera bao ba tla ntšhušago go gola gore ke be bjalo ka Kriste.

Ke nagana gore se ke se mongwadi wa Baheberu a se bolelago temaneng ye. Bjalo ka karolo ya mmele wa Kriste, re kgothaletšwa go gola go ba bjalo ka yena, ka Moya wa gagwe wo o re kgontšhago, gape le go matlafatšana le go thekgana mmeleng. Paulose o re gopotša go Baefeso 4:16: Ke yena (Kriste) a kopanyago ditho tšohle tša mmele, mme mmele wohle wa swaragana ka makopano ohle a wona. Gomme ge setho se sengwe le se sengwe se dira mošomo wa sona, mmele wohle o a gola wa imaatlafatša ka lerato. Modimo o re biditše go kitima lebelo le re le tee, eupša ka mogau o re file Mmele go re fa tlhohleletšo, thekgo le gaešita phošollo ka dinako tše dingwe.

Modimo o re file mehlala e mentši ya segwera sa Sekriste lentšung la gagwe, gomme mo dikgweding tše latelago, re tla be re hlahloba ka kelohloko maphelo a batho bjalo ka Naume le Rute, Jonathane le Dafida, Debora le Jaele, le gore ba ka re ruta eng mabapi le segwera sa kgonthe lefaseng moo o kago “fediša segwera” le motho yo mongwe gabonolo ka go kgotla konope.