Etlang go nna – Letšatši la 5

Temana ye gantši e balwago nakong ya Krisemose – seprofeto sa Mesia yo a tlago. Tlhalošo ya Jesaya ya Jesu Kriste, mo, mohlomongwe ke yona ye e kwešišwago kudu ka go Testamente ye Tala. O botša batho ba gagwe bao ba lego bothopša, le rena, gore Mesia o tlo belegwa bjalo ka ngwana. Le ge go le bjalo, ngwana yo e tla ba Morwa yo mokgethwa wa Modimo. E tla ba mmuši wa rena, Kgoši ya rena. Maina a gagwe a akaretša maphelo a rena ka moka:

bjalo ka “Moeletši yo a Makatšago”, ke bohlale ka moka (bona 1 Bakorinte 1:30);

bjalo ka “Modimo yo maatla”, ke ramaatlaohle (bona Bafilipi 4:13);

bjalo ka “Tate wa go sa felego”, ke lerato ka moka (bona Johanese 14:21);

bjalo ka “Kgoši ya khutšo”, o na le khutšo (see Bafilipi 4:7).

Seprofeto sa kgale se re gopotša gore dilo ga di direge fela le gore Kriste ga a tla fela lefaseng ka sewelo. Modimo o kgethile nakwana yeo e kgethegilego go histori bjalo ka bogare bja nako ka boyona. Dilo tšohle pele ga matswalo a Jesu di lebišitšwe go nakwana yeo e kgethwa; dilo ka moka tše di diregago ka morago ga fa di angwa ke yona ka go sa felego. Lefase la rena le be le ka se swane ge Kriste a ka ba a sa belegwa. O tlile ka nakwana, nako, le lefelo moo bophelo bja gagwe bo bego bo tla ba le mohola kudu lefaseng, mengwagakgolo e mentši. Seo e be e se ka sewelo; Modimo o kgethile nakwana yeo gore maphelo a rena a kaonafatšwe, a fetošwe le go mpshafatšwa ka tsebo ya rena ya Jesu lehono. Ka mantšu a mangwe, dilo ka moka di na le morero, leano, le nako ye e kgethigilego le tlhalošo e kgethwa.