E100 Letšatši 97 – Melaetša ya go ya go Diphuthego

₁“Ngwalela morongwa wa Modimo wa phuthego ya Efeso o re:

“Yo a swerego dinaledi tše di šupago ka seatla sa la go ja, yo a sepelago gare ga dihlomamabone tše di šupago tša gauta o re: ₂Tše le di dirago ke a di tseba; ke tseba le maitapišo a lena, le kgotlelelo ya lena, le go tenwa ke bokgopo ga lena, le gore bao ba ipitšago barutiwa etšwe e se bona le ba lekotše mme la lemoga gore ke bafeane. ₃Le na le kgotlelelo, le tlaišitšwe ka lebaka la ka, gomme ga se la lapa. ₄Eupša se ke le solelago sona ke ge le se sa nthata bjalo ka pele. ₅Gopolang gore le be le nthata bjang. Sokologang, gomme le dire tše le bego le di dira pele. Ge le sa sokologe, ke tla tla go lena ka tšea sehlomamabone sa lena madulong a sona. ₆Fela se se ka le holago ke gore le hloile tše di dirwago ke Banikolaite, bjalo ka ge le nna ke di hloile.

₇“Yo a nago le tsebe a a kwe se Moya o se botšago diphuthego.

“Yo a ka fenyago ke tla mo fa dikenywa tša sehlare sa bophelo se se lego ka Paradeising ya Modimo, a ja.”

₈“Ngwalela morongwa wa Modimo wa phuthego ya Smirna o re:

“Yo e lego Mathomo le Mafelelo a dilo ka moka, yo a ilego a hwa mme a phela gape, o re: ₉Ke tseba mathata a lena le bodiidi bja lena, fela nnete ke gore le bahumi. Ke tseba dikgobošo tše bao ba ipitšago Bajuda etšwe e se bona ba le pharago ka tšona; gape bona ke ba phuthego ya Sathane. ₁₀Le se ke la boifa tše le tlilogo hlokofatšwa ka tšona. Theeletšang! Sathane o tlilo lahlela ba bangwe ba lena kgolegong gore Modimo a le leke, gomme matshwenyego a lena a tla tšea matšatši a lesome. Le mpotegele, le ge e le gore seo se ka le iša lehung, gomme ke tla le putsa ka bophelo bjo bo sa felego.

₁₁“Yo a nago le tsebe a a kwe se Moya o se botšago diphuthego.

“Yo a ka fenyago, lehu la bobedi le ka se mo dire selo le gatee.”

₁₂“Ngwalela morongwa wa Modimo wa phuthego ya Pergamone o re:

“Yo a swerego tšhoša ya magale a mabedi o re: ₁₃Mo le dulago gona ke a go tseba, ke mo go lego setulo sa bogoši sa Sathane. Le mpotegetše, ga se la lahla tumelo ya lena, ešita le nakong yela Antipase yola wa go bega molaetša wa ka ka potego a bolailwe moo ga gabolena mo go dulago Sathane. ₁₄Fela go na le dilwana di se kae tše ke le solelago tšona: Moo go lena go na le ba ba sa kgomaretšego thuto ya Bileamo yola wa go hlohleletša Balaka go diriša setšhaba sa Israele dibe ka go ba leša didimo le go ba febiša. ₁₅Ka wona mokgwa wo mobjalo, moo go lena go na le ba ba latelago dithuto tša Banikolaite. ₁₆Bjale ge, sokologang! Ge le sa sokologe ke tla tla go lena ka pejana ka lwa le batho bao ka tšhoša ye e tšwago ka molomong wa ka.

₁₇“Yo a nago le tsebe a a kwe se Moya o se botšago diphuthego.

“Yo a ka fenyago ke tla mo fa manna a a fihlilwego. Ke tla mo fa le leswikana le lešweu leo go lona go ngwadilwego leina le lefsa le le sa tsebjego ke motho ntle le yena yoo a le fiwago.”

₁₈“Ngawalela morongwa wa Modimo wa phuthego ya Tiatira o re:

“Morwa wa Modimo yoo mahlo a gagwe a lego bjalo ka kgabo ya mollo, maoto a gagwe a phadimago baibai, o re: ₁₉Tše le di dirago ke a di tseba. Ke tseba le lerato la lena, le tumelo ya lena, le go direla ba bangwe ga lena, le go kgotlelela ga lena. Ke tseba gore tše le di dirago bjale di feta tše le bego le di dira pele. ₂₀Fela se ke le solelago sona ke gore le dumelela mosadi yola ba rego ke Isebele, a ipitšago moprofeta, go ruta le go fora bahlanka ba ka gore ba febe, le gore ba je didimo. ₂₁Ke mo file nako gore a sokologe, eupša ga a nyake go sokologa bofebeng bja gagwe. ₂₂Ka gona ke tla mo otla ka go mo dira molwetši wa kobo, le bao ba bego ba otswa naye ke tla ba hlokofatša kudu, ge ba sa sokologe bokgopong bjo ba bo dirago le yena. ₂₃Le gona ke tla bolaya balatedi ba gagwe ka bolwetši bja leuba. Ke mo diphuthego ka moka di tlago tseba gore ke nna ke tsebago tša ka pelong ya motho gabotse. Yo mongwe le yo mongwe wa lena ke tla mo otla go ya ka tše a di dirilego.

₂₄“Eupša lena ba bangwe ba Tiatira ga se la latela thuto yeo; ga se la ithuta tšeo go thwego ke ‘diphiri tše dikgolo tša Sathane’. Ke le tsebiša gore nka se le rweše morwalo wo mongwe. ₂₅Fela le sware seo le nago le sona le se tiiše go fihlela ke etla. ₂₆Yo a ka fenyago a ba a phetha tše ke di nyakago go fihlela mafelelong a lefase,

₂₈“Ke ona maatla a ke a filwego ke Tate. Ke tla ba ka mo fa le naledi ya Mphatlalatšane.

₂₉“Yo a nago le tsebe a a kwe se Moya o se botšago diphuthego.”

₁“Ngwalela morongwa wa Modimo wa phuthego ya Sardese o re:

“Yo a nago le meoya ye e šupago ya Modimo le dinaledi tše di šupago o re: Tše le di dirago ke a di tseba; ke a tseba gore batho ba re le a phela, etšwe le hwile. ₂Ka gona, itsošeng, le tsošološe dimpho tša Sekriste pele di hwela ruri. Gobane ke lemogile gore tše le di dirago ga sešo ya ba tše di lokilego go felela mahlong a Modimo wa ka. ₃Ka gona, gopolang ka mo le ilego la theeletša Taba ye Botse ya Modimo ka mafolofolo mola le e kwa, gomme le e boloke, le sokologe. Ge le sa itsoše ke tla le wela godimo bjalo ka lehodu le sa itebetše, ebile le ka se tsebe nako ye ke tlago go le wela godimo ka yona. ₄Eupša go na le ba mmalwa moo ga gabolena, Sardese, ba ba sego ba tšhilafatša diaparo tša bona. Bona ba tla sepela le nna ba apere diaparo tše ditšhweu, ka ge go ba swanetše. ₅Yo a ka fenyago le yena o tla apešwa diaparo tše ditšhweu, gomme nka se phumole leina la gagwe pukung ya ba ba phelago. Ke tla begela Tate le barongwa ba gagwe gore yoo ke wa ka.

₆“Yo a nago le tsebe a a kwe se Moya o se botšago diphuthego.”

₇“Ngwalela morongwa wa Modimo wa phuthego ya Filadelfia o re:

₁₃“Yo a nago le tsebe a a kwe se Moya o se botšago diphuthego.”

₁₄“Ngwalela morongwa wa Modimo wa phuthego ya Laodisea o re:

“Yo e lego Amene, yena hlatse ye e botegago ka nnete, yo tšohle tše di hlodilwego ke Modimo di tšwago go yena, o re: ₁₅Tše le di dirago ke a di tseba; ke a tseba gore ga le tonye ebile ga le fiše. Nke nkabe le tonya goba le fiša. ₁₆Eupša ka ge le le boruthonyana fela – le sa fiše ebile le sa tonye – ke tla le tshwa ka molomong wa ka. ₁₇Etse le re: ‘Re humile mme re atlegile; ga re hloke selo.’ Fela ga le tsebe gore le a hloiša, le hlomola pelo, le a diila, le foufetše, le itlhobotše. ₁₈Ka gona, ke le eletša gore le reke gauta ye e sego ya tswakwa go nna, gore le tle le hume. Le reke le diaparo tše ditšhweu gore le tle le apare le ikhupetše lepono. Le reke le sehlare sa go tlotša mahlo gore le tle le kgone go bona. ₁₉Gape nna ba ke ba ratago ke a ba kgala, ka ba otla. Ka gona, di išeng hlogong le sokologe. ₂₀Theeletšang! Ke ema mojako ka kokota; ge motho a ka re ge a ekwa lentšu la ka a mpulela mojako, ke tla tsena mme ra ja mmogo. ₂₁Yo a ka fenyago ke tla mo dudiša le nna setulong sa ka sa bogoši, go swana le nna ge ke fentše mme bjale ke dutše le Tate setulong sa gagwe sa bogoši.

₂₂“Yo a nago le tsebe a a kwe se Moya o se botšago diphuthego.”