E100 Letšatši 8 – Matswalo a Isaka le “Sehlabelo”

₁Morena o ile a šegofatša Sara, bjalo ka ge a be a holofeditše, ₂gomme Sara a ima, a belegela Abrahama morwa mola Abrahama a tšofetše. Mošemanyana a belegwa ka nako yeo Modimo a bego a boletše gore o tla belegwa ka yona. ₃Abrahama a mo rea leina la Isaka. ₄Ge lesea le na le matšatši a seswai Abrahama a le bolotša, bjalo ka ge Modimo a be a mo laetše. ₅Abrahama o be a na le mengwaga ye lekgolo ge Isaka a belegwa. ₆Sara a re: “Modimo o ntlholetše lesego. Yo mongwe le yo mongwe yo a kwago taba ye o tla sega le nna.” ₇A tlaleletša ka go re: “Ke mang yo a ka bego a boditše Abrahama a re Sara o tla antšha bana? Le ge go le bjalo, ke mmelegetše morwa mola a tšofetše.”

₈Ngwana a gola, gomme ka letšatši le a tshwešwago ka lona Abrahama a dira mokete wo mogolo.

_9-10Ka letšatši le lengwe Ishmaele yoo Hagare, Moegepeta, a bego a mmelegetše Abrahama, o be a bapala le morwa wa Sara, Isaka. Sara a ba bona gomme a re go Abrahama: “Raka lekgoba le la mosetsana le morwa wa lona. Morwa wa lekgoba le ga a swanela go ja bohwa gotee le morwa wa ka, Isaka.” ₁₁Taba yeo ya nyamiša Abrahama kudu, ka gobane Ishmaele le yena e be e le morwa wa gagwe. ₁₂Eupša Modimo a re go Abrahama: “O se ke wa tshwenyega ka mošemanyana le ka lekgoba la gago, Hagare. Dira se sengwe le se sengwe seo Sara a go botšago sona, ka gobane ke ka Isaka moo o tlago ba le ditlogolo. ₁₃Fela morwa wa lekgoba le la mosetsana le yena ke tla mo fa bana ba bantši, gore e tle e be setšhaba, ka gobane le yena ke morwa wa gago.”

₁₄Ka le le latelago Abrahama a tsoga e sa le bošego, a neela Hagare dijo le lekuka la meetse. A mmeleša ngwana, a mo fa tsela. Hagare a tloga a ralala le lešoka la Beresheba. ₁₅Ge a feletšwe ke meetse, a tlogela ngwana ka fase ga mohlašana, ₁₆a yo dula fase bokgole bjo e ka bago dimetara tše lekgolo. Ka pelong a re: “Nka se kgotlelele go bona ngwana a ehwa.” Mola a dutše fao a thoma go lla.

₁₇Modimo a kwa ngwana a lla, mme morongwa wa Modimo a bolela le Hagare a le legodimong a re: “A o tshwentšwe ke eng, Hagare? O se ke wa boifa. Modimo o kwele mošemanyana a lla. ₁₈Emelela, o ye o mo kuke, o mo homotše. Ke tla dira ditlogolo tša gagwe setšhaba se segolo.” ₁₉Ke moo Modimo a mmutšego mahlo, gomme a bona sediba. A ya a tlatša lekuka lela ka meetse, a noša mošemanyana. ₂₀Modimo a ba le mošemanyana yoo ge a gola; a phela lešokeng gomme ya ba setsebi sa mosebe. ₂₁Mmagwe a mo tšeela mosadi wa Moegepeta.

₂₂Yona mehleng yeo Abimeleke a ya le Pigole, molaodi wa madira a gagwe, go Abrahama a re: “Modimo o na le wena go tšohle tše o di dirago. ₂₃Ka gona nkenele fa pele ga Modimo gore o ka se nthadie, nna le bana ba ka le ditlogolo tša ka. Ke go botegetše, ka fao ena gore le wena o tla mpotegela wa botegela le naga ye o falaletšego go yona.”

₂₄Abrahama a re: “Ke a ena.”

₂₅Gomme Abrahama a ipelaetša go Abimeleke ka sediba se bahlanka ba Abimeleke ba bego ba se thopile. ₂₆Abimeleke a re: “Ga ke tsebe gore ke mang yo a dirilego taba yeo. Ga se wa ka wa mpotša, gomme ke la mathomo ke ekwa taba yeo.” ₂₇Ke moo Abrahama a neetšego Abimeleke dihuswane le dikgomo, gomme bobedi bja bona ba dira kwano. ₂₈Abrahama a hlaola dikwanyana tše di šupago tša ditshadi mohlapeng wa gagwe, ₂₉gomme Abimeleke a mmotšiša a re: “O diretšeng taba yeo?”

₃₀Abrahama a mo fetola a re: “Tšea dikwanyana tše di šupago tše. Ka go dira seo o dumela gore ke nna ke epilego sediba se.” ₃₁Ka gona felo fao gwa bitšwa Beresheba, ka gobane ke fao bobedi bja bona ba enelanego.

₃₂Ka morago ga ge ba enelane bjalo fao Beresheba, Abimeleke le Pigole ba boela Filistia. ₃₃Abrahama a bjala mohlare wa motamariske moo Beresheba, gomme a khunamela Morena, Modimo wa go sa felego. ₃₄Abrahama o dutše moo Filistia lebaka le letelele.

₁Ka morago ga lebaka Modimo a leka Abrahama; a mmitša a re: “Abrahama!” Yena a araba a re: “Ke nna yo!”

₂Modimo a re: “Tšea morwa wa gago, yo e lego yena a nnoši, Isaka, yo o mo ratago kudu, o ye nageng ya Moria. Fao o ntirele sehlabelo sa go tšhungwa ka moka ka yena thabeng ye ke tlago go laetša yona.”

₃Ka le le latelago e sa le bošego Abrahama a phapha dikgong tša sehlabelo, a saletša pokolo ya gagwe, gomme a tloga le Isaka le bahlanka ba babedi. Ba leba felo fao Modimo a mmoditšego gona. ₄Ka letšatši la boraro Abrahama a bona felo fao a sa le kgojana. ₅Ke moo a itšego go bahlanka: “Šalang mo le pokolo ye. Nna le mošemanyana re tla fetela mola go yo rapela, mme ka morago ra boela mo go lena.”

₆Abrahama a rweša Isaka dikgong tša sehlabelo, gomme yena a swara thipa le magala a go gotša mollo. Ge bobedi bja bona ba swere tsela mmogo, ₇Isaka a re go tatagwe: “Tate!”

Tatagwe a araba a re: “Eye, ngwanaka.”

Isaka a mmotšiša a re: “Mollo le dikgong šedi, kwanyana ya sehlabelo yona e kae?”

₈Abrahama a mo fetola a re: “Modimo o tla inyakela yona, ngwanaka.” Gomme bobedi bja bona ba fela ba swere tsela mmogo.

₉Ge ba fihla felo fao Modimo a mmoditšego gona, Abrahama a aga aletare, gomme a beakanya dikgong godimo ga yona. A tlema morwa wa gagwe gomme a mmea aletareng godimo ga dikgong. ₁₀Ke moka a tšea thipa gore a mmolaye. ₁₁Eupša morongwa wa Morena a mmitša a le legodimong a re: “Abrahama, Abrahama!”

Yena a araba a re: “Ke nna yo.”

₁₂Morongwa a re: “O se gobatše mošemanyana yoo goba wa mo dira selo. Bjale ke a tseba gore o boifa Modimo, ka gobane ga se wa gana go mo neela morwa wa gago a nnoši.”

₁₃Abrahama ge a lebelela a bona kgapa e tantšwe ka sethokgwaneng ka dinaka. A ya a e tšea mme a dira sehlabelo sa go tšhungwa ka moka ka yona legatong la morwa wa gagwe. ₁₄Abrahama a rea felo fao leina la “Morena o a fa.” Gomme le lehono batho ba sa re: “Thabeng ya Morena o a fa.”

₁₅Morongwa wa Morena a bitša Abrahama la bobedi a le legodimong a re: ₁₆“Morena o re: ‘Ke ena ka nna mong gore ka ge o dirile taba ye gomme o se wa ntima morwa wa gago a nnoši, ₁₇ke tla go šegofatša kudu, ka go fa le ditlogolo tše ntši bjalo ka dinaledi tša legodimo goba dithorwana tša lešabašaba lebopong la lewatle. Ditlogolo tša gago di tla fenya manaba a tšona. ₁₈Ditšhaba tša lefase ka moka di tla nkgopela go di šegofatša bjalo ka ge ke šegofaditše ditlogolo tša gago, ka gobane o phethile taelo ya ka.’ ” ₁₉Abrahama a boela go bahlanka ba gagwe, gomme ba tloga mmogo ba ya Beresheba, mme Abrahama a dula fao.