E100 Letšatši 70 – O Rotogela Legodimong

₁Theofilose wa ka.

Ka pukung yela ka go go ngwalela yona pele ke ngwadile tšohle tše Jesu a di dirilego, le tše a di rutilego batho go tloga mola a thoma modiro wa gagwe, ₂go ba go fihla mohla a rotošetšwa legodimong. Pele a rotošwa, o ile a laya baapostola ba gagwe ka Moya wo Mokgethwa, bale a bego a ba kgethile. ₃Ke bona ba e rilego mo matšatšing a masome a mane ka morago ga go hlokofatšwa ga gagwe a itšweletša go bona gantši ka mo go sa belaetšego gore o tsogile. Ba mmona, gomme a bolela le bona ka tša mmušo wa Modimo. ₄Ya re ge ba le mmogo, a ba laya a re: “Le se ke la tloga Jerusalema, le letele se Tate a le holofeditšego sona, sona sela ke le boditšego sona. ₅Johanese o be a kolobetša ka meetse, eupša lena le tla kolobetšwa ka Moya wo Mokgethwa ka morago ga matšatši a se makae.”

₆E rile ge baapostola ba kopane ba mmotšiša ba re: “Morena, na setšhaba sa Israele o tlilo se tsošetša mmušo gona mo nakong tše?”

₇Jesu a ba fetola ka go re: “Ga se taba ya lena go tseba dinako le mabaka ao Tate a a beilego ka maatla a gagwe yena mong. ₈Lena le tla maatlafatšwa ge Moya wo Mokgethwa o theogela go lena, la ba dihlatse tša ka Jerusalema le nageng yohle ya Judea le ya Samaria, le go fihla magomong a lefase.” ₉Ge a seno realo, a rotošetšwa legodimong ba mo lebeletše, gomme a širetšwa ke leru, ba se sa mmona.

₁₀Ba rile ba sa tsepeletše leratadimeng ge a ntše a sobelela bjalo, gateetee banna ba babedi ba ba aperego bošweu ba ema le bona ₁₁ba re: “Lena banna ba Galilea, le emetšeng mo le lebeletše leratadimeng? Yena Jesu yo a tlošitšwego mo go lena a rotošetšwa legodimong, o tla boa ka wona mokgwa wo le mmonego a eya legodimong ka wona.”