E100 Letšatši 46 – Matshwenyego a Mohlanka

“Ntheeletšeng,

lena le nyakago go phološwa,

lena le tlago go nna gore ke le thuše.

Gopodišišang borakgolokhukhu ba lena, bona e lego

leswika le le betlilwego go lona,

le molete wo le epilwego go wona.

₂Gopolang rakgolokhukhu wa lena,

Abrahama, le Sara, makgolokhukhu wa lena.

Mola ke bitša Abrahama o be a se ne ngwana,

eupša ka mo šegofatša mme ka mo atišetša ditlogolo.

₃“Ke tla homotša Jerusalema,

gomme ba ba dulago maropeng a yona ka ba bea pelo.

Le ge naga ya yona e le leganata,

ke tla e fetoša serapa sa Edene;

le ge e le lešoka,

ke tla e dira sona serapa seo sa Modimo.

Go tla ba le lethabo le boipshino,

gwa kwala dikoša tša ditebogo le medumo ya diletšo.

₄“Ntheeletšeng, lena setšhaba sa ka,

le mpheng tsebe, lena morafe wa ka.

Ke ruta ditšhaba;

melao ya ka e tla ba tlišetša seetša.

₅Ke batametše go ba phološa;

nako ya gore ke fenye e kgauswi.

Ke tla ahlola ditšhaba ka maatla a ka.

Dinaga tša kgole di botile nna,

di holofetše gore ke tla di phološa.

₆Lelalelang magodimong,

le be le lebelele fase lefaseng!

Magodimo a tla timelela bjalo ka muši,

lefase le tla hlagala boka seaparo,

gomme badudi ba lona ka moka ba tla hwa bjalo ka dilabi.

Eupša nna ke tla ba hlakodišetša sa ruri;

toka ya ka e tla bonagala go ya go ile.

₇“Ntheeletšeng,

lena le tsebago tše di lokilego,

lena le swerego dithuto tša ka ka dihlogo.

Le se ke la boifa ge batho ba le roga,

goba la kwa bohloko ge ba le nyefola.

₈Ba tla timelela bjalo ka diaparo tše di llwego ke tšhwele!

Eupša nna ke tla ba hlakodišetša sa ruri;

toka ya ka e tla bonagala go ya go ile.”

₉Morena, tsoga o re thuše!

Re hlakodiše ka maatla a gago,

go swana le mehleng yela ya kgale,

mabakeng ale a pele.

Ga ke re ke wena yola wa go phuleletša Rahaba,

wa ripaganya mmamokebe woo wa ka lewatleng?

₁₀Gape ke wena wa go pšheša lewatle,

meetse a bodiba bjo bogolo,

gomme wa phula tsela mo go bego go le meetse,

gore bale o bego o ba phološa ba kgone go tshela.

₁₁Bao o ba hlakodišitšego ba tla boela Jerusalema ka lethabo,

ba hlaba mekgolokwane ba thabile;

ba tla iketla go ya go ile,

manyami le metsetlo tša felela sa ruri.

“Ke nna ke le homotšago.

Motho wa nama le mmoifelang,

yena a hwago bjalo ka bjang?

₁₃Kgane le lebetše Morena yo a le bopilego,

yo a phurolotšego magodimo gomme a bea metheo ya lefase?

Ke ka lebaka lang le swanetše go phela le boifa bogale bja bao ba le gatelelago,

bao ba itokišeditšego go le fediša?

Bogale bja bona bo ka se sa le dira selo.

₁₄Bao ba tlemilwego ka diketane ga ba sa le kgole le go lokollwa;

ba ka se hwele kgolegong,

gape ba ka se hloke dijo.

₁₅“Ke nna Morena Modimo wa lena;

ke biloša lewatle gomme maphoto a lona a duma.

Ke nna Morena Ramaatlaohle!

₁₆Ke phurolotše magodimo,

ka bea le metheo ya lefase;

ke botša ba Jerusalema ke re:

‘Le setšhaba sa ka!

Ke le dirile batseta ba ka,

gomme ke le šireletša ka seatla.’ ”

₁₇Wena Jerusalema, tsoga!

Phafoga, o emelele!

O nwele beine ya kotlo,

beine ye Morena a go filego yona a galefile;

o e kgaritlile gomme ya go thekesediša.

₁₈Ga go le o tee wa badudi ba gago yo a go hlahlago.

Gare ga bao ba godilego go wena ga go yo a go swerego ka letsogo a go thuša.

₁₉Masetlapelo a ka mabedi a go wetše:

Naga ya geno e sentšwe ke ntwa,

le setšhaba sa geno se bolailwe ke tlala.

O tla kwelwa ke mang bohloko?

Ke mang yo a tlago go homotša?

₂₀Batho ba gago ba idibetše;

ba rapaletše gohle magahlanong a mekgotha;

ba bjalo ka phuti ye e tantšwego.

Modimo o ba kgadile kudu,

Morena o ba otlile gabohloko a galefile.

₂₁Lena batho ba Jerusalema ba le tlaišwago,

lena ba le thekeselago bjalo ka ditagwa,

₂₂Morena Modimo wa lena o a le emelela o re:

“Ke tloša senwelo sela ke le filego sona ke galefile.

Le ka se sa nwa beine yela ya go le thekesediša.

₂₃Ke tla e fa bale ba bego ba le tshwenya,

ba le patlamiša mekgotheng,

ba le gataka bjalo ka mobu.”

₁Wena Jerusalema, tsoga!

Tsoga, o tie gape!

Wena Sione,

motse wo mokgethwa wa Modimo,

apara diaparo tša botšhepi!

Moditšhaba le yo a sego a hlweka a ka se sa tsena go wena.

₂Ithinthe lerole, wena Jerusalema, itokolle bokgobeng!

Emelela o dule setulong sa gago sa bogoši!

Tlemollang ditlemo tše le tlemilwego melala ka tšona,

lena mathopša a Sione!

₇Go botse bjang go bona motseta a etla a theoga dithabeng a re tlela le ditaba tše dibotse,

ditaba tša khutšo!

O bega go fenya ntweng,

o botša batho ba Sione o re:

“Modimo wa lena ke Kgoši!”

₈Baleti ba motse ba hlaboša mantšu,

ba goa mmogo ka lethabo.

Ba bona Morena ka a bona mahlo ge a boela Sione.

₉Hlabang mekgolokwane,

lena marope a Jerusalema!

Morena o tlilo hlakodiša motse wo,

mme a homotša setšhaba sa gagwe.

₁₀Morena o tlilo dira taba ye kgolo ka maatla a gagwe a makgethwa ditšhaba di lebeletše;

batho ba dinaga tša kgole ba tla bona

ge a phološa setšhaba sa gagwe.

₁₁Hudugang! Hudugang!

Le tlogeng Babilonia,

lena barwadi ba dibjana tša Tempele!

Le se kgome selo se se sego sa hlweka;

le dule le itlhwekišitše gomme le huduge.

₁₂Bjale le ka se tloge ka lepotlapotla;

le tla be le sa tšhabe.

Morena o tla le eta pele,

gomme yena Modimo wa Israele a ba a le leta a le šetše morago.

“Mohlanka wa ka o tla atlega modirong wa gagwe;

o tla hlompšha, a godišwa kudu.

₁₄Batho ba bantši ba ile ba kgotsa ge ba mmona;

o be a sentšwe sefahlego e bile nke ga se motho,

a gobaditšwe mme a sa swane le batho.

₁₅Eupša bjale ditšhaba tše dintši di tla mo makala,

le magoši a hloka molomo ge a mmona.

Ba tla bona tše ba bego ba se ba di botšwa,

ba kwešiša tše ba bego ba se ba di kwa.”

“Ke mang yo a bego a ka dumela tše bjale re di begago?

Le gona ke mang yo a bego a ka bona gore tše ke ditiro tša Morena?

₂Mohlanka wa gagwe o godile pele ga gagwe bjalo ka lehlogedi,

boka modu wo o melago mobung wo o omilego.

O be a se ne seriti le gona e se yo mobotse mo re bego re ka mo šetša.

Mo go yena go be go se se se re kgahlago,

mo re bego re ka mo kganyoga.

₃Re be re mo nyatša,

re mo gana;

o be a phela a tlaišwa,

a tlwaetše go kwešwa bohloko.

Go be go se na le motho yo a ratago go mo lebelela –

re mo nyatša mme re sa mo šetše.

₄“Eupša mahloko ao a bego a lebane rena a kwelwe ke yena;

ditlaišego tše di bego di re swanetše di wetše yena,

mola rena re be re gopola gore o otlwa ke Modimo ka matshwenyego ao.

₅Eupša o hlabilwe ka lebaka la dibe tša rena,

a otlwa ka lebaka la makgopo a rena.

Rena re ile ra boelanywa le Modimo ka go otlwa moo ga gagwe,

ra fodišwa ke dintho tša gagwe.

₆Ka moka re be re swana le dinku tše di timelago,

mongwe le mongwe a eya mo a ratago gona.

Eupša Morena a mo rweša makgopo a rena bohle.

₇“O ile a swarwa gampe,

eupša yena a ikokobetša,

a se ke a re selo.

A etša kwanyana ye e išwago tlhabong,

a ikhomolela bjalo ka nku ye e kotwago –

a se ke a bolela selo.

₈O ile a swarwa, a ahlolwa, a tšewa a yo bolawa,

mme le o tee wa batho ba mehleng yeo

a se ele tša go bolawa ga gagwe hloko.

₉Le ge ba be ba rerile go mmoloka le disenyi,

o ile a bolokwa ka lebitleng la mohumi.

O be a se a ka a oba molato goba a bolela maaka.”

“E be e le thato ya ka gore go bolawe yo ke dirilego gore a tlaišwe;

lehu la gagwe e bile sehlabelo sa tebalelo ya dibe.

Ka gona o tla phela nako ye telele,

a ba a bona ditlogolo tša gagwe,

mme nna ka phethagatša merero ya ka ka yena.

₁₁Ka morago ga go tlaišwa le go bolawa o tla buša a phela.

O tla tseba gore ga se a tlaišetšwa lefeela.

Mohlanka wa ka yo a se nago bosodi o tla otlwa legatong la ba bantši,

mme, ka lebaka la gagwe, ka ba swarela.

₁₂Ka gona ke tla dira gore a godišwe,

a dule le banna ba go hlomphega.

O gafile bophelo bja gagwe ka go rata,

a tlaišwa bjalo ka disenyi,

le ge a be a rwele dibe tša ba bantši,

mme a rapela gore badiradibe ba swarelwe.”