E100 Letšatši 44 – Bohlale bja Bodumedi

₂Ke diema tše di tlago go thuša go lemoga bohlale le dikeletšo tše botse,

le go kwešiša dika tše di nyakago tsebo ya mmakgonthe.

₃Di ka go ruta go phela ka bohlale le ka moo o ka botegago ka gona,

wa dira dilo ka toka,

wa se kgethologanye batho.

₄Di ka hlalefiša ba ba se nago tsebo,

gape tša ruta bafsa kwešišo le temogo.

₅Dihlalefi le tšona a di theetše mme di oketše tsebo ya tšona,

gomme bao ba rutegilego ba tla hlahlwa,

₆gore ba tle ba kwešiše diema le dika tše ba bohlale ba di bolelago,

le dithai tša bona.

₇Go boifa Morena ke ona mathomo a bohlale.

Ditlatla di nyatša bohlale,

di gana go rutwa.

₈Ngwanaka,

o ele tše tatago a go rutago tšona hloko,

o se hlokomologe tše o di rutwago ke mmago.

₉Dithuto tša bona di tla go dira mothomotho bjalo ka ge kefa ye botse goba pheta e swanela motho.

₁₀Ngwanaka,

ge badiradibe ba go gokagoketša, o gane.

₁₁Mohlomongwe ba ka re:

“Yaa le rena re yo lalela motho yo re ka mmolayago!

Re kgahlwa ke go khukhunela ba ba se nago molato.

₁₂Re tla ba hwetša ba phela gabotse ba iketlile,

gomme re ba bolayeng ba swane le ba ba theogelago bodulabahu!

₁₃Re tla hwetša mahumo a mehutahuta,

gomme ra tlatša nywako ya rena ka dithebola!

₁₄Yaa le rena,

gomme re tla abelana dilo tšeo le wena.”

₁₅O se ke wa sepela le batho ba mohuta woo, ngwanaka,

o ba tšhabe!

₁₆Ba kitimela go dira dilo tše mpe,

ba itlhaganela le go bolaya motho.

₁₇Ga go thuše selo go rea molaba mola nonyana ye o nyakago go e tanya e o bona,

₁₈eupša bona ka bobona ba itheela molaba,

molaba woo o tlago ba tanya.

₁₉Ka wona mokgwa woo mohlakodi o bolawa ke se a se hlakotšego –

seo ke se se hlagelago mang le mang yo a hlakolago.

₂₀Theetšang! Bohlale bo goeletša mekgotheng,

bo hlaboša lentšu mapatlelong,

₂₁bo bitša bo le dikhutlong tša mekgotha ye megolo le masorong a motse bo re:

₂₂“Lena bahlokatsebo!

Le tla rata go hloka tsebo go fihla neng?

Lena bakweri,

le tla lesa neng go kgahlwa ke dikwero?

Lena ditlatla,

le tla tlogela neng go nyatša tsebo?

₂₃Le theetšeng ge ke le kgala;

ke tla le fa bohlale bja ka ka bontši,

ka le ruta tše ke di tsebago.

₂₄Ke kgale ke le bitša,

eupša lena le a gana;

ke le bitša le ka letsogo,

go se yo a ntšhetšago.

₂₅Le hlokomologile dikeletšo tša ka gomme la gana ge ke le sola.

₂₆Ka gona ge le welwa ke masetlapelo,

nna ke tla le sega.

Ke tla le kwera ge le swarwa ke letšhogo,

₂₇ge letšhogo le le wela bjalo ka magadima,

ge tahlego e le tlela boka ledimo gomme le gakanegile le tlaletšwe.

₂₈Ke mo le tlago mpitša,

eupša ka se arabe;

le tla nnyaka,

eupša le ka se nkhwetše.

₂₉Le be le hloile tsebo,

le ikgethetše go se boife Morena.

₃₀Le be le sa nyake keletšo ya ka,

le gona le nnyatša ka mehla ge ke le sola.

₃₁Ka fao le tla hwetša se se le swanetšego,

gomme la šišingwa maanonyana ale a lena.

₃₂Batho ba go hloka tsebo ba bolawa ke go gana bohlale.

Mašilo a fedišwa ke go se šetše ga ona.

₃₃Eupša yo a ntheetšago o tla dula a bolokegile.

O tla iketla a se boife kotsi.”

₁Ngwanaka,

ge o ka amogela dikeletšo tša ka,

wa se lebale ditaelo tša ka,

₂wa hlwaela bohlale tsebe,

wa leka go bo hlaologanya,

₃ge o ka duma go ba le temogo,

wa fišegela go ba le kwešišo,

₄ge o ka nyaka bohlale boka silibera,

wa bo tsoma bjalo ka lehumo le le fihlilwego,

₅gona o tla tseba gore go boifa Morena ke go reng,

le go tseba Modimo o tla go lemoga,

₆gobane ke Morena yo a fago motho bohlale;

tsebo le kwešišo di tšwa go yena.

₇O atla baloki,

o šireletša bahlokabosodi.

₈O hlokomela gore go dirwe ka toka,

o leta bao ba mmotegelago.

₉Ge o ka theetša o tla kwešiša toka le tshwanelo le se e lego sa maleba –

o tla tšea ka tsela tše di lokilego.

₁₀O tla ba yo bohlale,

gomme tsebo e tla go thabiša.

₁₁Tebeledišišo e tla go lotola;

kwešišo e tla go šireletša.

₁₂Bohlale bo tla go phemiša tsela ye mpe le batho ba boradia –

₁₃batho ba ba hlanametšego bophelo bja go loka gore ba phele leswiswing la sebe,

₁₄batho ba ba kgahlwago ke go dira tše mpe,

ba ba thabišwago ke bošaedi bja bokgopo,

₁₅batho ba ba sepelago ka tsela tše kgopamego ba ba dirago tše di tšwilego tseleng.

₁₆Bo tla go phemiša mosadi wa go hloka maitshwaro,

seotswa sa leleme le boreledi,

₁₇yo a sa botegelego monna yo a mo nyetšego e sa le lekgarebe,

a lebalago keno ye a e ennego pele ga Modimo wa gagwe.

₁₈Go ya ga gagwe ke go ipolaya,

go ya gona ke go ya bodulabahu.

₁₉Bohle ba ba mo etelago ga ba boe.

Ga ba boele tseleng ya bophelo.

₂₀Ka fao, o sepele tseleng ya baloki,

o se aroge mmileng wa bona.

₂₁Baloki ba tla fela ba dutše mo nageng,

go yona bahlokabosodi ba tla dula ba le gona.

₂₂Bakgopo bona ba tla fedišwa go yona;

bahlokapotego ba tla tumolwa go yona boka sekoro.

₁Ngwanaka,

o se lebale tše ke go rutilego tšona,

o fele o gopola ditaelo tša ka,

₂gobane di tla go okeletša bophelo bja katlego.

₃O se lese go ba le leratorato le potego;

o ikgabiše ka tšona bjalo ka pheta molaleng,

o di boloke ka pelong ya gago.

₄Ge o ka dira bjalo o tla kgahla Modimo le batho,

wa ba le seriti mo go bona.

₅O tshephe Morena ka pelo ya gago ka moka.

O se ke wa tshepha kwešišo ya gago.

₆O gopole Morena dilong tšohle tše o di dirago,

gomme yena o tla go lokišetša ditsela.

₇O se ke wa iphora wa re o hlalefile,

eupša o boife Morena,

gomme o gane go dira tše mpe.

₈Go dira bjalo e tla ba mo nkego ke sehlare se se fodišago,

sa go lapološa mmele.

₉O hlomphe Morena ka go mo fa kabelo ya tše o nago natšo,

le ya tšohle tše kaonekaone tše o di bunago tšhemong ya gago.

₁₀Ke moo dišego tša gago di tlago tlala mabele,

gomme le mapitlelo a gago a diterebe a tla falala beine.

₁₁Ngwanaka,

ge Morena a go otla o se ke wa belaela,

le ge a go kgala o se ke wa tsota,

₁₂gobane Morena o kgala yo a mo ratago, bjalo ka ge tatagongwana a kgala morwagwe yo a mo kgahlago.

₁₃Go lehlogonolo motho yo a ikhweletšago bohlale,

yo a ikhweletšago kwešišo.

₁₄Bohlale bo na le poelo go feta silibera,

mohola wa bjona o phala wa gauta.

₁₅Bohlale bo feta magakabje ka bohlokwa;

ga go se o ka se nyakago, ngwanaka,

se se swanago nabjo.

₁₆Bo go fa bophelo bjo botelele ka letsogo la go ja,

mme ka la nngele bja go fa mahumo le tlhomphego.

₁₇Bohlale bo dira gore motho a tsefelwe ke bophelo,

le gore a phele a bolokegile.

₁₈Yo a nago le bohlale o phela gabotse;

ba lehlogonolo ke ba ba bo kgomarelago.

₁₉Morena o theile lefase ka bohlale,

mme ka tlhaologanyo a bea leratadima madulong a lona.

₂₀O aroganya phamphamadiba ka tsebo ya gagwe;

o neša pula ka maru.

₂₁Ngwanaka,

o itshwarelele ka bohlalehlale le tebeledišišo;

dilo tše di se ke tša ba tša go tšhabela.

₂₂Di tla go phediša,

wa ikgabiša ka tšona bjalo ka pheta molaleng.

₂₃Ke mo o tlago phela o šireletšegile,

wa se kgopše.

₂₄Ge o robala o ka se boife,

ge o robetše o tla robala boroko.

₂₅O ka se šie go welwa ke madimabe,

goba kotsi ye e welago bakgopo,

₂₆gobane Morena o tla go lotola,

a go phemiša sefu.

₂₇O se time motho se sebotse se a se hlokago,

ge o ka kgona go mo thuša.

₂₈O se re go motho:

“Sepela, o boe gosasa ke tla go fa,”

etšwe o na le se a se kgopelago.

₂₉Mongwekawena yo a phelago nago a go tshephile o se mo logele maanomabe.

₃₀O se rumole motho a se a go dira se sebe.

₃₁O se hufegele kgowa,

le gona o se tšee le ka e tee ya tsela tša gagwe,

₃₂gobane Morena o šišingwa modiratšempe,

kganthe moloki yena o a mo tshepha.

₃₃Lapa la yo kgopo le rogakilwe ke Morena,

mola la baloki lona a le šegofaditše.

₃₄Bakodutli o a ba kodutla,

kganthe baikokobetši bona o ba direla tše dibotse.

₃₅Ba bohlale ba itirela seriti,

mola mašilo sa bona e le bogoboga.

₁Bana ba ka,

le theetšeng tše tatagolena a le rutago tšona.

Le theetšeng, gore le tle le hlalefe.

₂Tše ke le rutago tšona di lokile,

ka gona le se di furalele.

₃Nna ka noši ke be ke le mošemanyana, ke rutwa ke tate,

ke le mmamoratwa, motswalwanoši wa mma.

₄Tate o be a nthuta a re:

“O gopole tše ke go botšago tšona.

O phethe taelo tša ka,

mme o tla phela.

₅O ikhweletše bohlale le temogo.

O se lebale goba wa furalela tše ke di bolelago.

₆O se lahle bohlale,

gomme bo tla go šireletša;

o bo rate, gomme bo tla go boloka.

₇Mathomo a bohlale ke go inyakela bjona;

o ikhweletše kwešišo ka tšohle tše o nago natšo.

₈O godiše bohlale,

gomme bo tla go godiša.

O bo gokarele,

gomme bo tla go fa seriti.

₉Bo tla go rweša seala hlogong;

bo tla go rweša mphapahlogo wo mobotse.”

₁₀O ntheetše, ngwanaka.

O amogele dikeletšo tša ka,

gomme o tla phela galelele.

₁₁Ke tla go bontšha tsela ya bohlale;

ke tla go sepetša tseleng ya boloki.

₁₂Ge o sepela o ka se šitišwe ke selo,

le ge o kitima o ka se thetšwe.

₁₃Ka mehla o kgomarele tše ke go laelago tšona,

di se go phonyokge.

Bophelo bja gago bo itshwarelele ka tšona –

o di hlokomele gabotse.

₁₄O se tšee ka tsela ya bakgopo,

o se sepele mmileng wa ba babe.

₁₅O o šikologe, o se tšee ka wona;

o o furalele, o itshepelele.

₁₆Ba babe ga ba robale ge ba se ba dira se sebe.

Ge ba se ba senyetša motho, ba lala ba hlobaela.

₁₇Ba ja bokgopo bjalo ka bogobe,

ba nwa šiši bjalo ka beine.

₁₈Tsela ya baloki e swana le mahwibi a masa,

ao seetša sa ona se tagago se keka,

go fihlela letšatši le hlaba.

₁₉Tsela ya bakgopo yona e swana le leswiswi la kgampi;

ga ba tsebe se se tlago ba thetša.

₂₀O hlokomele tše ke go botšago tšona, ngwanaka,

o hlwaele dipolelo tša ka tsebe.

₂₁O se ke wa di lebala;

o di boloke ka pelong ya gago.

₂₂Di phediša ba ba di kwago,

di ba phediša gabotse mmeleng le moyeng.

₂₃Se bohlokwa go feta tšohle ke go itota go tše o di naganago,

gobane ke tšona di laolago bophelo bja gago.

₂₄O ile go bolela maaka;

polelo tša boradia di se tšwe go wena.

₂₅O lebelele pele o yago,

o ipeakanyetše tša ka moso.

₂₆O itokišetše tše o nyakago go di dira,

ke mo o tlago tšea magato a maleba.

₂₇O se aroge tseleng ye e lokilego

wa phamogela felo;

o ikgaoganye le bobe.