E100 Letšatši 37 – Kgoši Solomone

₁Ge Dafida a batametše go hwa, o ile a fa morwa wa gagwe, Solomone, ditaelo tša mafelelo a re: ₂“Nako ya ka ya go hwa e fihlile. O tie o eme senna, ₃gomme o dire se Morena Modimo wa gago a go laelago sona. O phethe melao ya gagwe ka moka le ditaelo tša gagwe, bjalo ka ge di ngwadilwe melaong ya Moshe, gore mo gongwe le mo gongwe mo o yago o atlege go tšohle tše o di dirago. ₄Ge o ka theetša Morena, yena o tla phetha se a ntshephišitšego sona mola a mpotša gore ditlogolo tša ka di tla buša Israele ge di ka hlokomela go phetha ditaelo tša gagwe ka potego ka dipelo le ka moya wa bona ka moka.

₅“Go sa na le se sengwe gape. O sa gopola se Joaba a ntirilego sona ka go bolaya balaodi bale ba babedi ba madira a Israele, Abnere, morwa wa Nere, le Amasa, morwa wa Jetere. O gopola ka moo a ba bolailego ka gona mehleng ya khutšo a lefeletša batho bao ba ba bolailego mehleng ya ntwa. O tšholotše madi a a se nago molato gomme bjale ke nna ke šikerego boikarabelo bja se a se dirilego, le gona ke nna ke tlaišegago ka lebaka la taba yeo. ₆O dire se o bonago se lokile; o swanetše go mmolaya le ge bjale a tšofetše.

₇“Eupša o be yo botho go barwa ba Barsilai wa Gileade gomme o ba hlokomele, ka gobane le bona ba ile ba ntshwara gabotse ge ke be ke tšhaba Absalomo, morwarrago.

₈“Gape go na le Shimi, morwa wa Gera, wa motse wa Bahurime kua Benjamene. O ile a nthogaka gampe tšatši lela ke eya Mahanaime, fela ge a nkgahlanetša kua nokeng ya Jordane, ke ile ka mo enela ka leina la Morena gore nka se mmolaye. ₉Eupša wena o se ke wa mo lesa a sa otlwe. O yo bohlale mme o tla tseba se o swanetšego go mo dira sona; o mmolaye, le ge bjale a tšofetše.”

₁₀Dafida o ile a hlokafala gomme a bolokwa motseng wa Dafida. ₁₁O be a bile kgoši ya Israele mengwaga ye masome a mane, a bušitše mengwaga ye e šupago a le Hebrone, le mengwaga ye masome a mararo a metšo ye meraro a le Jerusalema. ₁₂Solomone a latela Dafida, tatagwe, gomme a tielela bogošing.

₁₃Ke moo Adonia, yo mmagwe e bego e le Hagite, a ilego go Batseba, mmagoSolomone.

Batseba a mmotšiša a re: “A o nketetše fela?”

Adonia a mo fetola a re: “Ee, ₁₄fela ke na le tabanyana.”

Batseba a re: “Bolela.”

₁₅Adonia a re: “O a tseba gore ke be ke swanetše go ba kgoši, le gore yo mongwe le yo mongwe mo Israele o be a gopotše bjalo. Eupša go diregile ka mokgwa wo mongwe, gomme morwarre e bile yena e bago kgoši, ka gobane seo e be e le thato ya Morena. ₁₆Gomme bjale ke kgopela selo se tee; hle, o se ke wa se gana.”

Batseba a mmotšiša a re: “Ke eng?”

₁₇Adonia a mo fetola a re: “Hle, kgopela Kgoši Solomone – ke a tseba gore ya gago kgopelo a ka se e gane – gore a mphe Abishaga, mosetsana wa Shuneme, e be mosadi wa ka.”

₁₈Batseba a mo fetola a re: “Go lokile. Ke tla go bolelela le kgoši.”

₁₉Ka gona Batseba a ya go kgoši go yo bolelela Adonia. Kgoši a emelela a dumediša mmagwe, a mo obamela. Ke moka a dula setulong sa gagwe sa bogoši gomme a laela gore setulo se sengwe se tlišwe, mme mmagwe a dula go sona ka letsogong la gagwe la go ja. ₂₀Mmagwe a re: “Ke na le tabana ye nnyane ye ke tlilego go go kgopela yona; hle, o se ke wa e gana.”

Solomone a mmotšiša a re: “Ke efe, mme? Nka se e gane.”

₂₁Mmagwe a mo fetola a re: “Dumelela gore Adonia, morwarrago, a fiwe Abishaga e be mosadi wa gagwe.”

₂₂Kgoši a mmotšiša a re: “Ke ka lebaka lang o nkgopela gore ke mo fe Abishaga? Go no swana le gore o ka nkgopela gore ke mo fe le sona setulo se sa bogoši. Gabotsebotse ke mogolwake, gomme moprista Abiatare le Joaba ba eme le yena!” ₂₃Ke moo Solomone a ennego ka leina la Morena a re: “A Modimo a mpolaye thoo ge nka se lefiše Adonia kgopelo ye ka setopo! ₂₄Morena o ntiišeditše setulong sa bogoši sa tate, Dafida; o phethile tshephišo ya gagwe gomme o neetše nna le ditlogolo tša ka mmušo. Ke ena ka Morena yo a phelago gore Adonia o tla bolawa lona lehono le!”

₂₅Ka gona Kgoši Solomone a roma Benaya, mme Benaya a yo bolaya Adonia.

₂₆Kgoši Solomone a re go moprista Abiatare: “Ikele mašemong a gago kua Anathote. O lebanwe ke go bolawa, eupša nka se go bolaye lehono, ka gobane o be o hlokometše Polokelo ya Kgwerano ya Morena ge o be o sa na le tate, Dafida, mme le wena o tlaišegile naye mathateng a gagwe ka moka.” ₂₇Ke moka Solomone a raka Abiatare modirong wa go ba moprista wa Morena, gomme a phethagatša se Morena a se boletšego kua Shilo ka moprista Eli le ditlogolo tša gagwe.

₂₈Joaba a kwa taba ye. O be a ema le Adonia, eupša a se a ka a ema le Absalomo. Ka gona a tšhabela Tenteng ya bodulo bja Morena gomme a swara dinakana tša aletare. ₂₉Ge Kgoši Solomone a ekwa gore Joaba o tšhabetše ka Tenteng ya bodulo bja Morena le gore o aletareng, a roma motseta go yena go yo mmotšiša gore ke ka lebaka lang a tšhabetše aletareng. Joaba a fetola ka go re o tšhabetše go Morena ka gobane a be a boifa Solomone. Ka gona Kgoši Solomone a roma Benaya go yo bolaya Joaba. ₃₀A ya Tenteng ya bodulo bja Morena gomme a re go Joaba: “Kgoši o go laela gore o tšwe ka moo.”

Joaba a mo fetola a re: “Aowa, ke tla hwela gona ka mo.”

Benaya a gomela go kgoši gomme a mmegela se Joaba a se boletšego.

₃₁Solomone a mo fetola a re: “Dira ka mo a bolelago. O mmolaye o mmoloke. Ke moo nna goba setlogolo sefe le sefe sa tate se ka se hlwego se šikere boikarabelo bja se Joaba a se dirilego ge a bolaya banna ba ba se nago molato. ₃₂Morena o tla otla Joaba ka ge a bolaile banna ba babedi tate, Dafida, a sa tsebe. Banna bao ba be ba se na le molato, le gona ba mo phala ka go loka. Bona e be e le Abnere, molaodi wa madira a Israele, le Amasa, molaodi wa madira a Juda. ₃₃Kotlo ya go bolawa ga bona e tla wela Joaba le ditlogolo tša gagwe go ya go ile. Eupša Morena ka mehla o tla šegofatša ditlogolo tša Dafida tše di dulago setulong sa gagwe sa bogoši.”

₃₄Ka gona Benaya a ya Tenteng ya bodulo bja Morena, a bolaya Joaba, gomme a bolokwa nageng ya gagwe kua lešokeng. ₃₅Kgoši a dira Benaya molaodi wa madira legatong la Joaba, gomme a bea moprista Tsadoko sebakeng sa Abiatare.

₃₆Ke moo kgoši a laetšego gore Shimi a bitšwe, gomme a re go yena: “Ikagele ngwako mo Jerusalema. O dule go wona gomme o se ke wa tšwa motseng wa ya felo mo gongwe. ₃₇Ge o ka tsoga o tšwile gomme wa tshela nokana ya Kidrone, o nape o tsebe gore o tla bolawa thoo, gomme molato ya ba wa gago.”

₃₈Shimi a mo fetola a re: “Go lokile, kgoši, mong wa ka, ke tla dira se o se bolelago.” Ka gona a dula Jerusalema nako ye telele.

₃₉Fela ka morago ga mengwaga ye meraro makgoba a mabedi a Shimi a tšhabela go kgoši ya Gathe, Akishe, morwa wa Maaka. Ge Shimi a ekwa gore makgoba ao a kua Gathe, ₄₀a saletša pokolo ya gagwe gomme a ya go Kgoši Akishe kua Gathe go yo nyaka makgoba ao. O ile a a hwetša mme a boa le ona. ₄₁Ge Solomone a ekwa seo Shimi a se dirilego, ₄₂a laela gore a bitšwe, gomme a re go yena: “Ke ile ka go eniša ka leina la Morena gore o se ke wa tšwa Jerusalema wa ya mo gongwe. Gomme ka go botša gore ge o ka tsoga o dirile bjalo, o nape o tsebe gore o tla bolawa thoo. A ga se wa dumela taba yeo gomme wa mpotša gore o nkwele? ₄₃Bjale ge, ke ka lebaka lang o tshetše keno ya gago mme wa nyatša taelo ya ka? ₄₄O tseba gabotse bobe ka moka bjo o bo dirilego tate, Dafida. Morena o tla go otlela taba yeo. ₄₅Eupša nna o tla ntšhegofatša mme a dira gore mmušo wa Dafida o tie go ya go ile.”

₄₆Ke moo kgoši a laetšego Benaya gore a bolaye Shimi, gomme yena a tšwa a mmolaya. Ke ge bjale Solomone a swere mmušo a o tiišitše.

₁Solomone o ile a itlemaganya le kgoši ya Egepeta ka go nyala morwedi wa gagwe. A goroša mosadi yoo gore a tle a dule motseng wa Dafida go fihlela ge a feditše go aga mošate ga gagwe le Tempele le morako wa go dikologa Jerusalema. ₂Morena o be a sešo a agelwa tempele, ka fao batho ba be ba sa dira dihlabelo dintotomeng tše go tšona ba khunamelago medimo ya diswantšho. ₃Solomone o be a rata Morena mme a phetha ditaelo tša Dafida, tatagwe, eupša o be a sa hlaba diruiwa mme a dira dihlabelo ka tšona dintotomeng tšeo.

₄Ka nako ye nngwe o ile a ya Gibeone go yo dira dihlabelo, ka gobane moo ke mo go bego go le ntotoma ya go tuma kudu. O be a šetše a kile a dira dihlabelo tša go tšhungwa ka moka tše ntšintši moo mabakeng a a fetilego. ₅Bošegong bjoo Morena a iponagatša go yena torong gomme a re: “Mpotše se o nyakago gore ke go fe sona.”

₆Solomone a re: “Ka mehla o be o botegela tate, Dafida, mohlanka wa gago, kudu, gomme yena o be a go hlompha, a go botegela, mme a go tshepha. Gomme o tšwetše pele le go mo rata kudu, wa ba wa mo fa morwa yo lehono a bušago legatong la gagwe. ₇Wena, Morena Modimo, o dirile gore ke be kgoši ke latele tate, le ge ke le yo monnyane kudu gomme ke sa tsebe go buša. ₈Ke nna yo gare ga setšhaba se o se kgethilego, setšhaba se sentši mo e lego gore se ka se balwe. ₉Ka gona mphe bohlale gore ke kgone go buša setšhaba sa gago ka toka, le go kgethologanya botse le bobe. Ge o ka se mphe, nka kgona bjang go buša setšhaba se sa gago se sentši?”

₁₀Morena a kgahlwa ke ge Solomone a kgopetše seo, ₁₁ka gona a re go yena: “Ka gobane o kgopetše bohlale bja go buša le go ahlola ka toka go na le go phela lebaka le letelele, goba mahumo, goba lehu la manaba a gago, ₁₂ke tla go fa se o se kgopetšego. Ke tla go fa bohlale bjo bontši le kwešišo go feta bohle ba ba kilego ba ba gona, goba ba kago tsoga ba bile gona. ₁₃Ke tla go fa le se o sego wa se kgopela: Bophelong bja gago ka moka o tla ba le mahumo le seriti go feta magoši ka moka. ₁₄Gomme ge o ka ntlhompha wa phetha melao ya ka le ditaelo tša ka bjalo ka Dafida, tatago, ke tla go phediša galelele.”

₁₅Solomone a phafoga gomme a lemoga gore Modimo o be a bolela naye torong. Ke moo a ilego Jerusalema mme a ema pele ga Polokelo ya Kgwerano ya Morena, a direla Morena dihlabelo tša go tšhungwa ka moka le dihlabelo tša kagišano. Ka morago ga moo a direla bahlankedi ba gagwe ka moka monyanya.

₁₆Ka letšatši le lengwe digwebakathobalo tše pedi di ile tša tla go Kgoši Solomone. ₁₇Yo mongwe wa bona a re: “Mong wa ka, nna le mosadi yo re dula ka ngwakong o tee, gomme ke ile ka belega mošemanyana ka ngwakong woo mosadi yo a le gona. ₁₈Ka letšatši la boraro ke belege, le yena a belega mošemanyana. Re be re le babedi fela ka ngwakong woo – go se motho yo mongwe. ₁₉Bošegong bjo bongwe o ile a phekgogela godimo ga lesea la gagwe a sa ikwe, gomme a le pitlaganya, la hwa. ₂₀A tsoga bošegogare, a tšea ngwana wa ka lehlakoreng la ka mola ke sa ile ka boroko a mo iša malaong a gagwe; ke moka a bea ngwana yola wa go hwa malaong a ka. ₂₁Ya re ge go sele ka tsoga ke re ke amuša lesea, ka tšhoga le hwile. Ke ile ka le lebeledišiša gabotse, gomme ka lemoga gore ga se la ka.”

₂₂Eupša mosadi yola yo mongwe a re: “Aowaa! Ngwana yo a phelago ke wa ka, gomme yo a hwilego ke wa gago!”

Mosadi yola wa pele a mo fetola a re: “Aowaowaa! Ngwana yo a hwilego ke wa gago, mme yo a phelago ke wa ka!”

Ba ile ba phegišana ka mokgwa woo pele ga kgoši.

₂₃Ke moo Kgoši Solomone a itšego: “Mongwe le yo mongwe o re ngwana yo a phelago ke wa gagwe mme yo a hwilego ke wa yo mongwe.” ₂₄A laela gore go tlišwe tšhoša, gomme ge e tlišitšwe ₂₅a re: “Pharolang ngwana yo a phelago ka bogare gomme le neele mongwe le mongwe seripa sa ngwana yoo.”

₂₆Yo e tlogago e le mmagolesea leo a botša kgoši a hlomogetše morwa wa gagwe pelo a re: “Hle, mong wa ka, se bolaye ngwana yo! Mo fe yena!”

Eupša mosadi yo mongwe yola a re: “A se fiwe nna goba yena; a a pharolwe!”

₂₇Ke moo Solomone a itšego: “Se bolayeng ngwana yoo! Mo neeleng mosadi yola wa pele – ke yena e tlogago e le mmagongwana yo.”

₂₈Ge setšhaba sa Israele se ekwa kahlolo yeo ya Solomone, ka moka sa mo hlompha kudu, ka gobane se ile sa thoma go bona gore Modimo o mo file bohlale bja go ahlola.