E100 Letšatši 22 – Powana ya Gauta

₁Ge setšhaba se bona Moshe a diega go theoga thabeng, sa bokanela Arone sa re go yena: “Ga re tsebe se se hlagetšego yola Moshe, monna yo a re ntšhitšego nageng ya Egepeta; ka gona, ema o re direle modimo yo a tlago re eta pele.”

₂Arone a ba fetola re: “Khwamolang mangina a gauta ao basadi ba lena le barwa ba lena le barwedi ba lena ba a rwelego ditsebeng, le a tlišeng mo go nna.” ₃Ka gona setšhaba ka moka sa khwamola mangina a sona a gauta, sa a iša go Arone. ₄Arone a tšea mangina ao go bona, a a tološa, a a tšhollela foromong, a bopa powana ya gauta.

Setšhaba sa re: “Lena Baisraele, yo ke modimo wa rena yo a re ntšhitšego nageng ya Egepeta!”

₅Ya re ge Arone a bona tšeo, a aga aletare pele ga powana ya gauta mme a goeletša a re: “Ka la ka moswane e tla ba monyanya wa go tumiša Morena.”

₆Ka la ka moswane setšhaba sa tsogela go dira dihlabelo tša go tšhungwa ka moka le dihlabelo tša kagišano. Sa dulela monyanya gomme wa fetoga bohlaswa bja botagwa le thobalano.

₇Morena a re go Moshe: “Itlhaganele o theoge, gobane setšhaba sa geno se o se ntšhitšego nageng ya Egepeta se sentše, se ntlhanogetše. ₈Ba šetše ba arogile tsela ye ke ba laetšego gore ba e latele; ba dirile powana ka gauta ye e tološitšwego, gomme ba e khunametše ba ba ba e hlabela dihlabelo. Ba re yona ke yena modimo wa bona yo a ba ntšhitšego nageng ya Egepeta. ₉Ke tseba ka moo batho ba ba nago le melala ye methata. ₁₀Bjale hle, o se ke wa leka go nkema pele. Ke ba befeletšwe, mme ke ile go ba fediša. Ka morago ga fao ke tla dira wena le ditlogolo tša gago setšhaba se segolo.”

₁₁Eupša Moshe a phophotha Morena Modimo wa gagwe a re: “Morena, o reng o befelelwa setšhaba sa gago gakaaka, setšhaba se o se hlakodišitšego Egepeta ka maatla a magolo le ditiro tše maatla? ₁₂O reng o nyaka go re kweriša Baegepeta, gore ba re o ntšhitše setšhaba sa gago Egepeta e le maanomabe a go ba bolaya dithabeng le go ba feleletša sa ruri? Hle, o se sa re galefela; buša pelo, gomme o se ke wa tlišetša setšhaba sa gago bošula bjoo. ₁₃Gopola bahlanka ba gago, Abrahama le Isaka le Jakobo. Gopola kholofetšo ya gago ye kgolo ye o ba enetšego yona wa re o tla ba fa ditlogolo tše ntši bjalo ka dinaledi tša legodimo, le gore o tla fa ditlogolo tša bona naga ka moka ye o ba holofeditšego yona wa re e tla ba ya bona go ya go ile.” ₁₄Ka gona Morena a buša pelo mme a se ke a tlišetša setšhaba sa gagwe bošula bjo a bego a ikemišeditše go se tlišetša bjona.

₁₅Moshe a theoga thabeng a swere matlapa ao a ngwadilwego melao ka mo le ka mo. ₁₆Matlapa ao a be a betlilwe ke Modimo, mme yena ka noši a a tlokile melao.

₁₇Joshua a kwa setšhaba se hlabile lešata, mme a re go Moshe: “Ke kwa mašata a ntwa kua mešašeng.”

₁₈Moshe a re: “Hleng go kwagala e ke mašata ale ga se mekgolokwane ya phenyo, goba dillo tša go fenywa; mašata ale ke a mogobo.”

₁₉Ge Moshe a batametše mešašeng mo a kgonago go bona powana le go bona batho ba bina, a tuka bogale. Gona moo patogeng ya thaba Moshe a napa a lahlela matlapa ale a bego a a swere fase, a pšhatlagana. ₂₀A tšea powana yela ba bego ba e dirile, a e tološa, a e šila ya ba lerole la matoka, gomme a le tšhela ka meetseng. A gapeletša Baisraele go nwa meetse ao. ₂₁A botšiša Arone a re: “Setšhaba se se go dirile eng ge e bile o se diriša sebe se sekaaka?”

₂₂Arone a mo fetola a re: “Hle, se mpefelelwe, mong wa ka; wena o tseba gabotse ka moo setšhaba se e lego se sebe ka gona. ₂₃Ba rile go nna: ‘Ga re tsebe se se hlagetšego yola Moshe, monna yo a re ntšhitšego nageng ya Egepeta; ka gona re direle modimo yo a tlago re eta pele.’ ₂₄Nna ka ba kgopela gore ba ntlišetše dikgabišo tša bona tša gauta, gomme ba ba bego ba na le tšona ba di kgakgamolla ba nneela tšona. Nna ka di lahlela mollong, mme fao gwa tšwa powana ye!”

₂₅Ge Moshe a bona gore Arone o ntšhitše setšhaba tseleng gomme sa itlontlolla pele ga manaba a sona, ₂₆a ema kgorong ya mešaša a goa a re: “Yo a emago le Morena a a tle go nna!” Ke moo Balefi ka moka ba mo kgobokanetšego, ₂₇gomme yena a re go bona: “Morena Modimo wa Israele o laela yo mongwe le yo mongwe wa lena go itlhama ka tšhoša le go putlaganya mešaša go tloga kgorong ye go fihla go ye nngwe, le go bolaya bomorwarragwe le bagwera ba gagwe le baagišani ba gagwe.” ₂₈Balefi ba phetha taelo yeo, gomme ba bolaya banna ba e ka bago ba dikete tše tharo ka lona tšatši leo. ₂₉Moshe a re go Balefi: “Lehono le ikgethwafaditše la ba baprista ba go direla Morena ka go bolaya barwa ba lena le bomorwarragolena, ka gona Morena o le šegofaditše.”

₃₀Ka letšatši le le latelago Moshe a re go setšhaba: “Le dirile sebe se segolo. Bjale ge, ke tla boela kua thabeng go Morena; mohlomongwe nka kgona go le boelanya naye.” ₃₁Ke gona Moshe a boetšego go Morena a re: “Jonna, Morena, setšhaba se se dirile sebe se segolo. Se itiretše modimo ka gauta, gomme sa o khunamela. ₃₂Bjale hle, ba lebalele sebe sa bona; go sego bjalo o phumole leina la ka pukung ye o ngwadilego maina a batho ba gago go yona.”

₃₃Morena a mo fetola a re: “Bao ba mphošeditšego ke bona bao ke tlago phumola maina a bona pukung ya ka. ₃₄Wena bjale sepela, o ete setšhaba sa ka pele o se iše felo mo ke go boditšego gona. Bona, morongwa wa ka o tla go eta pele, fela mohla nako ya kotlo e fihla, ke tla otla setšhaba se ka lebaka la sebe sa bona.”

₃₅Ke moka Morena a romela bolwetši bja leuba setšhabeng, ka gobane ba gapeleditše Arone go bopa powana ya gauta.

₁Morena a re go Moshe: “Tloga felo fa, wena le setšhaba se o se ntšhitšego nageng ya Egepeta, o ye nageng ye ke enetšego Abrahama le Isaka le Jakobo ka re ke tla e fa bona le ditlogolo tša bona. ₂Ke tla roma morongwa a go eta pele, gomme ke tla leleka Bakanana le Baamore le Bahete le Baperise le Bahibe le Bajebuse. ₃Le ya nageng ya mokhora le monono. Eupša nna nka se ye le lena, ka gobane le setšhaba sa melala ye methata, gomme nka le feleletša tseleng.”

₄Ge setšhaba se ekwa taba ye thata ye, sa thoma go itshola gomme sa se hlwe se apara dikgabišo. ₅Morena o be a laetše Moshe gore a ba botše go re: “Le setšhaba sa melala ye methata. Ge nka sepela le lena, le ge e le lebakanyana fela, ke tla le feleletša sa ruri. Bjale ge, apolang dikgabišo tša lena, gomme nna ke tla bona gore ke dirang ka lena.” ₆Ka gona, ge Baisraele ba tlogile thabeng ya Sinai, ba ile ba se hlwe ba apara dikgabišo.

₇Ka mehla ge setšhaba sa Israele se hloma mešaša, Moshe o be a tšea Tente ye kgethwa a e hlome kua ntle kgojana le mešaša. E be e bitšwa Tente ya bodulo bja Morena, gomme yo mongwe le yo mongwe yo a bego a nyaka go kopana le Morena o be a tšwela kua go yona. ₈Ka mehla ge Moshe a tšwela kua go yona, setšhaba se be se ema mejakong ya mešaša ya sona se lebelela Moshe go fihlela a sobelela ka go yona. ₉Ge Moshe a tsene, thololo ya leru e be e theoga e dule mojakong wa Tente, gomme Morena a bolele le Moshe a le lerung. ₁₀E be e re ge setšhaba se bona thololo ya leru mojakong wa Tente, se obame. ₁₁Morena o be a bolela le Moshe ba lebane ka difahlego, bjalo ka ge motho a bolela le mogweragwe. Ka morago ga fao Moshe o be a boela mešašeng. Fela lesogana le e bego e le mothuši wa gagwe, Joshua, morwa wa Nunu, le be le šala Tenteng.

₁₂Moshe a re go Morena: “O ntaetše gore ke ntšhe setšhaba se, fela ga se wa mpotša gore o nthoma le mang. O boletše gore o ntseba gabotse, le gore ke a go kgahla. ₁₃Bjale ge ke go kgahla, hle, ntsebiše maikemišetšo a gago, gore ke go tsebe gomme ke fele ke go kgahla. O gopole le gore batho ba ke setšhaba sa gago.”

₁₄Morena a re: “Ke tla sepela nago, ka go fa khutšo.”

₁₅Moshe a mo fetola a re: “Ge o sa sepele le rena, gona o se ke wa re tloša fa. ₁₆Motho o tla tseba bjang gore nna le setšhaba sa gago re a go kgahla, ge wena o sa sepele le rena? Go ba le rena ga gago go tla re hlaola ditšhabeng tše dingwe ka moka lefaseng.”

₁₇Morena a re go Moshe: “Ke tla dira ka moo o kgopetšego ka gona, ka gobane ke go tseba gabotse, gomme o a nkgahla.”

₁₈Ke mo Moshe a kgopetšego Morena a re: “Hle, ntaetše seetša se se fahlago sa letago la gago.”

₁₉Morena a mo fetola a re: “Ke tla feta pele ga gago ka botse bjohle bja letago la ka, gomme ka go begela leina la ka la Morena. Ke tla gaugela yo ke ratago go mo gaugela, ka šokela yo ke ratago go mo šokela. ₂₀Nka se go dumelele gore o bone sefahlego sa ka, gobane ga go motho yo a ka rego go bona sefahlego sa ka a fela a sa phela, ₂₁fela mo thoko ga ka go na le felo mo o ka emago gona godimo ga leswika. ₂₂Ge seetša se se fahlago sa letago la ka se putla, ke tla go bea ka leweng mo leswikeng, ka go pipa ka seatla go fihlela ke putlile. ₂₃Ka morago ga moo ke tla tloša seatla sa ka gomme wa mpona ke go fularetše, wa se bone sefahlego sa ka.”

₁Morena a re go Moshe: “Ipetlele matlapa a mabedi a a swanago le ale a pele, mme nna ke tla ngwala mantšu a a bego a le mola matlapeng a pele a o a pšhatlilego. ₂Itokišetše la bosasa mosong, o namele thaba ya Sinai gomme o gahlane le nna kua godimo ga yona. ₃Go se be le o tee yo a namelago le wena; go se be le o tee yo a bonwago mo gongwe thabeng; le gona go se be le sehuswane goba kgomo ye e fulago patogeng ya thaba.” ₄Ka gona Moshe a betla matlapa a mangwe a mabedi gomme a tsoga e sa le ka moswane, a namela thaba ya Sinai a a swere, ka moo Morena a bego a mo laetše ka gona.

₅Morena a theoga ka leru, a ema moo go yena, a bolela leina la gagwe, la Morena. ₆Morena a putla pele ga gagwe a bega a re: “Nna, Morena, ke Modimo wa lešoko le kwelobohloko, yo a sa befelwego ka bjako, le gona yo a nago le lerato le legolo le potego. ₇Ke botegela kholofetšo ya ka melokong ye diketekete, mme ka lebalela batho makgopo le dibe tša bona; eupša nka se lese go otla bana le ditlogolo go iša molokong wa boraro le wa bone ka lebaka la dibe tša batswadi ba bona.”

₈Ka bjako Moshe a obama, a itahlela fase, ₉a rapela a re: “Mong wa ka, ge ke tloga ke go kgahla, Morena, hle, sepela le rena. Setšhaba se se na le melala ye methata, fela re lebalele bokgopo bja rena le sebe sa rena, mme o re amogele re be setšhaba sa gago.”

₁₀Morena a re go Moshe: “Bjale ke dira kgwerano le setšhaba sa geno. Ke tla dira mehlolo setšhaba se ntebeletše ye e sego ya ka ya dirwa setšhabeng se sengwe lefaseng lohle. Ditšhaba ka moka di tla bona tše kgolo tše nna, Morena, ke tlago di dira, gobane tše ke tlago di dira ka lena di a šiiša. ₁₁Le phethe melao ye ke le fago yona lehono. Ke tla leleka Baamore, Bakanana, Bahete, Baperise, Bahibe le Bajebuse ge le goroga. ₁₂Le se ke la dira kgwerano le badudi ba naga ye le yago go yona, gobane seo e ka ba molaba go lena. ₁₃Lena le kgerešeng dialetare tša bona, le thubaganye dikokwane tša bona tša borapedi tša maswika, le remeng dikota tša bona tša borapedi.

₁₄“Le se ke la khunamela medimo ye mengwe, gobane nna, Morena, ke Modimo yo a sa kgotlelelego tirelo ya medimo ye mengwe. ₁₅Le se ke la dira kgwerano le badudi ba naga yeo, gobane ba ka re ge ba kgeloga go nna ka go khunamela medimo ya bona e šele, ba e direla le dihlabelo, ba le laletša gore le e khunamele le bona, la ja le dihlabelo tšeo tša bona. ₁₆Le barwa ba lena ba ka nyala basadi ba šele bao, gomme bona ba ba kgeloša go nna ka go dira gore ba khunamele medimo yeo ya bona.

₁₇“Le se ke la itirela medimo ya tshipi mme la e rapela.

₁₈“Le bineng Monyanya wa Dinkgwa tše di se nago komelo. Le je dinkgwa tše di se nago komelo matšatši a a šupago mo kgweding ya Abibi, ka mo ke le laetšego ka gona, ka gobane ke ka yona kgwedi yeo mo le tšwilego Egepeta.

₁₉“Leitšibolo le letona la motho goba la seruiwa ke la ka, ₂₀eupša leitšibolo le letona la pokolo le le rekolle ka kwanyana. Ge le sa le rekolle, gona le le robe molala. Le rekolleng mošemane yo mongwe le yo mongwe wa leitšibolo.

“Go se be le o tee yo a tlago pele ga ka a se a swara kabelo.

₂₁“Mediro ya lena le e dire ka matšatši a a selelago, fela ka letšatši la bošupa le se šome, le ge e ka ba mabakeng a ge go lengwa goba go bunwa.

₂₂“Le bineng Monyanya wa Puno ge le thoma go buna mabele a lena a pele, gomme le bine le Monyanya wa Kgobelo ge le kgobela dienywa tša lena lehlabula.

₂₃“Gararo mo ngwageng banna ba gabolena ka moka ba tle go khunamela nna, Morena, Modimo wa Israele. ₂₄Ge ke lelekile ditšhaba ge le goroga gomme ke katološitše naga ya lena, ga go yo a kago leka go thopa naga ya lena nakong ya ge go binwa menyanya ye meraro ye.

₂₅“Ge le ntirela sehlabelo le se ke la se tliša le senkgwa se se nago komelo. Le se ke la latša seruiwa se se hlabilwego Monyanyeng wa Paseka go fihlela ka la ka moswane.

₂₆“Ngwakong wa Morena Modimo wa lena le tliše dibjalo tše kaonekaone tše le di bunago pele.

“Le se ke la apea kwanyana goba putšanyana ka maswi a mmayo.”

₂₇Morena a re go Moshe: “Ngwala mantšu a, ka gobane ke dira kgwerano le wena le Baisraele go ya ka ona.”

₂₈Moshe o dutše moo le Morena matšatši a masome a mane le mašego a ona a sa je selo a sa nwe selo. Gomme a ngwala mantšu a kgwerano e lego Melao ye Lesome matlapeng ao.

₂₉Ge Moshe a theoga thabeng ya Sinai a swere Melao ye Lesome, sefahlego sa gagwe se be se phadima ka ge a be a boletše le Morena, fela yena o be a sa tsebe. ₃₀Arone le Baisraele ka moka ba lebelela Moshe, ba bona sefahlego sa gagwe se phadima, mme ba boifa go mmatamela. ₃₁Eupša Moshe a ba bitša, gomme Arone le baetapele ka moka ba setšhaba ba ya go yena, gomme Moshe a bolela le bona. ₃₂Ka morago ga fao, Baisraele ka moka ba mmokanela, gomme Moshe a ba botša tšohle tše Morena a mmoditšego tšona thabeng ya Sinai a re ba di phethe. ₃₃Ge Moshe a feditše go bolela nabo, a ikhurumetša sefahlego ka lešira. ₃₄Ka mehla ge Moshe a tsena ka Tenteng ya bodulo bja Morena go bolela le yena, o be a tloša lešira. Ge a etšwa, o be a laodišetša setšhaba sa Israele tšohle tše a bego a laetšwe go ba botša tšona, ₃₅gomme bona ba be ba bona sefahlego sa gagwe se phadima. Ka fao o be a ikhurumetša ka lešira go fihlela a eya gape go bolela le Morena.