Dikholofetšo tše botse tša Modimo – Letšatši la 3

Bontši bja rena re hlagolela ditoro le diphišego tše di sa phethagatšwago. Bjalo ka bana ba Modimo re hloka go gopola gore Modimo o laola maphelo a rena gomme o re beile lefaseng la gagwe go mo hlankela e se gore re itlhankele.

Re ka ba le phišego ya go ka atlega lefapheng le le itšego eupša katlego ya rena e ka se be selo ge e le kgahlanong le thulaganyo ya Modimo go rena. Ka gobane ke ge fela re obamela bogoši bja Modimo le go phela ka go mo obamela mo re kago hwetša khutšo le kwano.

Kgoši Dafida, le yena, o bile le phišego ye e sa phethagatšwago le ge a bušitše mengwaga ye 40 bjalo ka kgoši. Morago ga ge madira a gagwe a fentše Jerusalema go Bajebuse, Dafida o dirile motse motsemošate wa gagwe gomme a tliša Polokelo ya Kgwerano Thabeng ya Moria.

Phišego e kgolo ya Dafida e be e le go aga tempele e botse mo a tlago bea Polokelo ya Kgwerano. Lega go le bjalo, se ga se a direga.

Modimo o utolletše Dafida gore bjalo ka monna wa ntwa, o tšholotše madi a mantši le go bolaya batho ba bantši. Tlhompho le monyetla wa go aga tempele o tla fiwa morwa wa gagwe Solomone, yo e tla bago monna wa khutšo le boiketlo. Modimo o holofeditše Dafida gore o tla nea Israele khutšo le boiketlo nakong ya pušo ya Solomone (1 Dikronika 22:6-9).

Batho gantši ba a befela ge diphišego tša bona di fetoga lefela. Se ga se a direga go Dafida. A tseba gore Solomone ke yo mofsa gomme ga a na temogo, Dafida o dirile ditokišetšo tše feletšego tše di tlago thuša Solomone go aga tempele ka le lengwe la matšatši ge a e ba kgoši (1 Dikronika 22:5).

Dafida ke mohlala o mmotse o re swanetšego go o latela. Dithulaganyo tša Modimo ga se dithulaganyo tša rena. Ge dikganyogo tša rena le diphišego di palela, re swanetše re kgotsofale go tsebo ya gore Modimo o tseba bokaone gomme go latela tsela ya gagwe go tla re iša diferong tša legodimo.