Dikenywa tša Moya – Letšatši la 1

“Yo a ratago go ntlhankela, a ntatele, gomme ka ge e le mohlanka wa ka, mo ke lego gona le yena o tla ba gona. Ge motho a ntlhankela Tate o tla mo godiša.” Johanese 12:26

Boetapele bja go hlankela ke lentšu la go tuma le le bilego gona mengwagangwaga. Ke filosofi ya boetapele le sehlopha sa mekgwa ya boetapele se se beago dinyakwa tša batho ba bangwe pele le go thuša batho go hlabolla le go diragatša ka mo go phagamego ka mo go kgonegago. Le ge go le bjalo, kgale pele mekgatlo le basaekholotši ba ka bolela ka kgopolo ya boetapele bja go hlankela, Bibele e bolela tše ntši ka go hlankela.

Go hlankela ga go hloka boithati ke ye nngwe ya dikhwaliti tše di hlalošago bophelo bja Jesu Kriste, mohlanka yo mogolo go feta bohle. Jesu o rile, “Gobane le Morwamotho ga se a tlela go hlankelwa, eupša o tletše go hlankela batho le go ikgafela go bolawa, gore e be seloba sa ba bantši” (Markose 10:45). Moapostola Paulose o okeditše go tsepelelo ye ge a re, “A se šetše fela tša go ikhola, eupša a šetše tša go hola ba bangwe” (Bafilipi 2:4). Ge re nea Jesu Kriste lefelo la gagwe la maleba bjalo ka Morena wa maphelo a rena, pušo ya gagwe e tla hlagišwa ka tsela ye re hlankelago ba bangwe. Re bontšha lerato la rena go Modimo ka tsela ye re bontšhago lerato go ba bangwe. Bjalo ka badumedi, ka moka re biletšwa go bophelo bja bodiredi. Seo ga se hlaloše gore ka moka re biletšwa go ba bareri, baruti goba bašomedi ka kerekeng, eupša go hlaloša gore ka moka re biletšwa go ba bahlanka go letago la Modimo.

Molaodi wa madira yo a rotšego mošomo o tsopolwa ge a bolela gore, “O fiwa maemo go go kgontšha go hlankela bokaone bao ba lego ka godimo le ka tlase ga gago. Ga o fiwe maemo go dira tše di sa tlwaelegago.” Modimo o re hlanketše ka go dira Kriste sehlabelo sefapanong ka lebaka la dibe tša rena gomme re swanetše go hlankela ba bangwe ka go bega ebangedi le go ba gafela maphelo a rena. Bao ba kganyogago go ba bagolo mmušong wa Modimo ba swanetše ba be bahlanka. Nakong e tlago, re tla be re lebeletše dikarolo tša go fapafapana tša go hlankela ka Bibeleng le ka fao re ka bago le pelo ya go ba mohlanka.