Bohlale bjo bo sa felego – Letšatši 21

₄₂Bona bao ba be ba dula e le ba ba rutwago ke baapostola, ba ba ikwago e le selo se tee, ba ba ngwathišanago bogobe, le ba ba rapelago.

₄₆Tšatši le lengwe le le lengwe ba be ba kopanela Tempeleng e le seboka, ba ngwathišana bogobe ka magaeng a bona ka go šielana, ba eja ba thabile, ba ikokobetša, ₄₇ba tumiša Modimo, ba kgahla batho ka moka. Letšatši ka letšatši Morena a oketša phuthego ka bao ba phološwago.

₃₂Badumedi bjale e be e šetše e le ba bantši, mme e le ba pelo e tee le moya o tee. Go be go se yo a rego tše a nago le tšona ke tša gagwe a nnoši, eupša tšohle e be e le tša bona ka moka.

₃₁Ke ka mo kereke nageng yohle ya Judea le Galilea le Samaria e ilego ya ikhutša. Ya tia ya hlompha Morena, gomme ya gola e thušwa ke Moya wo Mokgethwa.

₁₆Jesu a boela Nasaretha moo a bego a goletše gona, gomme ka letšatši la Sabatha a ya sinagogeng bjalo ka ge a be a tlwaetše. A ema gore a bale Mangwalo a Makgethwa.

₂₅Re se lese go fela re eya dithapelong tša phuthego, ra etša ba ba itlwaeditšego go se ye. A re upše re kgothaletšaneng go fela re eya gona le go feta, ka ge le lena le iponela gore Letšatši la Kahlolo le a batamela.

₁₈Le se tagwe ke bjala, ka gobane moo ke mo go tšwago bohlola; sa lena e be go tlala Moya wa Modimo. ₁₉Le boledišaneng ka dipesalome le difela le dikopelo tša semoya, le opelela Morena le mo tumiša ka dipelong tša lena. ₂₀Ka ge le le ba Morena wa rena, Jesu Kriste, ka mehla le leboge Modimo, Tatagorena, ka lebaka la tšohle.

₁₄Eupša ba ka mo kgopela thušo bjang ba se ba dumela go yena? Gomme ba ka dumela go yena bjang ba se ba kwa molaetša wa gagwe? Molaetša wa gagwe wona ba ka o kwa bjang ba sa o begelwe? ₁₅Gomme molaetša o ka begwa bjang go se gwa rongwa batseta? Bjalo ka ge Mangwalo a Makgethwa a bolela a re: “Go botse bjang go bona batseta ba etla, ba re tlela le taba ye botse!”

₉Ka lebaka leo, e sa le go tloga mola ra kwago ka lena, ga re lese go le rapelela. Re kgopela Modimo gore a le tlatše tsebo ya thato ya gagwe, ka bohlale bjohle le kwešišo yohle ye e tšwago go Moya wa gagwe. ₁₀Ke mo le tlago kgona go phela ka mo Morena a nyakago ka gona, la dira fela tše di mo kgahlago. Bophelong bja lena la tšweletša tša go loka tša mehuta, la tšwela pele le go tseba Modimo.

₃Se re se bonego gape re se kwelego, le lena re le begela sona gore le tle le be ba tee le rena. Le rena re ba tee le Tate le Jesu Kriste, Morwagwe.

₅Ka wona mokgwa woo, le rena le ge re le ba bantši, re mmele o tee ka Kriste, gomme mongwe le mongwe ke setho sa mongwekayena.

₁₃Le rena ka moka re bjalo; le ge re le Bajuda, goba bao e sego Bajuda, goba makgoba, goba balokologi, re kolobeditšwe ka wona Moya o tee woo ra ba mmele o tee, bohle ra fiwa Moya o tee woo wa dula ka dipelong tša rena.

₁₄Gobane mmele ka bowona ga se setho se tee, ke ditho tše dintši. ₁₅Ge leoto le ka re: “Ka ge ke se letsogo, ga ke wa mmele,” ga se go re ka nnete e tla be e se setho sa mmele. ₁₆Tsebe le yona ge e ka re: “Ka ge ke se leihlo, ga ke wa mmele,” ga se go re ka nnete e tla be e se setho sa mmele. ₁₇Ge mmele wohle e ka be e le leihlo, go kwa o be o tla go tšea kae? Le ge mmele ka moka e ka be e le tsebe, go dupa o be o tla go tšea kae? ₁₈Bjale ge, Modimo o beile setho se sengwe le se sengwe mmeleng ka mo a ratilego ka gona. ₁₉Ge ditho tšohle e ka be e le setho se tee, na mmele o ka be o le gona? ₂₀Bjale ditho ke tše dintši, fela mmele ke o tee.

₅₁Ke nna sona senkgwa seo sa go phediša, se se theogilego legodimong. Ge motho a eja senkgwa se o tla phela go ya go ile. Senkgwa se ke tlago mo fa sona ke nama ya ka ye ke e fago batho ba lefase, gore ba phelele sa ruri.”

₅₂Ge a realo Bajuda ba galefa gomme ba thoma go ngangišana ba re: “Na motho yo a ka napa a re fa nama ya gagwe ra e ja?”

₅₃Jesu a re go bona: “Ruri, ruri, ke le botša gore ge le sa je nama ya ka, nna Morwamotho, la nwa le madi a ka, gona le ka se phelele sa ruri. ₅₄Yo a jago nama ya ka le gona a nwago madi a ka, yena o šetše a na le bophelo bjo bo sa felego, gomme ka tšatši la mafelelo ke tla mo tsoša bahung. ₅₅Gape nna nama ya ka ke sejo sa mmannete, le madi a ka ke seno sa mmannete. ₅₆Yo a jago nama ya ka, a nwago le madi a ka, o dula ka go nna, le nna ke dula ka go yena. ₅₇Yo a ntšago o tla phedišwa ke nna, bjalo ka ge le nna ke phedišwa ke Tate, Mophedi yo a nthomilego.

₁₆Kgane senwelo se re se nwago Selalelong sa Morena, se re tumišago Modimo gape re mo lebogago ka lebaka la sona, ge re se nwa na ga se gona ge re eba ba tee ka madi a Kriste? Le sona senkgwa se re se ngwathago, na ge re se ja ga se gona ge re eba ba tee ka mmele wa Kriste? ₁₇Ka ge senkgwa e le se setee, rena ka moka, le ge re le ba bantši, re mmele o tee, ka gobane ka moka re abelana sona senkgwa se tee se.

₂₃“Mohlang woo le ka se mpotšiše selo. Ruri, ruri, ke le botša gore se le kago se kgopela Tate ka ge le le ba ka o tla le fa sona. ₂₄Go fihlela bjale ga se la ka la kgopela selo le le ba ka. Kgopelang, gomme le tla fiwa, gore lethabo la lena e be le le feletšego.”

₇“Kgopelang, gomme le tla fiwa; nyakang, gomme le tla hwetša; kokotang, gomme le tla bulelwa. ₈Gobane mang le mang yo a kgopelago o a fiwa, yo a nyakago o a hwetša, le yo a kokotago o tla bulelwa.

₁Jesu o be a le felwanatsoko a rapela, gomme a re go fetša, yo mongwe wa barutiwa ba gagwe a re go yena: “Morena, nke o re rute go rapela, go swana le Johanese ge a rutile ba gagwe barutiwa.”

₂Jesu a re: “Ge le rapela le re:

₁₄Re ka ya go Modimo re sa šie, ka ge re tseba gore ge re mo kgopela go ya ka thato ya gagwe o a re kwa. ₁₅Ka ge re tseba gore ka mehla ge re mo kgopela selo o a re kwa, re tseba gore se re mo kgopelago sona o a re fa.