Batho ba ba amantšhwago le Matswalo a Jesu – letšatši la 10

Ka mehla ke hwetša polao ya bašemane ka moka ba mengwaga ya ka tlase ga e mebedi e tee ya dipego tše di kwešago bohloko ka Bibeleng. Ke kgoši ya mohuta mang ye e laelago polao ya batho ba go hloka molato?

Go na le bohlatse bjo bontši bja histori bja semelo sa Heroda go rena go ka tseba gore se ruri ke mohuta wa mmuši ye a bego a le yena. O ile a bolaya molamo wa gagwe, barwa ba gagwe ba bararo le o tee wa basadi ba gagwe ka gobane o be a nagana gore ba be ba mo logela maanomabe. Go be go na le mabarebare a go re Kesare Agostose o ile a fihla bokgoleng bja go bolela gore, “Go kaone go ba kolobe ya Heroda go e na le go ba morwa wa gagwe”.

Le ge se e le se sebe, Mateu o re botša gore kanegelo ye e re gopotša gore ga go kgonege go thibela thulano ya semoya ye e kgatlampanago go re dikologa. E re laetša gore go na le ba bantši bao ba tlago hlophega diatleng tša sathane ntweng ya gagwe kgahlanong le Modimo, gomme gape e re gopotša gore Modimo ga a re tshepiše go re šireletša go pefelo ya sathane lefaseng le. Ge e le gabotse, Paulose o re “Bohle ba ba ratago go phela bophelo bja borapedi e le ba tee le Kriste Jesu ba tla hlomarwa. Ge e le bakgopo le baradia, bobe bja bona bo tla keka bo eya pele, gomme bona beng ba tla tšwela pele le go radia le go radiwa” (2 Timotheose 3:12-13).

Ka gona, e ka ba Modimo o re tlogela gore re itlhokomele ka borena? Ga go bjalo le ga tee. Modimo ga a homola goba o swaregile goba go se šetše. Khutšo ya Modimo e fiwa ka Jesu Kriste go re thuša go kgotlelela tšharakano ya lefase la rena la bjale. Khutšo ya Modimo ga se tlhoko ya thulano eupša phetolo go thulano. Gopola mantšu a Jesu ge a re, “Mo lefaseng le tla hlorišwa, fela le bete dipelo; nna lefase ke le paletše!”.” (Johanese 16:33).