Batamela kgauswi le Modimo – Letšatši la 2

E sa le ka amogela emeile go tšwa go mmadi a botšiša gore: “Benescke, nka tsošološa bjang tswalano ya ka le Modimo? Ke a mo tseba, eupša go bonala eke ke kgole le Yena. O na le dikeletšo?”

Ekaba o ikwa ka mo go swanago? E sa le wa ba le nako ya go fetoga le go phološwa, wa itemogela bogona bja Modimo le maatla bophelong bja gago, le gaešita go ba le phišego e kgolo ka gare ga gago ya go dira batho ba bantši ba phologe ka mo go kgonegago. Lega go le bjalo, maemo, manyami goba mathata, goba go swarega kudu go dirile gore phišego ye ka gare ga gago e hwelele. Ga bjale o ipona molato ka letsogong le tee gomme ga o na boitshepo bja go ya go Modimo ka go le lengwe, gomme boemo bja gago ga bo fetoge. Se ke ka fao lenaba le nyakago gore o be ka gona – o se dire selo.

Lega go le bjalo, go na le kholofelo go boemo bja gago.

Ge batho ba emiša go itima dijo, morago ga matšatši a mmalwa a go itima dijo le go rapela, e tee ya dilo tše bohlokwa kudu tše o swanetšego go di gopola ke go se je dijo tše ntši kudu. Mmele o ka se palele fela ke go di sepetša, eupša o ka lwala. Keletšo go motho yo a emišago go itima dijo, kudukudu ge a itimile dijo go feta matšatši a 21, ke, sa pele, go nwa diela bjalo ka sopo, gore mmele o kgone go itlwaetša dijo gape. Gomme ka morago ga fao, motho a ka kgona go ja dijo tše kgolo ka ntle le bothata.

Molawana o o šoma gape go “boeleng ga rena go Modimo”. Go e na le go thoma go latela lenaneo le legolo la go bala Bibele goba go ba karolo ya dihlopha tša go fapanafapana tša go rapela (ke selo se sebotse gomme se na le tema ye se e kgathago), selo se bohlokwa go batameleng kgauswi le Modimo ke, sa pele, go homola, tsepelela go Yena, kgopela Yena go bolela le wena ka Moya wa Gagwe wo Mokgethwa le go theeletša se A se bolelago. Thoma gannyane gomme go se go ye kae o tla thoma go itemogela ka fao phišego ya gago go Modimo e tukago gape, ka fao o ka se letego go tšea Bibele gomme wa e bala, gore o kgone go mo tseba bokaone. Modimo o re nyaka letšatši le letšatši. Rena, lega go le bjalo, re lahlegelwa ke e mentši ya menyetla ye ka lebaka la go swarega kudu.
Gopola, lenaba le tla leka go dira gore re swarege kudu ka dilo tše di sego bohlokwa, go thibela gore re se batamele kgauswi le Modimo. O ka fenya se ka go tima radio ya gago ka koloing ya gago, wa bolela le Modimo, goba ka go tswalela mahlo morago ga go bala temana ye le go laletša Modimo bophelong bja gago gape.

Go Jeremia 31:3 re bala gore: “… ke ile ka iponagatša go sona ke le kgole. Lena setšhaba sa Israele, ka ge e sa le ke le rata go tloga mathomong, le bjale ke tla no fela ke le botegetše.”Gape, go Jesaya 65:24 re bala gore: “E tla re pele ba thoma go rapela ka ba araba; ya re ba sa rapela ka phetha tše ba di kgopelago.”

Modimo o a re rata le ge re ikwa re le kgole le Yena. A re boele go Yena le go mo mema go ba karolo ya maphelo a rena. O šetše a go letetše. Modimo a go šegofatše.