Batamela kgauswi le Modimo – Letšatši la 18

[Motho yo mongwe e sa le a nngwalela emeile e e latelago: “Ka kgopelo thuša balemi go rapela nakong ya dihla tša komelelo. Ga se tiragalo ya nako e tee fela gomme ba bangwe ba maemong ao ba kago lahlegelwa ka dipolase tša bona, ge pula e ka se ne.”]

Go balemi, e ka ba e le sehla sa komelelo, eupša go wena, e ka ba boopa goba go se hwetše mošomo, goba sekoloto se lekeletše godimo ga hlogo ya gago boka thipa, goba bolwetši, goba mohlomongwe molekani yo a sa dumelego. Re rapelela pula gomme, ka dinako tše dingwe, go bonala eke maru a kopana ka kholofetšo ya pula, gomme dipelo tša rena di tletše ka kholofelo, eupša e a nyamalala gomme ra šala ka dipotšišo tše ntši go e na le dikarabo. Ekaba ke ka tsela ye o ikwago ka yona lehono? O rapelela katlego, eupša ga o hwetše dikarabo le semeetseng?

Mo ke dilo tše tharo tše re kago di gopola nakong ya dihla tša komelelo maphelong a rena:

1) Modimo o laola dilo: Go Jesaya 55:8-9 Modimo o re: “Megopolo ya ka ga e swane le ya lena, le ditsela tša ka di fapana le tša lena. Bjalo ka ge magodimo a phagame kudu ka godimo ga lefase, ka wona mokgwa woo ditsela le megopolo ya ka di ka godimo ga tša lena.” Ga gona gore re ka se be le mathata ka gobane re badumedi. Re phela lefaseng le le robegilego. Selo se sebotse, lega go le bjalo, ke gore re a tseba gore Modimo a ka se re tlogele goba go re lahla. Ge re tšwela pela go tumiša Modimo nakong ya dihla tša komelelo, re tlogela bopaki bja rena go batho ba ba lego kgauswi le rena, eupša ka nako e swanago, go ba gape sešupo sa tumelo ya rena go Modimo. O a bona gomme O tla go putsa (Mateu 6:6b).

2) Komelelo ke monyetla wa go hlompha Modimo: Nako ya go letela pula e re gapeletša gore re rapele mo re hwetšago semelo sa Modimo ka tsela e mpsha. Morago ga sehla se boima bophelong bja Jobo, o lebeletše morago gomme a re: “Ke be ke kwele ka wena ka go anegelwa, eupša bjale ke iponetše wena ka a ka mahlo” (Jobo 42:5). Ge pula e etla morago ga sehla sa komelelo, gantši ga re leboge pula fela, eupša gape re tseba yo Modimo a lego Yena. Nakong ya go letela, tsepelelo ya rena e šutha go tlhohlo go ya go Modimo.

3) Komelelo ke monyetla wa go tloša mapheko maphelong a rena: Ekaba go na le selo se se thibelago Moya wo Mokgethwa go ka elela gabonolo maphelong a rena? Ekaba o lwele le moagišani goba mošomi-gotee, gomme ke wena yo a kgethago go se lebalele? Ke afe maemo a lenyalo la gago? Ekaba o dira ka potego boemong bjo bongwe le bjo bongwe? Go Pesalome 139:23-24 Mopesalome o ngwetše gore: “Mphetleke, Modimo, o tsebe pelo ya ka; ntekole, o bone khuduego ka go nna. Ntebelele ge ke na le bobe, gomme o nkiše tseleng ya go sa felego.” Gape, go Pesalome 24:3-4 re bala gore: “Ke mang yo a ka namelago thaba ya Morena? Ke mang a ka tsenago ka Tempeleng ya gagwe ye kgethwa? Ke yo a dirago tše di lokilego, a nago le pelo ye botse.”

Ge re nyaka bogona bja Modimo dihleng tša komelelo, re ka tseba gore kholofetšo go 2 Dikronika 7:13-15 e sa le gona: “Ge ke tswaletše magodimo pula e sa ne … ge ba ka nthapela ba ikokobetša ba tla go nna gomme ba tlogela ditsela tša bona tše mpe, gona ke tla ba kwa ke le legodimong, ka ba lebalela dibe, gomme ka boetša naga ya bona sekeng sa yona. Bjale ke tla diša Tempele ye gomme ka theetša dithapelo tša batho ba ba rapelago mo.”

Ke afe mafelo a komelelo bophelong bja gago lehono? A re ikgopotše gore Modimo o sa laola dilo maphelong a rena. A re tumišeng Yena ge re hwetša monyetla wa go ka utolla semelo sa Gagwe ka tsela e mpsha. Gomme ka boomo a re tlošeng mapheko maphelong a rena gore Modimo, ka Moya wa Gagwe wo Mokgethwa, a šome ka gare ga maphelo a rena. Ge re dira se, ke a le netefaletša gore le ka ntšha diamporela, ka gobane pula e ka ba e le kgauswi go feta ka mo o naganago. Modimo a go šegofatše.