A ka kgona … – letšatši la 21

E be e le letšatši leo le fišago mekgotheng ya Kapernaume, ge mohlabani wa Moroma a etla go Jesu. Go akgofa boitshwarong bja gagwe le kgateletšo sefahlegong sa gagwe di be di laetša tiišetšo ya taba. “Morena,” a thoma go phophotha. “Mohlanka wa ka kua gae o lwala kudu. O rephile ditho gomme ga a kgone go sepela. Ka kgopelo etla o mo thuše!” Ntle le go dikadika, Jesu a fetola, “Ke tla ya le wena.”

Motho a ka nagana gore mohlabani o be a tla sokologa le semeetseng gomme a etela pele Jesu go ya lapeng la gagwe. Ga se a dira seo. Phetolo ya gagwe ya makatša Jesu. “Morena”, a thoma. “Le nna ke le motho yo a bušwago, ke na le bahlabani ba ke ba bušago. Ge ke re go mohlabani: ‘Eya kua!’ o a ya; ge ke re go yo mongwe: ‘Etla mo!’ o a tla, le ge ke re go yo mongwe mohlanka wa ka: ‘Dira se!’ o a se dira. Ke a tseba gore o na le taolo. Bolela lentšu, gomme ke a tseba gore go tla direga.” Go Mateu 8:10,13 Jesu a fetola, “‘Ruri, ke a le botša, ga se ka ka ka hwetša motho yo a nago le tumelo ye kaaka mo go Baisraele … Boela gae; se o se dumetšego se tla direga.’ Gomme mohlanka wa molaodi yola a fola ka yona nako yeo.”
Ke eng senyakwa sa gago lehono? Ke katlego efe ye o o e kganyogago yeo Modimo fela a kago go fa yona? Molekani? Maphelo? Bohlale ka boemo bja gago bja ditšhelete? Ngwana yo e lego wa gago? Mošomo? Ntlo? Katlego? E ka ba o ya go Modimo ka boitshepo bjo bo feletšego bjalo ka mohlabani yo goba o rapela ka pelaelo e nnyane pelong ya gago? Go Baheberu 11:6 re bala gore: “Gape ge motho a se na tumelo a ka se kgahle Modimo, gobane yo a tlago go Modimo o swanetše go ba le tumelo ya go re Modimo o gona, le go re o putsa ba ba mo nyakago.” Go Jesaya 59:1 re bala gore: “Le se gopole gore Morena ga a ne maatla a go kgona go le thuša, goba o thibane ditsebe mo e lego gore a ka se kwe dillo tša lena!” Ge re dumela gore Modimo a ka dira se re mo kgopelago, re tshepha gore O tseba tše di re loketšego, re ka swarelela mantšung go Markose 11:24: “Ka lebaka leo ke le botša gore tšohle tše le kago di kgopela ka thapelo, le dumele gore ruri le tla di fiwa, gomme le tla di fiwa.”

Le ge re ka se fekeetše Modimo, re ka, ka pelo ya kgonthe ye e tletšego tumelo ya go swana le ya ngwana, mmotša se re se kganyogago, bjalo ka ge A re kganyogela bophelo bjo bo feletšego. A re ithuteng go mohlabani wa Roma gomme re bee tumelo y arena go Modimo yo a kago re thuša. Modimo a go šegofatše.

Mošomo wa letšatši: Ngwala fase dinyakwa tša gago le dikganyogo. Bolela le Modimo ka tšona gomme o tshephe Yena.