SAKARIA 14

₁Letšatši la go tla ga Morena le kgauswi. Ke mohla dithebola tša go tšwa go wena, Jerusalema, di tlago kgobja pele ga gago. ₂Morena o tla phutha ditšhaba tšohle gore di tle di lwe le Jerusalema. Motse wo o tla thopša, dintlo tša hulwa, le basadi ba katwa. Seripa sa badudi ba wona se tla išwa bothopša, eupša ba ba šetšego ba ka se tlošwe motseng. ₃Ka morago Morena o tla tšwa dira a yo lwa le ditšhaba tšeo, bjalo ka ge a be a elwa le manaba a gagwe kgale. ₄Mohlang woo o tla ema godimo ga Thaba ya Mehlware ka bohlabela bja Jerusalema. Ke mo Thaba ya Mehlware e tlago pharoga ka bogare go tloga ka bohlabela go ya ka bodikela, ya ba moedi wo mogologolo. Seripa se sengwe sa thaba se tla šuthela leboa, mola se sengwe sa šuthela borwa. ₅Le tla tšhaba ka moedi woo wa thaba ya Morena wo o tlago ba o fihla Atsele. Le tla tšhaba bjalo ka borakgolokhukhu ba lena mola lefase le šikinyega, mehleng yela Usia e le kgoši ya Juda. Ya ba gona Morena Modimo wa ka a tlago, a tla le barongwa bohle.

₆Mohlang woo go ka se be le seedi, go tla ba le botšididi le šobane fela. ₇E tla ba letšatši la go se swane le a mangwe. Go ka se be le nako ya mosegare le nako ya bošego, eupša ge go etla bošego go tla ba le seedi. Gore na seo se tla direga neng go tseba Morena fela.

₈Mehleng yeo meetse a mokgako a tla ela a etšwa Jerusalema, a mangwe a elela Lewatleng le le Hwilego ka bohlabela, a mangwe a elela Lewatleng la Mediteraniene ka bodikela. A tla ela ngwaga ka moka, selemo le marega. ₉Ka nako yeo Morena e tla be e le yena kgoši ya lefase ka moka; ke nako ye e tla bego e le yena Morena a le noši, gomme bohle ba tla mo tseba ka leina le tee.

₁₀Selete sohle, go tloga Geba go yo fihla Rimone ka borwa bja Jerusalema, se tla lekanetšwa. Motse wa Jerusalema o tla dula o phagame mo o agilwego gona; o tla be o thoma lesorong la Benjamene o fihla mola go bego go na le lesoro pele, Lesoro la Sekhutlo, wa tloga Toreng ya Hananele wa yo fihla bopitlelong bja diterebe bja mošate. ₁₁Batho ba tla itulela moo Jerusalema ba iketlile, motse wa bona wa se sa ba kotsing ya go fedišwa.

₁₂Morena o tla otla ditšhaba tše di lwago le Jerusalema ka leuba le: Ba tla bola dinama ba sa phela; mahlo a bona a tla bolela ka dinkgotlotswaneng tša ona, le maleme a bona a bolela ka maganong a bona.

₁₃Mehleng yeo Morena o tla ba ferekanya mo ba tlago ba ba swarana ka diatla. ₁₄Banna ba Juda ba tla lwa Jerusalema. Ba tla hula ditšhaba tšohle tše di bapilego nabo mahumo a tšona – gauta, silibera le diaparo ka bontši.

₁₅Bolwetši bja go swana le bjoo bo tla tsena le dipere, dimeila, dikamela le dipokolo, a ke re diruiwa ka moka tše di lego ka mešašeng ya manaba.

₁₆Mašaledi ohle a ditšhaba tše di hlasetšego Jerusalema a tla ya gona ngwaga wo mongwe le wo mongwe go yo khunamela Kgoši, Morena Ramaatlaohle, le go keteka Monyanya wa Mešaša. ₁₇Ge setšhaba se sengwe se ka se ye go khunamela yena Kgoši, Morena Ramaatlaohle, se ka se nelwe ke pula nageng ya sona. ₁₈Ge setšhaba sa Egepeta se ka se ye go keteka Monyanya wa Mešaša, gona se tla otlwa ka leuba leo ka lona Morena a tlago otla ditšhaba tše di sa yego go keteka. ₁₉Yeo ke yona kotlo ye Baegepeta le ditšhaba tšohle tše di sa yego go keteka Monyanya wa Mešaša di tlago otlwa ka yona.

₂₀Mehleng yeo le ditšhitswana tše di kwetenyago tša dipere di tla tlokwa mantšu a: “Di abetšwe Morena”. Le dipitša tša go apea tša ka Tempeleng e tla ba tše dikgethwa go no swana le meruswi yela ya pele ga aletare. ₂₁Dipitša tšohle tša go apea tša Jerusalema le tša Juda e tla ba tše dikgethwa tša Morena Ramaatlaohle. Bohle ba ba tlago go dira dihlabelo ba tla apea nama ya dihlabelo ka tšona. Mehleng yeo go ka se sa ba le mmapatši ka Tempeleng ya Morena Ramaatlaohle.