KUTOLLO 20

₁Ka morago ka bona morongwa yo mongwe a theoga legodimong, a swere sekgonyo sa molete wa go iša fasefase le ketane ye kgolo ka seatla. ₂A swara mmamogašwa, noga yela ya kgale ya go bitšwa Diabolose goba Sathane, gomme a e kgoka mengwaga ye sekete. ₃A e lahlela ka moleteng woo, a e kgonyeletša ka gona, a ba a bitiela mojako wa molete woo gore e se sa fora ditšhaba, go be go tle go fete mengwaga ye sekete. Ge mengwaga yeo e fetile e swanetše go kgokollwa sebakanyana.

₄Ka bona ditulo tša kahlolo di dutšwe ke ba ba filwego maatla a boahlodi. Ka bona le meoya ya bao ba kgaotšwego dihlogo ka lebaka la ge ba be ba bega bohlatse bja Jesu le lentšu la Modimo. Ba be ba sa khunamele sebata sela le seswantšhobopša sa sona, le gona ba se ba ka ba swaiwa leswao la sebata seo diphatleng tša bona le diatleng. Bona bao ba tsoga bahung mme ba buša le Kriste mengwaga ye sekete. ₅Bahu ba bangwe bona ba ile ba se tsoge, gwa ba gwa feta mengwaga yeo ye sekete. Ye ke yona tsogo ya mathomo ya bahu. ₆Ba lehlogonolo le ba bakgethwa ke ba ba tsošitšwego le bao ba mathomo. Lehu la bobedi ga le ba laole; bona e tla ba baprista ba Modimo le Kriste, gomme ba tla buša naye mengwaga ye sekete.

₇Ge mengwaga yeo ye sekete e fetile, Sathane o tla kgokollwa kgolegong ya gagwe, ₈a tšwela ntle go yo fora ditšhaba tše di lego lefaseng ka moka tše di bitšwago Gogo le Magogo. O tla di kgoboketša a di iša ntweng, ya ba tše dintši bjalo ka dithorwana tša lešabašaba lebopong la lewatle. ₉Di ile tša rotoga tša tla lefaseng, gomme tša dikanetša mešaša ya badumedi le motse wola Modimo a o ratago. Eupša go ile gwa theoga mollo legodimong wa di fediša. ₁₀Ke moka Diabolose yola wa go ba fora a lahlelwa ka bodibeng bjola bja mollo le tshebela, moo go bego go šetše go lahletšwe sebata sela le moprofeta yola wa maaka; gomme ba tla hlokofatšwa bošego le mosegare go ya go ile.

₁₁Ka morago ga moo ke ile ka bona setulo se segolo se sešweu sa bogoši le yo a dutšego go sona. Lefase le legodimo tša mo tšhaba gomme tša se sa bonwa. ₁₂Ka ba ka bona le bahu ba eme pele ga setulo seo sa bogoši, ba bagolo le ba banyenyane. Dipuku tša phuthollwa, gwa phuthollwa le ye nngwe e lego puku ya ba ba phelago. Bahu ba ile ba ahlolwa go ya ka tše ba bego ba di dirile, tše di ngwadilwego ka dipukung tšeo. ₁₃Ke moka lewatle la hlatša ba ba hwetšego ka go lona. Lehu le bodulabahu le tšona tša hlatša bahu ba tšona. Gomme bohle ba sekišwa go ya ka mediro ya bona. ₁₄Lehu le bodulabahu tša napa tša lahlelwa ka bodibeng bja mollo. Bodiba bjoo bja mollo ke lehu la bobedi. ₁₅Yo leina la gagwe le bego le se la ngwalwa ka pukung ya ba ba phelago o ile a lahlelwa ka bodibeng bjoo bja mollo.