Tshedimošo ya tlaleletšo

Pesalome 61

Go tsebišwa moopediši gore ke pesalome ya Dafida ya go opelwa e letšwa ka diletšo tša metato.

₁Hle, Modimo, ekwa sello sa ka,

theeletša thapelo ya ka.

₂Ke go bitša ke nolegile moko ke le magomong a lefase.

Nnametše letlapa le le phagamego,

le ke palelwago ke go le namela.

₃Gobane ke wena setšhabelo sa ka;

o sebo se se tiilego sa go ntšhireletša manabeng.

₄Nke nkabe ke dulela ruri ka mošašeng wa gago;

nke diphego tša gago e ka ba botšhabelo bja ka. Sela

₅O amogetše dikeno tše ke go anetšego tšona, Modimo,

gomme o mphile lefa la bao ba go boifago.

₆Okeletša kgoši matšatši,

o mo dire gore a fele a phela.

₇A a buše go ya go ile a šegofatšwa ke wena, hle, Modimo;

o mo šireletše ka leratorato la gago le potego.

₈Ke mo ke tlago go opelela ditumišo ka mehla ke ntše ke phetha dikeno tša ka letšatši ka letšatši.