Pesalome 143

₁Morena, ekwa thapelo ya ka;

ntheeletše ge ke go llela;

o nkarabe ka ge o botega ebile o le yo botho.

₂O se ntshekiše, nna, mohlanka wa gago,

gobane mo pele ga gago ga go motho mohlokabosodi.

₃Sera sa ka se ntlhomere se nkgatakela fase;

se mphediša swiswing boka ba ba hwilego kgale.

₄Ke nolegile moko,

ebile ke šetše ke itlhobogile.

₅Ke elelwa tša mehleng ya kgale,

ke gopola ditiro tšohle tša gago;

tše o kilego wa di dira ga ke di lebale.

₆Ke phagamiša matsogo ke go rapela;

ke go nyoretšwe boka naga e nyoretšwe meetse.

₇Morena, akgofa o nthuše, ke go hlolosetše;

se iphihlele nna, ka tla ka ba bjalo ka ba ba theogelago bodulabahu.

₈Mo mosong o nkgopotše leratorato la gago,

ka gobane nna ke botile wena.

O mpontšhe tsela ye ke swanetšego go tšea ka yona,

gobane ke go hlolosetše e le ruri.

₉O ntlhakodiše manabeng a ka,

ka ge nna ke khuta ka wena.

₁₀O nthute go phetha thato ya gago,

gobane ke wena Modimo wa ka.

Moya wa gago o lokile;

a ke sepetšwe ke wona tseleng ye e lokilego.

₁₁O ntote ke phele, Morena,

ka ge o le Morena wa lešoko,

mme o ntlhakodiše tlaišegong ya ka ka botho bja gago.

₁₂Ka ge o nthata ka leratorato la gago,

o tloše manaba a ka tšatšing;

bagateledi ba ka o ba fediše molokwanarite,

ka gobane ke mohlanka wa gago.